За прв пат, Македонија дел од Atlas of MS
Скопје, 19. септември 2020 г.
Националното здружение за помош и поддршка на лица со мултипла склероза ве информира дека е објавено најновото издание на Атласот на МС (Altas of MS). Ни претставува огромна чест и задоволство, што благодарение на Националното здружение за МС и помош и поддршка од страна на ЈЗУ Универзитетската клиника за неврологија – Скопје, за прв пат нашата земја е дел од најобемната студија за епидемиологија на мултипла склероза (МС) и глобалната достапност и пристап до ресурси за лицата со МС.
Што е Атласот на МС?
Првиот Атлас на МС беше објавен во 2008 година како заеднички проект на Интернационалната МС федерација (MSIF) и Светската здравствена организација и беше еден од најпознатите глобално цитирани ресурси за МС. Изданието од 2013 година имаше за цел да ги ажурира податоците и беше искористено за информирање на иницијативите за истражување, како и за кампањи и застапување. Ова 3-то издание е во два дела:
Дел 1: Епидемиологија чиј фокус е на бројот на луѓе со МС, како истиот варира низ целиот свет, како и на демографските податоци како што се возраста и полот.
Дел 2: Клиничко управување со МС чиј фокус е на клиничкиот менаџмент на МС и дава посебен акцент на бариерите за пристап до здравствена заштита и третман со лекови кои ја модифицираат болеста.
Атласот на МС има за цел да ги обедини сите достапни информации за епидемиологијата на МС и пристапот до здравствената заштита во сет на податоци со отворен извор. Ова ни дава можност за појасно разбирање на товарот на болеста и ни дава корисни согледувања за тоа како таа варира низ целиот свет.
Информациите во Атласот на МС можат да бидат моќна алатка за застапување, подигнување на свеста за недостаток на соодветни ресурси на располагање за дијагностицирање, информирање, лекување, рехабилитација и поддршка на луѓето со МС ширум светот.
Атласот на MС е моќна алатка за пациентските организации за MС и за здравствените власти бидејќи нуди преглед каде треба да се насочат идните промени во политиките со цел отстранување на пречките на луѓето со мултипла склероза и нивните семејства во поглед на унапредување на квалитетот на живот. Исто така, податоците се начин да се насочи вниманието на оваа хронична болест, со цел да се зголеми свеста и разбирањето на МС низ целиот свет.
Клучни податоци
- бројот на луѓе со МС низ целиот свет е зголемен од 2,3 милиони во 2013 г. на 2,8 милиони во 2020 година
- ширум светот, 1 лицe на секои 3.000 лица има мултипла склероза
За повеќе податоци превземете го извештајот или целата база на податоци ако сакате да направите своја анализа споредувајќи повеќе земји.
ЗА НАЦИОНАЛНОТО ЗДРУЖЕНИЕ ЗА МС
Национално здружение за помош и поддршка на лица со мултипла склероза – Национално здружение за МС е доброволно, непрофитно, невладино и непартиско здружение на граѓани, формирано заради остварување, заштита, унапредување и усогласување на правата, потребите и интересите, како и вршење на дејности и активности со цел подигање на јавната свест за мултиплата склероза. Oсновано е на 20. март 2019 година. Од 7. мај 2020 година, Националното здружение е полноправна членка на Европската МС Платформа (анг. European Multiple Sclerosis Platfrom, EMSP).
Потребата за формирање на здружението се наметна како резултат на неопходноста за обединување на лицата со мултипла склероза, нивните семејства со цел согледување на нивните потреби и инволвирање на останати чинители заради решавање на проблемите на лицата со МС, како и подобрување на квалитетот на нивното живеење. Исто така, секојдневниот напредок во медицината, токму во областа на неврологија бара интензивирање на реформите во оваа област.
Нашата мисија и причина за постоење е искрената желба за помош и поддршка на лицата со МС и нивните негуватели, во подигнување на свеста кај јавноста и проблематиката по однос на МС, сериозен пристап, навремена дијагностика и навремен и соодветен третман со цел спречување на прогресијата и инвалидитетот, поддршка на пациентите, едукација по однос на правата на лицата со МС и промоција на нови достигнувања во медицината.