Сајтот на Националното здружение за МС се закити со награда
Скопје, 17.12.2019 година
Во присуство на над 150 гости, во најголем дел создавачи, сопственици, дизајнери, автори на содржините на голем број македонски веб-сајтови, на 17.12.2019 г. во Скопје беа доделени наградите за Сајт на годината за 2019 година.
Ни претставува огромна гордост да ви обзнаниме дека на оваа престижна манифестасија Сајт на годината, Националното здружение за момош и поддршка на лица со мултипла склероза – Национално здружение за МС го освои треттото место во категоријата Сајт на невладини организации во конкуренција со триесеттина други етаблирани и реномирани невладини субјекти.
Посебна радост ни причинува фактот што токму на јубилејот 10 години Сајт на годината, сајтот на Националното здружение за МС беше препознаен од посетителите (кои придонесоа со 40% во изборот) и од стручното жири (60%), како еден од кандидатите вреден за награда.
Избор за Сајт на годината е проект во организација на дигиталната маркетинг агенција Медиа Солутионс, која е сопствeник на платформата keepaneye.mk, во партнерство со АдМедиа, со поддршка на Министерство за култура и Кожувчанка ДОО Кавадарци, кој има за цел да ги промовира, развива и поддржува интернет медиумите и севкупното интернет издаваштво во Македонија. Мисијата на оваа манифестација е да го подигне нивото на електронскиот медиумски простор во Македонија преку препознавање и наградувањае на најдобрите остварувања од разни области на електронското издаваштво и развој на интернет културата во Македонија.
Сајт на годината ги адресира сите прашања поврзани со електронскиот медиум и простор во нашата држава, низ годините прерасна во престижна манифестација, која има за цел да ги истакне, поттикне и награди најдобрите сајтови во изминатата година во повеќе категории, и да го вреднува трудот на големиот број млади и талентирани автори од повеќе области кои работат во веб издаваштвото. Карактеристично за овој натпревар е тоа што македонските интернет посетители ги номинираат и гласаат за своите омилени сајтови на сајтот на манифестацијата. Оваа година своите гласови ги дадоа речиси седум илјади интернет посетители од Македонија.
Благодариме на сите кои ја поддржаа нашата работа и ги дадоа своите гласови и воедно упатуваме посебна благодарност до стручното петчлено жири кое преку оценување на сајтовите според следните критериуми: технички параметри, дизајн, функционалност/употребливост, содржина, интерактивност и иновативност/креативност, високо го оцени нашиот труд и ги награди нашите заложби и остварувања.
Ова претставува потврда за нашата досегашна работа и дополнителен мотив за поголеми остварувања во иднина.