Започна да се спроведува истражувањето на квалитетот на живот
Скопје, 27. јануари 2020 година
Почитувани,
Националното здружение за помош и поддршка на лица со мултипла склероза информира дека од 22. јануари 2020 година започна спроведувањето на нов проект со наслов „Проспективно истражување на квалитетот на живот на лицата со мултипла склероза во Република Северна Македонија“. Истражувањето има за цел да го прикаже квалитетот на живот на пациентите со мултипла склероза (МС) во нашата држава.
Проектот е на иницијатива на Националното здружение за МС во соработка со Македонската медицинска студентска асоцијација (ММСА) и членови на Медицинскo/стручниот одбор при Националното здружение за МС во чии редови спаѓаат истакнати невролози од ЈЗУ Универзитетската клиника за неврологија во Скопје, помогнато од фармацевтската компанија Рош Македонија ДООЕЛ Скопје. Во истражувањето кое ќе се спроведува до април 2020 година се користи валидиран прашалник за испитување на квалитет на живот на лицата со МС, MSQOL-54. Планирано е да бидат опфатени голем број на лица со мултипла склероза со цел прибирање и добивање на релевантни и веродостојни податоци кои би биле неопходни за успешна реализација на овој проект.
Спроведувањето на овој проект е од круцијално значење за лицата со МС, за здравствените работници и власти, бидејќи согласно добиените податоци, Националното здружение за МС заедно со сите релевантни чинители би ја насочило својата работа и дејствување кон подобрување на оние сегменти кои ќе се покажат како најкритични.
Планиранo е резултатите од истражувањето да бидат публикувани и презентирани на Интернационалниот медицински научен конгрес во организација на ММСА во мај 2020 година.
Што е мултипла склероза?
Мултипла склероза (МС) е една од најчестите невролошки нарушувања и причини за инвалидитет кај младите возрасни лица. Тоа е хронична, прогресивна, имунолошки посредувана, воспалителна и дегенеративна болест на централниот нервен систем. Настанува кога имуниот систем ја напаѓа обвивката на нервните клетки (миелин) во мозокот, ’рбетниот мозок и оптичките нерви, предизвикувајќи воспаление и последователна дегенерација, што води до прекин на невротрансмисијата на сигналот од една нервна клетка до друга.
Во Македонија од МС боледуваат околу 1.500 лица додека во светот има повеќе од 2,3 милиони лица. Многу е веројатно дека стотици илјади лица остануваат недијагностицирани и многу животи се индиректно зафатени. Повеќето лица со МС се дијагностицираат на возраст од 20 до 40 година, и околу два-три пати почесто се дијагностицираат жени наспроти мажи.
Причината за МС сеуште не е позната и до сега не постои лек, но постојат лекови кои можат да им помогнат на лицата со МС да ја стават болеста под контрола и постојат многу опции за подобрување и управување со симптомите.
МС го прави животот непредвидлив за секого. Дознаете повеќе за мултипла склероза на следниов линк.
За Националното здружение за МС
Национално здружение за помош и поддршка на лица со мултипла склероза – Национално здружение за МС е доброволно, непрофитно, невладино и непартиско здружение на граѓани, формирано заради остварување, заштита, унапредување и усогласување на правата, потребите и интересите, како и вршење на дејности и активности со цел подигање на јавната свест за мултиплата склероза. Oсновано е на 20. март 2019 година.
Потребата за формирање на здружението се наметна како резултат на неопходноста за обединување на лицата со мултипла склероза, нивните семејства со цел согледување на нивните потреби и инволвирање на останати чинители заради решавање на проблемите на лицата со МС, како и подобрување на квалитетот на нивното живеење. Исто така, секојдневниот напредок во медицината, токму во областа на неврологија бара интензивирање на реформите во оваа област.
Нашата мисија и причина за постоење е искрената желба за помош и поддршка на лицата со МС и нивните негуватели, во подигнување на свеста кај јавноста и проблематиката по однос на МС, сериозен пристап, навремена дијагностика и навремен и соодветен третман со цел спречување на прогресијата и инвалидитетот, поддршка на пациентите, едукација по однос на правата на лицата со МС и промоција на нови достигнувања во медицината.
Повеќе за здружението на следниов линк.