Пријавување на несакани реакции од лек
Пријавувањето на несакани реакции од лековите е основен метод за постмаркетиншко следење на лекот со кој се добиваат нови сознанија за неговиот безбедносен профил и основа на националниот систем за фармаковигиланца.
Несаканите реакции од лековите задолжително се пријавуваат во Агенцијата за лекови и медицински средства (МАЛМЕД) од страна на здравствени работници (лекар, фармацевт, стоматолог, медицинска сестра), пациенти, носители на одобренијата за лекови, производители на лекови, веледрогерии и спонзори на клинички истражувања или нивни овластени претставници.
Ефикасноста и успехот на националната програма за следење на безбедноста на лековите директно зависи од активното учество на здравствените работници и пациентите во пријавувањето на суспектните несакани реакции.
Пациентите или корисниците на лекови можат директно да пријават сомнеж за несакана реакција на лек до Агенцијата за лекови и медицински средства на следниов линк.
Пријавите од страна на пациентите се особено драгоцен извор на информации бидејќи пациентите понекогаш побрзо ја препознаваат поврзаноста на несакани реакции со примената на лекот, а и нивните пријави вообичаено содржат повеќе информации и детален опис на симптомите.
Со пријавување на несаканите реакции, пациентите директно допринесуваат во унапредувањето на сигурната примена на лекот.
Здравствените работници преку нивната секојдневна професионална пракса се наоѓаат во позиција да можaт да ги иденификуваат и да ги пријават несаканите реакции на лековите кои се наоѓаат во промет. Тие треба да ги пријавуваат несаканите реакции и сомнежот за нивно појавување, дури и кога не постојат сигурни докази дека тие се причинско-последично поврзани со примената на лекот, со цел заштита на здравјето на пациентите.
Минимум елементи потребни за валидно пријавување
- пациент (иницијали, возраст, пол)
- лице кое пријавува (контакт информации: адреса, телефон, е-маил адреса)
- несакан настан (опис на несаканиот настан)
- производ – име на лек (заштитено име и сериски број)
Според препораките на Светската здравствена организација во врска со фармаковигиланцата на биолошките лекови покрај задолжителните елементи потребно е да се има податоци за заштитеното име на лекот како и неговиот сериски број како би можело да се обезбеди следење на биолошките лекови.
Пријавете несакан настан иако некој од овие елементи недостасува!