Новини од конгресот на ECTRIMS 2019
Скопје, 19. септември 2019 година
Од 11 до 13 септември оваа година, се одржа најголемата светска конференција посветена на клиничките истражувања во мултипла склероза, ECTRIMS (Еuropean Committee for Treatment and Research in Multiple Sclerosis). Во престолнината на Шведска, Стокхолм, присуствуваа 9.361 делегати од 100 земји кои дискутираа за новитетите и достигнувања во превенција, дијагностика, третман и следење на пациентите со мултипла склероза.
Пристапете подолу на видеото за да ја почувствувате атмосферата која владеела на овогодинешниот конгрес на ECTRIMS.
Како и што се очекуваше, во тек на 94 сесии од кои 2 за медицински сестри, презентирани биле доста интересни податоци и новости кои се очекува во иднина да го унапредат разбирањето за МС и квалитетот на живот на пациентите со мултипла склероза.
Меѓу 1.893 прифатени абстракти, 1.316 постери ви прикажуваме селекција од 10 новитети кои се од наш интерес:
1. Која е крајната клиничка цел во грижата за МС? ,,Да се менаџира активноста на болеста со цел зачувување на мозочната функција и намалување на ризикот од влошување на инвалидитетот”.
2. Податоци од клиничките студии кои се изведуваат кај пациенти со МС со години, покажале дека пациентите кои започнале со третман рано (веднаш после откривање на болеста) имаат подобар квалитет на живот и живеат подолго во споредба со пациентите кои започнале со третман подоцна.
3. Долгорочните податоци собрани во период од 6 години за лекот ocrelizumab продолжуваат да покажуваат конзистентни исходи на ефикасност и безбедност кај лекуваните пациенти. Податоците ја потврдуваат ефикасноста преку редукција на прогресијата на инвалидитетот кај релапсните форми на МС и примарно прогресивната МС.
4. Долгорочните податоци покажаа дека dimethyl fumarate ја одржал својата безбедност и ефикасност кај пациентите со релапсна-ремитентна мултипла склероза и после 10 години од неговото одобрување. Податоците покажаа дека околу половина од пациентите немале релапси во тек на овој период, додека 64% од пациентите немале прогресија на болеста.
5. Во постер со наслов „Extended interval dosing of natalizumab shows comparable efficacy to standard interval dosing starting from the second year of treatment“, Д-р Ruggieri S. презентираше дека водени од мотивот да се намали ризикот за појава на прогресивна мултифокална леукоенцефалопатија (ПМЛ) кај пациенти кои примаат natalizumab предложиле да се премине од стандардно дозирање на секои 4 недели на дозирање со продолжен интервал на секои 6 недели. Ефективноста на овој нов интервал на дозирање сè уште е дискутабилна но податоците покажале дека ефикасноста на natalizumab не се намалила на 2-та година или повеќе, но стандардното дозирање било поефикасно од новиот начин во тек на првата година.
6. Податоци од студија која трае повеќе од 6,5 години, покажа дека пациентите со примарно прогресивна МС кои започнале рано со третман со ocrelizumab имаат за 42% помал ризик за потреба од инвалидска количка. Колку порано се започне со третман толку помал е ризикот за прогресија на болеста.
7. Студија кај пациентите со секундарно прогресивна МС, кои обично имаат голема оневозможеност и потреба од инвалидска количка, покажала дека лекот siponimod им помогнал на пациентите да ја задржат својата мобилност во просек за повеќе од 4 години за разлика од пациентите кои примале плацебо.
8. Во тек на симпозиум, Д-р Giovannoni G. од Велика Британија изјавил дека „Јас сметам дека секундарно прогресивната МС и релапсно-ремитентната МС не се различни болести”. Докторот мисли дека овие се една болест, но дека фармацевтските компании ги поделиле со цел да се одобри лек во САД. Очекуваме истражувањата и разбирањето за МС да се зголемуваат кои ќе го потврдат или негираат овој личен став.
9. Д-р Fitzgerald во презентацијата ,,Serum neurofilament light chain is associated with MS outcomes and comorbidity in a large population of people with multiple sclerosis” презентираше податоци од редовна рутинска пракса кои покажале дека лесните ланци на неврофиламентот може да бидат нов биомаркер кој би се користел за мониторирање на болеста и одредување на ризикот за прогресија кај МС.
10. Д-р McGuigan во презентацијата со наслов „Determinants of clinical outcomes for patients with Natalizumab-associated progressive multifocal leukoencephalopathy“ покажал дека преживувањето после ПМЛ (прогресивна милтифокална леукоенцефалопатија) е со подобар исход кај помлади пациенти, без симптоми, со локализирани мозочни лезии и понизок титар на ЈС вирус. Ова ја потврдува важноста од редовни и чести контроли кај JCV+ пациенти кои примаат лекови кои имаат ризик за ПМЛ.
Со големо внимание ќе продолжиме да ги следиме сите стручни настани на кои се презентираат нови податоци за мултиплата склероза со надеж дека многу наскоро ќе ве информираме дека е постигнат неворојатен успех кој ќе овозможи излекување на оваа болест.
Благодарност до членовите на Медицинскиот/стручен одбор при Националното здружение за помош и поддршка на лица со мултипла склероза – Национално здружение за МС за прегледот и споделувањето на новините од конгресот.
Забелешка: Рубриката „Најнови информации“ е дел наменет исклучиво за вести и информации на оваа веб страница за оваа болест. Не обезбедува медицински совет, дијагноза или третман. Оваа содржина не е наменета да биде замена за професионален медицински совет, дијагноза или третман. Секогаш побарајте совет од Вашиот лекар или друг квалификуван здравствен работник за било какви прашања што може да ги имате во врска со здравствената состојба. Никогаш не занемарувајте ги или одложувајте професионалните медицински совети поради тоа што сте го прочитале на оваа веб страница. Мислењата изразени во оваа рубрика не секогаш се мислења на Националното здружение за МС и наменети се да предизвикаат дискусија за прашања кои се однесуваат на мултипла склероза.