Прашајте експерт։ Кои се раните знаци на прогресија на МС?

МС Македонија
април 12, 2022

Кои се раните знаци дека мултипла склероза (МС) напредува?

Раните знаци на прогресија на МС вклучуваат:

  • Тешкотии при одење
  • Тетеравење и често паѓање
  • Прескокнување чекори
  • Сопнување
  • Влошување на меморијата

Други рани знаци може да вклучуваат тешкотии со фини моторни вештини, како што се закопчување на кошула или врзување врвки од чевли.

Зошто мојата МС напредува?

Прогресијата на болеста вообичаено се јавува 10 до 15 години по дијагнозата на релапсно – ремитирачка МС. Оваа фаза се нарекува секундарна прогресивна МС.

Се случуваат две работи кои придонесуваат за оваа прогресија. Првата, и попозната, е губењето на миелинот, заштитниот слој околу аксонот, кој е дел од нервната клетка. Вториот настан е невродегенерација, што значи клеточна смрт.

Сè уште не сме сигурни дали овие две фази се случуваат независно една од друга или во исто време, и дали самото губење на миелинот на крајот води до клеточна смрт.

Без разлика, крајниот резултат е губење на мозочните клетки. Овој процес се случува бавно, со години, додека не се изгуби одреден број клетки и не почнат да се развиваат прогресивни симптоми.

Како да се справам со прогресијата на МС?

Ако симптомите се влошуваат, треба да го посетите вашиот невролог.

Прогресијата може да настане од самата основна болест, или од други причини. Овие причини може да вклучуваат:

  • Депресија
  • Лош сон
  • Болка
  • Ортопедски причини
  • Долгорочен стрес

Важно е да посетите лекар за да дознаете дали влошените симптоми се од реверзибилна природа, а со самото тоа можат да бидат третирани.

Дали има промена во релапсите со прогресијата на МС?

Да. Општо земено, штом некој ќе почне да забележува влошување или прогресија на симптомите на МС, релапсите имаат тенденција да се појавуваат поретко. Релапсите се почести на почетокот на болеста.

Сепак, сè уште е клучно да го посетите вашиот невролог и да продолжите со препишаната терапија, освен ако не ве советуваат да ја прекинете, бидејќи се покажало дека поновите третмани за модифицирање на болеста ја забавуваат прогресијата.

Дали постојат третмани за прогресивна МС?

Да. Многу нови терапии за МС може да се користат за активна секундарна прогресивна МС.

Разговарајте со вашиот невролог за промена на терапијата ако има докази за прогресија на болеста, или на снимката од МР се појавиле нови лезии.

Други лекови како „dalfampridine (Ampyra)“ се користат за лекување на различни типови на прогресивни симптоми, како што е влошување на одењето.

Кога треба да се посети лекар ако МС напредува?

Посетете го вашиот лекар при првите знаци на прогресија на болеста. Ако се откријат рано, постојат опции за третман за да се забави прогресијата.

Што треба да преземам за да се подготвам за долготрајна нега, ако мојата МС напредува?

Веб-страницата на Националното здружение за мултипла склероза е одлично место за добивање идеи и ресурси кои би можеле да го олеснат животот за вас и вашите најблиски.

Исто така, можете да ги контактирате локалните власти за да откриете дали во близина има програми и ресурси кои ви се достапни.

 

Извор:  https://www.healthline.com/health/multiple-sclerosis/early-signs-of-ms-progression

Забелешка: Овој текст има информативен карактер и не обезбедува медицински совет, дијагноза или третман. Оваа содржина не е наменета да биде замена за професионален медицински совет, дијагноза или третман. Секогаш побарајте совет од Вашиот лекар или друг квалификуван здравствен работник за било какви прашања што може да ги имате во врска со здравствената состојба. Никогаш не занемарувајте ги или одложувајте професионалните медицински совети поради тоа што сте го прочитале на оваа веб страница. Мислењата изразени не секогаш се мислења на Националното здружение за МС и наменети се да предизвикаат дискусија за прашања кои се однесуваат на мултипла склероза.