Поддршка од министерот за здравство на пациентите со мултипла склероза
Скопје, 20.09.2019 година
Националното здружение за помош и поддршка на лица со мултипла склероза информира дека денес претставници на здружението одржаа состанок со министерот за здравство, доц. д-р Венко Филипче. Во тек на состанокот, разговараа за актуелните потреби и грижата за пациентите со мултипла склероза (МС) кај нас. Националното здружение му се заблагодари на министерот за здравство и неговиот тим за континуираната грижа за пациентите со мултипла склероза како и унапредувањето на квалитетот на живот, пред сè поради зголемување на достапноста на лекови за мултипла склероза. Според податоците од ЈЗУ Универзитетската клиника за неврологија, Скопје во октомври 2017 година имало 362 пациенти на терапија, додека денес се вкупно 516 пациенти, а тоа е раст на бројот на пациенти на третман за 42%. (Слика 1.)
Поради тоа, Националното здружение му врачија благодарница на министерот за здравство за континуираната грижа за пациентите и унапредувањето на квалитетот на живот, пред сè поради зголемување на достапноста на лековите за мултипла склероза.
Но и покрај евидентниот напредок во грижата за пациентите со мултипла склероза, ние не застануваме тука, ќе продолжиме во интерес на подобрување на животот на пациентите со мултипла склероза кај нас. Исто така го информиравме министерот за нашите идни планирани активности, „Национални денови за МС“, и го поканивме да земе активно учество. Министерот даде поддршка за сето она што го правиме и изрази спремност да ни помогне во унапредување на квалитетот на живот на пациентите со МС и нивните семејства. Ова го сметаме како позитивен сигнал дека пациентите се секогаш во фокусот на заложбите на министерството и дека во иднина ќе се решат дел од нашите проблеми и потреби.
За Националното здружение за МС
Национално здружение за помош и поддршка на лица со мултипла склероза – Национално здружение за МС е доброволно, непрофитно, невладино и непартиско здружение на граѓани, формирано заради остварување, заштита, унапредување и усогласување на правата, потребите и интересите, како и вршење на дејности и активности со цел подигање на јавната свест за мултиплата склероза. Oсновано е на 20. март 2019 година.
Потребата за формирање на здружението се наметна како резултат на неопходноста за обединување на лицата со мултипла склероза, нивните семејства со цел согледување на нивните потреби и инволвирање на останати чинители заради решавање на проблемите на лицата со МС, како и подобрување на квалитетот на нивното живеење. Исто така, секојдневниот напредок во медицината, токму во областа на неврологија бара интензивирање на реформите во оваа област.
Нашата мисија и причина за постоење е искрената желба за помош и поддршка на лицата со МС и нивните негуватели, во подигнување на свеста кај јавноста и проблематиката по однос на МС, сериозен пристап, навремена дијагностика и навремен и соодветен третман со цел спречување на прогресијата и инвалидитетот, поддршка на пациентите, едукација по однос на правата на лицата со МС и промоција на нови достигнувања во медицината.
Повеќе за здружението на http://msmakedonija.eu.org/za-nas.