Резултати од истражување: Мултипла склероза и планирање на семејство

МС Македонија
април 9, 2026

Националното здружение за МС спроведе истражување со цел да се добие реален увид во предизвиците, искуствата и потребите на жените со мултипла склероза во Македонија кога станува збор за мајчинството и планирањето на семејство.

Истражувањето беше реализирано преку анонимен прашалник во кој учествуваа 82 испитаници, од кои 67 жени со мултипла склероза (МС) беа вклучени во финалната анализа.

Клучни наоди

МС влијае врз животните одлуки

Повеќе од половина од испитаничките (51%) изјавиле дека немаат онолку деца колку што посакувале. Ова укажува дека мултиплата склероза има значително влијание врз одлуките поврзани со семејството.

Главни бариери

Најчести причини за одложување или откажување од бременост се:

  • Страв од влошување на болеста по породување
  • Физичка состојба и ограничувања
  • Совет од лекар да не се планира бременост

Недостаток на информации и поддршка

Само 31,3% од испитаничките сметаат дека добиле доволно информации од здравствените работници за МС и бременост.

Повеќе од половина никогаш не разговарале со својот лекар за планирање на семејство додека примаат терапија.

Ова укажува на потреба од:

  • Подобра комуникација со лекарите
  • Повеќе едукативни материјали
  • Системска поддршка за пациентите

Терапија и бременост

Дури 91% од жените не примале терапија за време на бременоста, што укажува на:

  • страв од ризици
  • недоволна информираност
  • претпазлив пристап во минатото

Со развојот на современи терапии, оваа пракса има потенцијал да се подобри.

Потреби на пациентките

Жените со МС јасно ги истакнуваат следните приоритети:

  • Повеќе информации за безбедноста на лековите во бременост
  • Подобро советување за терапија
  • Поддршка од здравствени институции
  • Размена на искуства со други жени со МС

Заклучок

Истражувањето покажува дека мултиплата склероза не ја намалува желбата за мајчинство, но стравот и недостигот на информации често ја спречуваат реализацијата на таа желба.

Потребни се:

  • Едукативни кампањи
  • Подобра информираност
  • Проактивен пристап од здравствените работници

Со соодветна поддршка и информации, жените со МС можат да донесуваат информирани одлуки и да го остварат своето право на мајчинство.

Целосниот извештај од истражувањето е достапен тука..

За Националното здружение за МС

Национално здружение за помош и поддршка на лица со мултипла склероза – Здружение за МС е доброволно, непрофитно, невладино и непартиско здружение на граѓани, формирано заради остварување, заштита, унапредување и усогласување на правата, потребите и интересите, како и вршење на дејности и активности со цел подигање на јавната свест за мултиплата склероза. Oсновано е на 20. март 2019 година. Националното здружение е полноправна членка на Европската МС Платформа (анг. European Multiple Sclerosis Platform, EMSP), полноправна членка на Светската алијанса на пациенти  (анг. World Patient Alliance) и асоцијативна членка на Алијансата на пациентски организации (АПО).

Потребата за формирање на здружението се наметна како резултат на неопходноста за обединување на лицата со мултипла склероза, нивните семејства со цел согледување на нивните потреби и инволвирање на останати чинители заради решавање на проблемите на лицата со МС, како и подобрување на квалитетот на нивното живеење. Исто така, секојдневниот напредок во медицината, токму во областа на неврологија бара интензивирање на реформите во оваа област.

Нашата мисија и причина за постоење е искрената желба за помош и поддршка на лицата со МС и нивните негуватели, во подигнување на свеста кај јавноста и проблематиката по однос на МС, сериозен пристап, навремена дијагностика и навремен и соодветен третман со цел спречување на прогресијата и инвалидитетот, поддршка на пациентите, едукација по однос на правата на лицата со МС и промоција на нови достигнувања во медицината.

За да дознаете повеќе за здружението посетете ја веб страницата.