Извештај од искуството на пациенти со МС при преминување од IV на SC апликација на ocrelizumab
Националното здружение за мултипла склероза, во соработка со ЈЗУ Универзитетската клиника за неврологија – Скопје, Македонската Медицинска Студентска Асоцијација (ММСА) при Медицински Факултет, Универзитет „Св. Кирил и Методиј“, Скопје, спроведе истражување со цел да се процени искуството на пациентите со мултипла склероза (МС) при преминување од интравенска (IV) на поткожна (SC) апликација на терапијата ocrelizumab.
Истражувањето беше реализирано во периодот јули – декември 2025 година и опфати 93 пациенти со мултипла склероза. Резултатите покажуваат високо ниво на задоволство и значително подобрување во искуството на пациентите со новиот начин на апликација.
Голем дел од испитаниците оцениле дека поткожната апликација е подобра во споредба со претходната интравенска терапија, при што:
- над 90% од пациентите ја оценуваат како подобра или многу подобра,
- 85% пријавуваат подобрување на дневниот распоред,
- 86% истакнуваат значително намалување на времето поминато во болница,
- речиси 98% се задоволни од удобноста и практичноста на апликацијата.
Дополнително, повеќе од 90% од пациентите изразиле желба да продолжат со поткожната формулација на терапија. Како главни причини се наведуваат пократкото време за третман, поголемата удобност, намалената непријатност и зголеменото чувство на независност и контрола врз сопственото време.
Резултатите од ова истражување потврдуваат дека поткожната апликација на терапијата претставува значајна иновација во третманот на мултипла склероза, која не само што го олеснува пристапот до терапија, туку и придонесува за подобар квалитет на живот на пациентите.
Националното здружение за мултипла склероза останува посветено на унапредување на третманот, поддршката и правата на лицата со МС, преку соработка со здравствени институции и континуирано следење на потребите на пациентите.
Целосниот извештај од истражувањето е достапен во тука.
За Националното здружение за МС
Национално здружение за помош и поддршка на лица со мултипла склероза – Здружение за МС е доброволно, непрофитно, невладино и непартиско здружение на граѓани, формирано заради остварување, заштита, унапредување и усогласување на правата, потребите и интересите, како и вршење на дејности и активности со цел подигање на јавната свест за мултиплата склероза. Oсновано е на 20. март 2019 година. Националното здружение е полноправна членка на Европската МС Платформа (анг. European Multiple Sclerosis Platform, EMSP), полноправна членка на Светската алијанса на пациенти (анг. World Patient Alliance) и асоцијативна членка на Алијансата на пациентски организации (АПО).
Потребата за формирање на здружението се наметна како резултат на неопходноста за обединување на лицата со мултипла склероза, нивните семејства со цел согледување на нивните потреби и инволвирање на останати чинители заради решавање на проблемите на лицата со МС, како и подобрување на квалитетот на нивното живеење. Исто така, секојдневниот напредок во медицината, токму во областа на неврологија бара интензивирање на реформите во оваа област.
Нашата мисија и причина за постоење е искрената желба за помош и поддршка на лицата со МС и нивните негуватели, во подигнување на свеста кај јавноста и проблематиката по однос на МС, сериозен пристап, навремена дијагностика и навремен и соодветен третман со цел спречување на прогресијата и инвалидитетот, поддршка на пациентите, едукација по однос на правата на лицата со МС и промоција на нови достигнувања во медицината.
За да дознаете повеќе за здружението посетете ја веб страницата.