Eдукативни материјали за лицата со мултипла склероза и членовите на нивните семејства
Националното здружение за МС во соработка со фармацевтската компанија Biogen и стручни лица – невролози од Универзитетската Клиника за неврологија, реализираше шест едукативни материјали наменети за лицата со мултипла склероза (МС) и лицата кои се грижат за нив.
На ред се две брошури од кои голема полза ќе имаат идните мајки и татковци со МС и нивните партнери.
Формирањето семејство може да биде голем чекор во животот на едно лице, без оглед кој и да сте. Сепак, доколку кај вас е поставена дијагноза МС, може да предизвика дополнителни прашања во врска со планирањето на семејството.
Брошурата „МС и планирање семејство – За луѓе дијагностицирани со МС“, ви дава совет за започнување или проширување на вашето семејство за многуте луѓе кои живеат со МС.
Формирањето или проширувањето на семејството може да биде голем чекор во животот на едно лице. Сепак, започнување семејство со партнер кој има МС може да ви отвори дополнителни прашања. Брошурата „МС и планирање семејство – За партнери на лица со МС“ ви дава совети за започнување или проширување на вашето семејство со партнер кој боледува од МС.
Брошурите се поставени на официјалната веб страна на Националното здружение за МС во делот публикации, воедно ќе бидат достапни и во печатена форма на Клиниката за неврологија – Скопје од каде сите заинтересирани лица ќе можат да подигнат примерок.
Националното здружение за МС е целосно посветено и се грижи за доброто на лицата со МС, трудејќи се со своите активности да ги опфати сите аспекти кои влијаат на подобрување на животот на лицата со МС, а воедно и полесно справување со секојдневните предизвици кои ги носи оваа хронична болест.
ЗА НАЦИОНАЛНОТО ЗДРУЖЕНИЕ ЗА МС
Национално здружение за помош и поддршка на лица со мултипла склероза – Национално здружение за МС е доброволно, непрофитно, невладино и непартиско здружение на граѓани, формирано заради остварување, заштита, унапредување и усогласување на правата, потребите и интересите, како и вршење на дејности и активности со цел подигање на јавната свест за мултиплата склероза. Oсновано е на 20. март 2019 година. Националното здружение е полноправна членка на Европската МС Платформа (анг. European Multiple Sclerosis Platform, EMSP), полноправна членка на Светската алијанса на пациенти (анг. World Patient Alliance) и асоцијативна членка на Алијансата на пациентски организации (АПО).
Потребата за формирање на здружението се наметна како резултат на неопходноста за обединување на лицата со мултипла склероза, нивните семејства со цел согледување на нивните потреби и инволвирање на останати чинители заради решавање на проблемите на лицата со МС, како и подобрување на квалитетот на нивното живеење. Исто така, секојдневниот напредок во медицината, токму во областа на неврологија бара интензивирање на реформите во оваа област.
Нашата мисија и причина за постоење е искрената желба за помош и поддршка на лицата со МС и нивните негуватели, во подигнување на свеста кај јавноста и проблематиката по однос на МС, сериозен пристап, навремена дијагностика и навремен и соодветен третман со цел спречување на прогресијата и инвалидитетот, поддршка на пациентите, едукација по однос на правата на лицата со МС и промоција на нови достигнувања во медицината.