Шест вежби за проблеми со мочниот меур кај лицата со МС инспирирани од физикалната терапија

Проблемите со контрола на мочниот меур не се едноставни за секој кој се соочил со нив и се мошне непријатна тема за разговор. Иако можеби се чувствувате како да сте единствени со ваков проблем, реалноста е дека многу луѓе доживуваат одредена тешкотија со контролата на мочниот меур.

Според една студија објавена во списание за урологија, околу 51% од жените и 14% од мажите страдаат од уринарна инконтиненција, дефинирана како губење на контрола на мочниот меур или протекување на урина.

Протекување на урина е еден вид на проблем поврзан со контролата на мочниот меур но, не е и единствен. Подеднакво тешко, а во некои случаи и позначајно за целокупното здравје е нецелосното празнење на мочниот меур. Овој проблем може да доведе до зачестено уринирање, будење ноќе и неквалитетно спиење, протекување на урина и зголемен ризик од уринарни инфекции.

Околу 80% од луѓето кои живеат со мултипла склероза (МС) во одреден период страдаат од протекување и тешкотии со празнењето на мочниот меур.

На кој начин може да помогне физикалната терапија на карличните мускули?

Иако е можеби тешко да се разговара за оваа медицинска состојба, неопходно  е да се обрати внимание на овој проблем за полесно да се справите со него. За среќа, има достапна помош.

Физикалната терапија на карличните мускули, како специјализирана област за нега, може да помогне. Овој вид физикална терапија се фокусира на помошта на пациентите да постигнат подобра функција на мочниот меур преку едукација и совладување нови вештини за зацврстување на карличните мускули.

Долниот дел на карлицата е составен од група на мускули во форма на висечка лежалка (хамак), кои го сочинуваат дното на карлицата. Овие мускули имаат многу важни функции за мочниот меур, вклучувајќи:

• потпора на мочниот меур, внатре во карлицата;
• придонесуваат за контролата, така што го држат излезот на мочниот меур затворен;
• помагаат при празнење на мочниот меур, така што го отвораат излезот;
• помагаат да се контролира итноста за празнење преку комуникација со мозокот и мочниот меур;
• сигнализираат на мочниот меур да остане воздржан додека не стигнете до тоалетот.

Шест вежби за подобра контрола на мочниот меур

За среќа, постојат вежби пропишани од стручни физиотерапевти, кои вежби вежби можат успешно да помогнат во подобрувањето на контролата на мочниот меур со зацврстување на мускулатурата во долниот предел на карлицата.

Овие шест вежби се создадени за да ги стимулираат мускулите на карлицата и со тоа да помогнат во нивно зацврстување и поголема контрола. Вежбите се создадени така што се прилагодени од полесна кон потешка, па така најдобро би било да почнете од првата и откако ќе ја совладате и усовршите да продолжите со следната.

Длабоко дишење на стомак

1. Започнете ја оваа вежба во удобна положба, можеби во столица лежалка или лежејќи на вашиот кауч (внимавајте да не заспиете, бидејќи оваа вежба може да биде многу релаксирачка).
2. Поставете ги рацете на долниот дел од половината. Земете длабок здив, и дозволете му на стомакот да се наполни сè до клучната коска.
3. Издишете преку устата полека и целосно.
4. Откако ќе го испразните воздухот, задржете така и можете да забележите дека стомачните мускули и мускулите на карлицата нежно се застегаат.
5. Задржете околу 3 секунди.
6. Опуштете се и повторете ја вежбата 3 до 5 пати.

Оваа вежба можете да ја повторувате се додека се чувствувате пријатно но, сепак препорачано е три до пет пати дневно.

Оваа вежба помага да се разбудат мускулите во внатрешноста на стомакот, вклучувајќи ги и карличните мускули. Исто така, може да помогне во смирување на нервниот систем, а тоа може да помогне при симптоми на хиперактивен мочен меур.

Кегелови вежби

1. Пронајдете удобна положба. Најдобро е да започнете во лежечка или полу седечка положба.
2. Опуштете се и насочете го вниманието кон мускулатурата на долниот дел на карлицата.
3. Нежно вовлечете ги мускулите на внатре. За таа цел треба да ги користите мускулите кои не дозволуваат протекување на урината. Можете да почувствувате како се вовлекува долниот дел на стомакот (под папокот) но, затегањето на мускулите би требало да започне во долниот дел на карлицата.
4. Опуштете ги мускулите и ќе почувствувате како се затегаат и издолжуваат.

Започнете со вовлекување и задржете 3 секунди, потоа отпуштајте од 4 до 10 секунди. Колку пати можете да ја повторите вежбата, а притоа сè уште да чувствувате повлекување нагоре и ослободување надолу? 10, 15, 20 пати? Утврдете динамика и започнете ја вежбата на тој начин. Препорачано е вежбата да ја повторувате не повеќе од 20 пати, два пати во текот на денот.

Кегеловите вежби се основата на сите вежби кај физикалната терапија во пределот на карлицата. Но, може да биде сложено да откриете дали ги правите правилно затоа што не се забележува никакво движење. Ако ви е тешко да ја почувствувате оваа мускулна контракција, тогаш продолжете на следните вежби и откако по неколку недели ќе ги усовршите повторно вратете се на оваа вежба.

Стискање топка

1. Започнете во седечка положба или легнати со колената свиткани нагоре.
2. Ставете мала мека топка меѓу коленатa (од 25 до 40цм оддалечени), притискајте ја топката со нозете, и вовлечете ги мускулите на долниот дел на карлицата нагоре и навнатре (Кегелови вежби)
3. Задржете 3 секунди, а потоа опуштете се 3 секунди.
4. Повторете 5 до 10 пати, но не повеќе од 25 пати одеднаш.

Влечење лента за вежбање

1. Започнете во седечка положба или легнати со колената свиткани нагоре.
2. Ставете лента за вежбање околу бутовите.
3. Раздвојте ги колената. Останете така 3 секунди, а потоа опуштете се 3 секунди.
4. Повторете 5 до 10 пати, но не повеќе од 25 пати одеднаш.

Навалување на карлицата и карлична мускулатура

1. Започнете во лежечка положба на грб, со свиткани колена
2. Земете длабок здив во стомакот, издишете и обидете се да забележите како се во функција внатрешните мускули во стомакот и мускулите на карлицата.
3. Задржете ја оваа нежна контракција (без задржување на здивот) додека го израмнувате долниот дел на грбот и нежно ја навалувате карлицата нагоре.
4. Задржете 2 до 3 секунди, опуштете се и потоа почнете одново.
5. Повторете 5 до 10 пати, но не повеќе од 20 до 25 пати одеднаш.

Мост плус карлична мускулатура

1. Започнете во лежечка положба на грб, со свиткани колена
2. Земете длабок здив во стомакот, издишете и обидете се да забележите како се во функција внатрешните мускули во стомакот и мускулите на карлицата.
3. Задржете ја оваа нежна контракција (без задржување на здивот) додека ги поткревате колковите од подот.
4. Задржете 3 секунди, опуштете се, и потоа почнете одново.
5. Повторете 5 до 10 пати, но не повеќе од 20 до 25 пати одеднаш.

Немојте да претерате

Како и во секоја програма за вежбање потребно е да си дадете време додека ги разработите вежбите. Ниту една од овие вежби не би требало да предизвикаат болка но, тоа може да се случи доколку претерате.

Бавно и стабилно до победа!

Извор: https://www.healthline.com/health/multiple-sclerosis/physical-therapy-exercises-for-ms-bladder-problems#Dont-overdo-it

Забелешка: Рубриката „Најнови информации“ е дел наменет исклучиво за вести и информации на оваа веб страница за оваа болест. Не обезбедува медицински совет, дијагноза или третман. Оваа содржина не е наменета да биде замена за професионален медицински совет, дијагноза или третман. Секогаш побарајте совет од Вашиот лекар или друг квалификуван здравствен работник за било какви прашања што може да ги имате во врска со здравствената состојба. Никогаш не занемарувајте  ги или одложувајте професионалните медицински совети поради тоа што сте го прочитале на оваа веб страница. Мислењата изразени во оваа рубрика не секогаш се мислења на Националното здружение за МС и наменети се да предизвикаат дискусија за прашања кои се однесуваат на мултипла склероза.