Формализирана на соработката со Lētz Care a.s.b.l.
По целосна реализација на донацијата со која беа обезбедени ортопедски помагала за лицата со МС и УК за Неврологија, кон средината на декември 2024 година, Националното здружение за МС потпиша Меморандум за соработка со Хуманитарната организација за медицински помагала Lētz Care a.s.b.l. од Луксембург.
Меморандумот е своевидна правна рамка со која се зацврсна тековна соработка помеѓу Хуманитарната Организација и Националното здружение заради ефиксно, континуирано и координирано дејствување во однос на развој и подобрување на секојдневието на лицата со МС. Ова подразбира соработка во насока на реализација на донација на разноврсен медицински материјал, медицинска опрема како и медицински помагала.
Во овој правен документ прецизно се регулирани и утврдени правата, обврските и принципите кои треба да се почитуваат од договорните страни, а соработката меѓу Хуманитарната Организација и Националното здружение се темели на транспарентност, разбирање и отворен дијалог.
Националното здружение за МС се стреми кон овезбедување диверзитет во услугите и продуктите кои ги нуди на своите членови, токму поради различните потреби и можности на лицата со МС, додека меморандумот претставува втемелување на соработката со правен субјект кој претставува наш сигурен стратешки партнер во остварување на целите.
За Националното здружение за МС
Национално здружение за помош и поддршка на лица со мултипла склероза – Здружение за МС е доброволно, непрофитно, невладино и непартиско здружение на граѓани, формирано заради остварување, заштита, унапредување и усогласување на правата, потребите и интересите, како и вршење на дејности и активности со цел подигање на јавната свест за мултиплата склероза. Oсновано е на 11. март 2019 година. Националното здружение е полноправна членка на Европската МС Платформа (анг. European Multiple Sclerosis Platform, EMSP), полноправна членка на Светската алијанса на пациенти (анг. World Patient Alliance), асоцијативна членка на Интернационалната федерација за МС (анг. MS International Federation) и членка на Националната Алијанса на пациентски организации (НАПО).
Потребата за формирање на здружението се наметна како резултат на неопходноста за обединување на лицата со мултипла склероза, нивните семејства со цел согледување на нивните потреби и инволвирање на останати чинители заради решавање на проблемите на лицата со МС, како и подобрување на квалитетот на нивното живеење. Исто така, секојдневниот напредок во медицината, токму во областа на неврологија бара интензивирање на реформите во оваа област.
Нашата мисија и причина за постоење е искрената желба за помош и поддршка на лицата со МС и нивните негуватели, во подигнување на свеста кај јавноста и проблематиката по однос на МС, сериозен пристап, навремена дијагностика и навремен и соодветен третман со цел спречување на прогресијата и инвалидитетот, поддршка на пациентите, едукација по однос на правата на лицата со МС и промоција на нови достигнувања во медицината.
За да дознаете повеќе за здружението посетете ја нашата веб страница.