Уметноста како терапија за мултипла склероза (арт терапија)

ЗОШТО ДА ПРОБАТЕ АРТ ТЕРАПИЈА ЗА МС?

Што ако ви кажам дека постои издувен вентил за „запирање на лудилото” кај сите лица со МС? Соочувајќи се со проблемите кои ги имаме, со појава на депресија, намалена самодоверба, страв, болка и изолација, зарем не би било одлично да откриеме дека имаме на располагање нешто што ќе ни помогне да се спротивставиме и да се справиме со овие предизвици? Всушност веќе постои помош, за да биде уште подобро бесплатна е, а сепак не се работи за уште еден медикамент.

Она што го имаме на располагање е уметноста. Преку неа можеме да изразиме било какви емоции или едноставно да ги смириме напрегнатите мисли во секое време. Не се потребни никакви вештини. Уметноста е исконска и е лична, интимна. Создавањето уметност претставува ослободување, бидејќи не постојат правила, не постојат крајни рокови и не е важно ничие туѓо мислење (освен ако не го побарате).

Уметноста и арт терапијата се докажани начини како да ги подобриме и подигнеме на повисоко ниво нашите способности за справување, да го ослободиме умот и да го прочистиме духот. Со слободно изразување, преку уметноста можеме да создадеме опипливи дела. Можеме да ги исфрлиме фрустрациите, да славиме победи, да споделуваме емоции и да го изразиме она што не можеме во стандардната комуникација.

Уметноста може да биде моќно средство преку кое можеме да допреме до останатиот дел од светот и да ги изразиме нашите чувства. Исто така, може да остане лично достигнување што нуди медитативна и духовна потпора за справување со сите животни предизвици.

ПРИДОБИВКИ ОД АРТ ТЕРАПИЈАТА КАЈ ЛИЦА СО МС

Според Американското здружение на лица со МС (Multiple Sclerosis Association of America – MSAA), спроведени се бројни истражувања кај здрави лица, како и кај лица со одредени здравствени проблеми како би се испитале позитивните ефекти при создавањето уметнички дела.

Едно од истражувањата покажало дека жените со МС кои учествувале во креативна уметничка работилница доживеале значително зголемување на самодовербата, социјалната поддршка и самоефикасноста, како вештини за полесно справување и егзистирање со МС (самоефикасност е вештина која веруваме дека ја имаме во соочување со предизвиците и во остварување на целите). Истражувањето покажало голем ефект и кај зголемување на надежта. Авторите заклучиле дека креативната уметност има потенцијал да ги подобри животите на оние лица кои живеат со МС.

Некои од другите значајни придобивки од арт терапијата вклучуваат:

ОСЛОБОДУВАЊЕ ОД СТРЕС

Пренасочувањето на мислите и фокусирање на некоја креативна активност за одреден временски период може да биде корисно за ослободување од стресот. Уметноста е фантастичен начин за пренесување на фокусот, а бавните, повторувачки движења при сликање, цртање или вајање можат физички да го смират телото.

ПОЛЕСНА ФОРМА НА ДЕПРЕСИЈА, КАКО И ИЗОЛИРАНОСТ

Бидејќи симптомите на МС може да влијаат на вашата подвижност или количина на енергија, социјалниот живот може да страда и заради тоа многу пациенти со МС стануваат изолирани, анксиозни и депресивни. Здружувањето во група со луѓе кои ги разбираат вашите чувства, како и вашите симптоми, може да биде одлична мжност за поврзување.

ВИЗУЕЛНА ПОМОШ ЗА ВЕРБАЛНИТЕ ПРОБЛЕМИ

Не е невообичаено понекогаш да не ви се зборува или едноставно да ви е здодеано на луѓето да им ги објаснувате вашите симптоми или вашата душевна состојба. За жал недостатокот на комуникација може да доведе до помалку ефикасен третман, а со тоа и поголеми страдања. Голем број луѓе откриле дека можат полесно да се изразат преку визуелно претставување, особено откако ќе се запознаат со процесот на креација.

ЧУВСТВО НА ОХРАБРУВАЊЕ

Некои терапевти забележуваат значително зголемување на самодовербата кај пациентите кога тие ја претставуваат својата уметност. Впрочем, претставувањето на вашата работа во формален, јавен амбиент, во вид на изложба ве претставува како уметник, а не како пациент, а тоа претставува големо охрабрување.

Уметноста ни овозможува да ги пренесеме нашите мисли и имагинации на нови места,им помага на нашите мозоци да создадат нови конекции. Уметноста ни помага полесно да разбереме кои сме,  како сме поврзани самите со себе, со нашите животи, како и едни со други.

ШТО АКО НЕ СУМ ЉУБИТЕЛ НА УМЕТНОСТА?

Не мора да бидете љубител или да поседувате било какви вештини за да имате придобивка од обидите да создадете уметност. Сè што ви треба е љубопитност и отвореност кон истражувањето на вашата креативност.

Одберете нешто што ве привлекува и посветете се. Цртајте, плетете, фотографирајте, пишувајте или создадете колаж од исечоци од списанија со хартија и лепак. Можете дури и да се задлабочите во некоја боенка. Што и да е тоа што ве привлекува, не се воздржувајте. Оставете ги настрана очекувањата, или грижите за исходот. Можете да бидете пријатно изненадени од вашата уметничка креација.

Кога сте во креативен процес ќе забележите дека постојаната бучава и дијалогот во вашата глава се смируваат додека, вие сè повеќе се внесувате во тоа што го правите. Ова искуство се нарекува “креативен занес”. Тоа е повисока форма на фокусирање и додека мозокот е посветен на совладување на предизвикот, поврзаноста со емоциите ве воведува во отворена уметничка креација.

ИЗЛЕЗЕТЕ ОД ОГРАНИЧУВАЊАТА

Арт терапевтите го користат креативниот процес и уникатниот вид на фокус и проток на мисли до кој може да доведе уметноста, за да им помогнат на луѓето да ги истражуваат своите внатрешни емоции и да се справуваат со внатрешните конфликти.

Постои уште една придобивка за лицата со МС. Можеме да ги поместуваме границите и ограничувањата со помош на поврзаноста на нашето тело и ум. Преку работа на проблемот, што сакаме да пренесеме или соопштиме преку нашата уметност, ние помагаме во создавањето нови невро – патеки. Всушност, можеме да го обучиме нашиот мозок и да ги вежбаме своите сетила надвор од границите на секојдневното живеење.

Уметноста и предизвиците што таа ги нуди, може да ни помогне да научиме да работиме и функционирамеи покрај намалената чувствителност, подвижност и когнитивен мисловен процес. Преку уметноста, можеме да вратиме одредена контрола и да имаме подобро, подлабоко разбирање за нашите тела.

АЛТЕРНАТИВНИ СВЕТОВИ

• Активностите во уметноста ми помогнаа да се оттргнам од монотонијата и едноличноста на секојдневните обврски и задачи.
• Уживам во сликарството и грнчарството, најмногу затоа што немаат никаква допирна точка со моите останати интереси во животот. Се чувствувам како да земам краток одмор секогаш кога сликам или работам со глина. Сега можам целосно да се посветам и да се задлабочам во моите уметнички сесии.
• Понекогаш сум нестрплива и желна, барем на кратко да се изгубам во овој мој сигурен и алтернативен свет. Сметам дека тоа е еден вид на подвижна медитација. Си играм и експериментирам. Си поставувам предизвици и учам додека се фокусирам на задачите. Најпрекрасната работа е тоа што се чувствувам целосно слободна.

ДРУЖЕЊЕ НА ЧАС

За секој што сака да биде креативен во социјална средина или едноставно сака да се стекне со нови знаења, часовите по уметност можат да бидат прекрасен начин.

Чувството на заедништво кое го нуди часот по уметност може да биде прекрасно и охрабрувачко. Да се ​​биде меѓу луѓе од сите слоеви на општеството, со истомисленици е одлично средство за дружење и споделување искуства и идеи додека експериментирате и учите.

Ако одлучите да посетувате часови по уметност, разговарајте со инструкторот за сите теми кои што ве засегаат или техники за работа кои би требало да се прилагодат, а се во врска со МС.

УПОТРЕБА НА УМЕТНОСТА КАКО ТЕРАПИЈА

Живеењето со МС е тешко да се опише со зборови. Дури и кога ќе се обидеме, зборовите се едноставно несоодветни во објаснувањето на фрустрациите, болката, емоционалното измачување, изопачениот хумор, малите победи и огромните предизвици што ги доживуваме со оваа страшна болест.

Уметноста е опиплив и достапен излез за сè она што задржуваме во себе. Преку уметноста им даваме можност на нашиот ум, нашата душа да истражуваат и откриваат. Можеме да си помогнеме себеси,  да си помогнеме едни на други и на секој што ќе дојде во допир со нашата уметност за подобро да разбере кои сме. Уметноста ни дава поголема надеж и нè прави почовечни.

Извор: https://ms.newlifeoutlook.com/art-therapy-for-ms/

Забелешка: Рубриката „Најнови информации“ е дел наменет исклучиво за вести и информации на оваа веб страница за оваа болест. Не обезбедува медицински совет, дијагноза или третман. Оваа содржина не е наменета да биде замена за професионален медицински совет, дијагноза или третман. Секогаш побарајте совет од Вашиот лекар или друг квалификуван здравствен работник за било какви прашања што може да ги имате во врска со здравствената состојба. Никогаш не занемарувајте  ги или одложувајте професионалните медицински совети поради тоа што сте го прочитале на оваа веб страница. Мислењата изразени во оваа рубрика не секогаш се мислења на Националното здружение за МС и наменети се да предизвикаат дискусија за прашања кои се однесуваат на мултипла склероза.