Дали сончевата светлина може да помогне во спречување на МС кај децата?
Една студија покажа дека зголемувањето на нивото на витамин Д од изложување на сонце може да обезбеди заштита.
Додека предолгата изложеност на сончевите зраци може да ги оштети клетките на кожата и да го зголеми ризикот од рак, сончевата светлина може да има и здравствени придобивки. Студијата објавена на интернет на 8 декември, од страна на „Neurology“, списание на „American Academy of Neurology“, покажа дека кај децата и младите возрасни поминувањето повеќе време на отворено ги намалува шансите за развој на мултипла склероза (МС).
Ниската изложеност на сонце, ниската изложеност на ултравиолетово зрачење (UVR) и ниските нивоа на витамин Д веќе се добро воспоставени како фактори на ризик на животната средина за МС кај возрасни. Знаците на болеста обично се појавуваат меѓу 20 и 50 годишна возраст. Но, според „National Multiple Sclerosis Society“, 3 до 5 проценти од околу еден милион лица со МС во САД почнале да доживуваат симптоми пред 16-тата година. Кај децата со МС симптомите се многу воспалителни, и со почести релапси отколку кај возрасните.
Во ова истражување научниците од „University of California in San Francisco (UCSF)“, и „the Australian National University“ сакаа да утврдат дали кај оваа помала популација на млади луѓе со дијагностицирана МС, постои поврзаност помеѓу изложувањето на сонце и МС.
Истражувачите ги споредиле податоците од 332 учесници на возраст од 3 до 22 години, кои имале МС во просек седум месеци, и вклучиле податоци од 534 млади учесници од општата популација. Податоците од групата на деца со МС беа усогласени со податоците од контролната група врз основа на возраста и полот.
Во прашалниците пополнети од децата со МС, или од нивните родители, околу едно од пет укажале дека поминувале помалку од 30 минути дневно на отворено во текот на минатото лето. Од друга страна, само околу 6 отсто од децата кои немаат МС изјавиле дека поминуваат помалку од 30 минути на отворено дневно.
Откако ги земале предвид и другите ризици од развој на МС авторите на студијата пресметале дека оние кои дневно поминувале во просек од 30 минути до еден час на отворено, имале 52 отсто помали шанси да развијат МС од оние кои дневно поминувале во просек помалку од 30 минути на отворено.
„Познато е дека изложувањето на сонце ги зголемува нивоата на витамин Д“, рече во изјавата д-р Emmanuelle Waubant, професор на одделот за неврологија на UCSF. „Исто така, ги стимулира имунолошките клетки на кожата кои имаат заштитна улога кај болести како што е МС. Витаминот Д, исто така, може да ја промени биолошката функција на имунолошките клетки и како таков да игра улога во заштитата од автоимуни заболувања“.
Dr. Waubant и нејзините соработници, исто така истакнаа дека географската положба може да направи разлика. Тие процениле дека жителите на Florida (каде што сончевата светлина е поинтензивна) ќе имаат 21 отсто помала веројатност да развијат МС отколку жителите на New York.
За родителите загрижени за ризиците од рак на кожата од зголемената изложеност на сонце, истражувачите истакнуваат дека користењето крем за сончање не ги блокира терапевтските ефекти на сончевата светлина.
Според Waubant и нејзините соработници, иако резултатите од студијата сугерираат поврзаност помеѓу изложувањето на сонце и помал ризик од педијатриска МС, сè уште се потребни дополнителни клинички испитувања за да се утврди дали зголеменото изложување на сонце, или дополнувањето на витамин Д, може да го спречи развојот на МС или да го смени текот на болеста по дијагнозата.
Сепак, генерално авторите на студијата сугерираа дека зголемената изложеност на сончева светлина се чини дека има повеќе позитивни отколку негативни ефекти. Тие посочија и на други истражувања кои укажуваат дека изложувањето на сонце е во корелација со помали ризици во однос на Паркинсоновата болест, Алцхајмеровата болест и други видови на деменција, како и шизофренија и други автоимуни болести како дијабетес тип 1, Кронова болест и лупус.
Авторите на студијата заклучија дека „редовното изложување на сонце од најмалку 30 минути дневно во текот на летото, користејќи заштита од сонце по потреба, особено за роднините од прво колено на лицата со МС, може да биде исплатлива интервенција за намалување на инциденцата на педијатриска МС.”
Извор: https://www.everydayhealth.com/multiple-sclerosis/can-sunshine-help-prevent-ms-in-children/
Забелешка: Овој текст има информативен карактер и не обезбедува медицински совет, дијагноза или третман. Оваа содржина не е наменета да биде замена за професионален медицински совет, дијагноза или третман. Секогаш побарајте совет од Вашиот лекар или друг квалификуван здравствен работник за било какви прашања што може да ги имате во врска со здравствената состојба. Никогаш не занемарувајте ги или одложувајте професионалните медицински совети поради тоа што сте го прочитале на оваа веб страница. Мислењата изразени не секогаш се мислења на Националното здружение за МС и наменети се да предизвикаат дискусија за прашања кои се однесуваат на мултипла склероза.