Достапни се едукативни материјали за лицата со мултипла склероза и членовите на нивните семејства
Националното здружение за помош и поддршка на лица со мултипла склероза информира дека неодамна, во соработка со фармацевтската компанија Biogen и стручни лица – невролози од Универзитетската Клиника за неврологија, реализиравме шест едукативни материјали наменети за лицата со мултипла склероза (МС) и лицата кои се грижат за нив. Веруваме дека овие материјали ќе бидат од голема корист имајќи ја предвид содржината која ја нудат.
За почеток запознајте се со публикациите „Живот со мултипла склероза (МС)“ и „Разбирање на мултипла склероза (МС)“
Брошурата „Живот со мултипла склероза (МС)“, ви дава совети како да разговарате со вашите пријатели и семејството за МС, промените кои може да ги направите во Вашите секојдневни активности и како да контролирате некои од вообичаените симптоми на МС.
Другата брошура „Разбирање на мултипла склероза (МС)“ е одлично четиво кое нуди одговори на прашањата: Што е МС? Што знаеме за МС? Кои се симптоми на МС? Какви тестови постојат за МС? Различни видови МС Што претставува едно влошување на МС? Како се третира МС?.
Овие едукативни материјали се поставени на официјалната веб страница на Националното здружение за МС во делот публикации, воедно ќе бидат достапни и во печатена форма на ЈЗУ Универзитетската клиника за неврологија – Скопје од каде сите заинтересирани лица ќе можат да подигнат примерок.
Ова претставува доказ дека Националното здружение за МС е целосно посветено и се грижи за доброто на лицата со МС, трудејќи се со своите активности да ги опфати сите аспекти кои влијаат на подобрување на животот на лицата со МС, а воедно и полесно справување со секојдневните предизвици кои ги носи оваа хронична болест.
За Националното здружение за МС
Национално здружение за помош и поддршка на лица со мултипла склероза – Национално здружение за МС е доброволно, непрофитно, невладино и непартиско здружение на граѓани, формирано заради остварување, заштита, унапредување и усогласување на правата, потребите и интересите, како и вршење на дејности и активности со цел подигање на јавната свест за мултиплата склероза. Oсновано е на 20. март 2019 година. Националното здружение е полноправна членка на Европската МС Платформа (анг. European Multiple Sclerosis Platform, EMSP), полноправна членка на Светската алијанса на пациенти (анг. World Patient Alliance) и асоцијативна членка на Алијансата на пациентски организации (АПО).
Потребата за формирање на здружението се наметна како резултат на неопходноста за обединување на лицата со мултипла склероза, нивните семејства со цел согледување на нивните потреби и инволвирање на останати чинители заради решавање на проблемите на лицата со МС, како и подобрување на квалитетот на нивното живеење. Исто така, секојдневниот напредок во медицината, токму во областа на неврологија бара интензивирање на реформите во оваа област.
Нашата мисија и причина за постоење е искрената желба за помош и поддршка на лицата со МС и нивните негуватели, во подигнување на свеста кај јавноста и проблематиката по однос на МС, сериозен пристап, навремена дијагностика и навремен и соодветен третман со цел спречување на прогресијата и инвалидитетот, поддршка на пациентите, едукација по однос на правата на лицата со МС и промоција на нови достигнувања во медицината.