ТОЧНА И НАВРЕМЕНА ПРАВНА ИНФОРМАЦИЈА – НАЈБЕЗБЕДЕН ПАТ ДО ВАШИТЕ ПРАВА
![](https://msmakedonija.eu.org/wp-content/uploads/2022/08/Komisija-za-propisi-i-pravni-prasanja-slika-1.jpg)
Животот со мултипла склероза често е исполнет со предизвици кои се поврзани со остварување на специфични права на пациентите, односно нивните семејства. Токму заради тоа Националното здружение за МС своите активност ги насочува на едукација на лицата со МС и останатите наши подржувачи. Овозможувајќи достапност на сите правни прописи на
едноставен и брз начин, како и нивно постојано усогласување со сите
тековни измени, се трудиме да ја подигнеме правната култура во нашето
општество.
За таа цел, следејќи ги активностите на надлежните институции во
донесувањето на релевантите законски и подзаконски акти, на нашата веб
страница во делот Закони и прописи во изминатиов период беа додадени следните правни прописи:
– Правилник за специјализирана медицинска рехабилитација како продолжено
болничко лекување
– Програма за рефундирање на средства платени како царински давачки, данок
на додадена вредност и акциза за набавка на патнички автомобил за лица со
тешка, потешка и најтешка телесна попреченост, лица со умерена, тешка и
длабока интелектуална попреченост, за потполно слепи лица со придружник и
за потполно глуви лица за 2022 година
– Уредба за правото на лицата со инвалидност и други лица да бидат
ослободени од партиципација за студирање
Исто така, беше извршено обновување и усогласување на содржината
на останатите акти во базата на правни прописи (вкупно 29 прописи), со цел
преку консолидиран преглед да ги поттикнеме лицата со МС правилно и
навремено да се информираат за постапките пред надлежните институции во
остварувањето на своите права.
Како надополнување на оваа активност е и спроведувањето на проектот
„Правна помош и поддршка за лицата со МС“ преку кој овозможуваме
бесплатна консултација и поддршка од стручен тим на правници при
соочувањето со конкретен правен проблем. Повеќе информации за начинот на
користење на оваа услуга имате овде
Следете ги активностите на Националното Здружение за МС,
информирајте се преку содржините и текстовите на нашата веб страница за
полесно остварување на Вашите права.
ЗА НАЦИОНАЛНОТО ЗДРУЖЕНИЕ ЗА МС
Национално здружение за помош и поддршка на лица со мултипла склероза – Национално здружение за МС е доброволно, непрофитно, невладино и непартиско здружение на граѓани, формирано заради остварување, заштита, унапредување и усогласување на правата, потребите и интересите, како и вршење на дејности и активности со цел подигање на јавната свест за мултиплата склероза. Oсновано е на 20. март 2019 година. Националното здружение е полноправна членка на Европската МС Платформа (анг. European Multiple Sclerosis Platform, EMSP), полноправна членка на Светската алијанса на пациенти (анг. World Patient Alliance) и асоцијативна членка на Алијансата на пациентски организации (АПО).
Потребата за формирање на здружението се наметна како резултат на неопходноста за обединување на лицата со мултипла склероза, нивните семејства со цел согледување на нивните потреби и инволвирање на останати чинители заради решавање на проблемите на лицата со МС, како и подобрување на квалитетот на нивното живеење. Исто така, секојдневниот напредок во медицината, токму во областа на неврологија бара интензивирање на реформите во оваа област.
Нашата мисија и причина за постоење е искрената желба за помош и поддршка на лицата со МС и нивните негуватели, во подигнување на свеста кај јавноста и проблематиката по однос на МС, сериозен пристап, навремена дијагностика и навремен и соодветен третман со цел спречување на прогресијата и инвалидитетот, поддршка на пациентите, едукација по однос на правата на лицата со МС и промоција на нови достигнувања во медицината.