Националното здружение за МС е полноправна членка на Европската МС Платформа
Скопје, 7. мај 2020 година
Националното здружение за помош и поддршка на лица со мултипла склероза – Национално здружение за МС информира дека е дел од Европското семејство на пациентски организации кои се борат против мултиплата склероза. Од денес, нашето здружение е полноправна членка на Европската МС Платформа (анг. European Multiple Sclerosis Platfrom, EMSP).
Имено, на Генералното годишно собрание на EMSP кое се одржа на 7. мај годинава во присуство на претставници на сите земји членки на EMSP, Националното здружение за МС, едногласно, беше примено во Европското семејство на МС организации. Ова претставува уште една потврда дека здружението за МС е препознаено како сериозен правен субјект од страна на оваа влијателна Европска организација која ги обединува и претставува правата и потребите на лицата со мултипла склероза на ниво на цел европски континтинент.
Со зачленувањето на Националното здрушение за МС во Европската МС Платформа се оствари нашата заложба и визија. Горди сме и среќни бидејќи ова е потврда за нашиот квалитет и посветеност во работата изминатиот период. Но ова претставува и голем мотив и поттикт во иднина, здружението да дејствува многу посилно заедно со другите европски пациентски организации кои имаат долгогодишно искуство, долгорочна стратегија и успех во работата во оваа проблематика во интерес на пациентите со МС кај нас, изјави Ана Карајанова Димитрушева, претседателка на Националното здружение за МС.
За EMSP
EMSP е основана во 1989 година, во моментов членуваат 41 национално здружение за МС од 35 европски земји, а од денес побогато за уште три нови членки, една полноправна и две придружни.
Примарна цел на ЕМСП е континуирана посветеност кон крајната визија за свет без мултипла склероза. Интензивно работи со цел да биде слушнат гласот на лицата со мултипла склероза со цел остварување на нивните потреби и приоритетите преку:
- кампањи за застапување и подигнување на свеста;
- собирање и споделување на знаење и експертиза;
- поттикнување на истражување и собирање податоци.
ЕМSP на своите членки им нуди глас на европско ниво, насоки и градење на капацитети. Taa е единствената организација за МС која може да влијае на здравството и другите политики во Европската Унија. Има историја на соработка со Европската комисија и Европскиот парламент, основачи се и членови на Европскиот форум на пациенти (анг. Еuropean Patient Forum) и пристап и можност за влијание врз одлуките на Европската агенција за лекови (анг. European Medicines Agency, ЕМА).
Повеќе за EMSP на следниов линк.
ЗА НАЦИОНАЛНОТО ЗДРУЖЕНИЕ ЗА МС
Национално здружение за помош и поддршка на лица со мултипла склероза – Национално здружение за МС е доброволно, непрофитно, невладино и непартиско здружение на граѓани, формирано заради остварување, заштита, унапредување и усогласување на правата, потребите и интересите, како и вршење на дејности и активности со цел подигање на јавната свест за мултиплата склероза. Oсновано е на 20. март 2019 година.
Потребата за формирање на здружението се наметна како резултат на неопходноста за обединување на лицата со мултипла склероза, нивните семејства со цел согледување на нивните потреби и инволвирање на останати чинители заради решавање на проблемите на лицата со МС, како и подобрување на квалитетот на нивното живеење. Исто така, секојдневниот напредок во медицината, токму во областа на неврологија бара интензивирање на реформите во оваа област.
Нашата мисија и причина за постоење е искрената желба за помош и поддршка на лицата со МС и нивните негуватели, во подигнување на свеста кај јавноста и проблематиката по однос на МС, сериозен пристап, навремена дијагностика и навремен и соодветен третман со цел спречување на прогресијата и инвалидитетот, поддршка на пациентите, едукација по однос на правата на лицата со МС и промоција на нови достигнувања во медицината.
Повеќе за здружението на следниов линк.