Хормони и МС: разлики помеѓу мажите и жените
МС е почеста кај жените отколку кај мажите, така што овој истражувачки труд е преглед на доказите за тоа како полот и хормоните можат да влијаат на МС.
Истражувањето идентификува неколку разлики во МС помеѓу мажите и жените. На пример, мажите имаат поголема веројатност да развијат примарна прогресивна МС и имаат посериозни когнитивни симптоми. Се зголемува процентот на жени кои развиваат МС, а витаминот Д се покажа дека има поголем ефект врз имунолошкиот систем кај жените со МС отколку кај мажите.
Бременоста, исто така, има големо влијание врз МС кај женite, со помала активност на МС за време на бременоста и зголемен ризик од релапс во месеците по породувањето.
Сите овие докази укажуваат на важната улога на половите хормони кај МС. Важно е да се разбере што се случува, и да се разберат ефектите што ги имаат хормоните врз имунолошкиот систем, особено за време на бременоста. Ова би можело да помогне да се развијат нови стратегии за третман на МС, како што е лекувањето на мажите и жените со различни третмани, бидејќи тие би можеле различно да реагираат на одредени терапии.
Позадина
Се смета дека МС е автоимуна состојба бидејќи имунолошкиот систем ја напаѓа миелинската обвивка на нервите во централниот нервен систем. Исто како и многу други автоимуни состојби, МС се јавува почесто кај жените отколку кај мажите и процентот на жени со МС се зголемува. Поради оваа родова разлика, ефектот на половите хормони врз МС е област на интерес за научниците.
Како е спроведена оваа студија?
Овој истражувачки труд е преглед на доказите за тоа како полот и хормоните можат да влијаат на МС.
Што беше откриено?
Истражувањето откри։
Разлики меѓу половите
- МС е почеста кај жените отколку кај мажите, а истражувањата покажуваат дека процентот на жени со МС се зголемува.
- Се чини дека жените со МС имаат повеќе воспалителни лезии (откриени на скенирање со МР) од мажите.
- Мажите имаат поголем ризик за развој на примарна прогресивна МС.
- Се чини дека мажите имаат повеќе невродегенерации, а жените помалку. Ова може да се должи на повисоките нивоа на естроген кај жените бидејќи некои студии покажаа дека е невропротективен.
- Се чини дека мажите имаат посериозни когнитивни симптоми од жените.
- Мажите и жените кај кои МС се развила подоцна (дијагностицирана по 50-годишна возраст) имаат многу сличен тек на МС. Ова може да се должи на хормонските промени кои се случуваат за време на менопаузата, што ги прави хормонските разлики меѓу мажите и жените помалку екстремни.
- Се покажа дека витаминот Д има поголем ефект врз имунолошкиот систем кај жените со МС отколку кај мажите.
Влијание на бременоста
- Бременоста е поврзана со помал ризик од доживување на релапс, особено во втората половина од бременоста. За време на бременоста имунолошкиот систем се менува, така што телото на мајката не го отфрла плодот што го носи. Овие промени значат намалување на имунолошките клетки поврзани со автоимуни состојби како МС, и создавање на други типови на имунолошки клетки. Многу од овие промени веројатно се поврзани со хормонските промени што се случуваат за време на бременоста, вклучително и хормоните произведени од плацентата.
- Постои зголемен ризик од релапс по породувањето, особено во првите три месеци. Причините за ова не се целосно јасни, но може да се должат на наглите промени во хормоните, како што е голем пад на естрогенот, а исто така и имунолошкиот систем се враќа во својата вообичаена состојба.
- Нема докази дека породувањето влијае на подолготрајниот тек на МС кај жените.
Други фактори
- Се чини дека прекумерната тежина, или дебелина, го зголемува ризикот од развој на МС. Ова може да се должи на хормоните како што е лептинот, кој е присутен на повисоки нивоа кај луѓето со прекумерна тежина. Има сличен хемиски состав како имунолошкиот систем и се покажа дека има влијание врз воспаленијата. Кај лицата со МС е откриено повисоко ниво на лептин, во споредба со оние кои немаат МС.
Што значи ова?
Научниот труд заклучува дека е важно да се разбере што се случува и да се разберат ефектите што ги имаат хормоните врз имунолошкиот систем и автоимуните состојби. Од особен интерес е да се открие што се случува за време на бременоста кога активноста на МС се намалува. Ова би можело да помогне при изборот на третмани бидејќи мажите и жените би можеле различно да реагираат на одредени терапии, а може дури и да обезбеди начин за користење на хормоните како третман, како што во помали студии некои истражувачи веќе се обиделе.
Повеќе за хормоните, полот и МС
Кај кого, и зошто се разва МС е сложена тема, но во моментов таа се јавува три пати повеќе кај жените отколку кај мажите, и истражувањата покажуваат дека процентот на жени со МС се зголемува.
Причините зошто МС генерално е почеста кај жените сѐ уште не се целосно јасни. За да се обидеме да откриеме зошто, постои активна област на истражување околу хормоните, бидејќи односот на мажите и жените на кои им е дијагностицирана МС е еднаков пред пубертетот и по менопаузата, кога хормоналните разлики не се толку екстремни. Дополнително, многу жени со МС откриваат дека состојбата се менува околу периодот на месечниот циклус, за време на бременоста и во менопаузата кога нивото на хормоните се менува. Некои научници почнаа да ја разгледуваат улогата на половите хормони како потенцијални третмани за МС, поттикнати од некои студии кои сугерираат дека тие би можеле да имаат антиинфламаторно и невропротективно дејство.
Како што покажува ова истражување, иако можеме да ги видиме разликите во МС помеѓу мажите и жените, потребни се повеќе, и пообемни истражувања за да се утврди дали хормоните се причина за разликите меѓу половите и ако е така, какви специфични ефекти имаат хормоните врз имунолошкиот систем.
Забелешка: Овој текст има информативен карактер и не обезбедува медицински совет, дијагноза или третман. Оваа содржина не е наменета да биде замена за професионален медицински совет, дијагноза или третман. Секогаш побарајте совет од Вашиот лекар или друг квалификуван здравствен работник за било какви прашања што може да ги имате во врска со здравствената состојба. Никогаш не занемарувајте ги или одложувајте професионалните медицински совети поради тоа што сте го прочитале на оваа веб страница. Мислењата изразени не секогаш се мислења на Националното здружение за МС и наменети се да предизвикаат дискусија за прашања кои се однесуваат на мултипла склероза.