РЕЗУЛТАТИ ОД СПРОВЕДЕНА АНКЕТА за влијанието на пандемијата со COVID-19 на секојдневниот живот на лицата со МС
Во текот на мај, Националното здружение за МС спроведе анкета со цел да добиеме сознанија како пандемијата со COVID-19 влијаеше на секојдневниот живот на лицата со мултипла склероза.
Благодарност до лицата кои одвоија малку од своето време, ја пополнија анкетата и дадоа одговори на неколку едноставни прашања. Анкетата беше анонимна, а ни послужи да добиеме корисни информации кои во понатамошниот текст ќе ви ги прикажеме во сумирана форма.
На поставените прашања свои одговори дадоа 94 лица, односно 70,2% жени и 29,8% мажи, од кои 45,7% од испитаниците на возраст од 36 до 45 години, додека помладите од 36 и постарите од 46 се застапени со по околу 27%.
На прашањето: Дали за време на пандемијата ви беа достапни прегледите кај невролог, испитувањата и рехабилитацијата?, загрижувачки е што 67% од испитаниците одговориле дека овие услуги им биле помалку достапни од пред пандемијата.
За поздравување е фактот што на прашањето: Дали за време на пандемијата пропуштавте да ги земате редовно лековите во споредба со периодот пред пандемијата?, висои 75,5% нотирале дека продолжиле да го земаат лекот како и претходно. Додека нешто повеќе од 10% ја одбрале опцијата дека им било тешко да дојдат до клиниката или им било страв да не им ослабе имунолошкиот систем.
По однос на: Што најмногу ви недостасуваше за време на пандемијата? 51,1% одговориле дека тоа било дружењето со пријателите и семејството, 25,5% патувања и излегувања, 14,9 достапност на медицинскиот персонал додека процентуално помалку се застапени одговорите: одењето на работа, добро ми дојде малку одмор, моето хоби, од сѐ по малку итн.
Загрижувачки се одговорите на прашањето: Како влијаеше пандемијата на вашата физичка активност и вежбањето?, каде висок процент, односно 64,9% одговориле дека речиси престанале, односно вежбале и биле помалку физички активни за време на пандемијата.
57,4% ја одбрале опцијата дека: се чувствувале полошо и позагрижено за сопственото здравје од претходно како одговор на прашањето – Какво влијание имаше пандемијата на вашата психичка состојба?
По однос на: Дали сметате дека пандемијата и lockdown-от го забрзаа влошувањето на вашата МС?, потврдно одговориле 39,4% од анкетираните, додека кај останатите 60,6% оваа состојба немала влијание во забрзување на влошувањето на МС.
На последното прашање испитаниците имаа можност да напишат одговор, попрецизно: Кажете ни на што најмногу се радувате кога пандемијата ќе заврши?, најчести одговори кои ги добивме беа: патувања, слободно движење, дружење со пријателите, кафана, социјализација, активност и продуктивност, враќање на работа
По согледувањето на работите на кои пандемијата имаше најголем ефект во ,негативна смисла, тимот на Националното здружение за МС ќе продолжи со својата работа, со цел да ги задоволи потребите и барањата на своите членови, да ги подобри услугите и досегашните активности и секако да им овозможи нови пристапи, услуги и подобри можности заради подобрување на квалитетот на животот на лицата со мултипла склероза и нивните семејства.
Ви благодариме на сите што земавте учество во анкетата.
ЗА НАЦИОНАЛНОТО ЗДРУЖЕНИЕ ЗА МС
Национално здружение за помош и поддршка на лица со мултипла склероза – Национално здружение за МС е доброволно, непрофитно, невладино и непартиско здружение на граѓани, формирано заради остварување, заштита, унапредување и усогласување на правата, потребите и интересите, како и вршење на дејности и активности со цел подигање на јавната свест за мултиплата склероза. Oсновано е на 20. март 2019 година. Националното здружение е полноправна членка на Европската МС Платформа (анг. European Multiple Sclerosis Platform, EMSP), полноправна членка на Светската алијанса на пациенти (анг. World Patient Alliance) и асоцијативна членка на Алијансата на пациентски организации (АПО).
Потребата за формирање на здружението се наметна како резултат на неопходноста за обединување на лицата со мултипла склероза, нивните семејства со цел согледување на нивните потреби и инволвирање на останати чинители заради решавање на проблемите на лицата со МС, како и подобрување на квалитетот на нивното живеење. Исто така, секојдневниот напредок во медицината, токму во областа на неврологија бара интензивирање на реформите во оваа област.
Нашата мисија и причина за постоење е искрената желба за помош и поддршка на лицата со МС и нивните негуватели, во подигнување на свеста кај јавноста и проблематиката по однос на МС, сериозен пристап, навремена дијагностика и навремен и соодветен третман со цел спречување на прогресијата и инвалидитетот, поддршка на пациентите, едукација по однос на правата на лицата со МС и промоција на нови достигнувања во медицината.