Справување со мускулната слабост предизвикана од МС

Причини за мускулна слабост кај МС

Причината поради која можете да одите, да се облечете и да земете чаша од полицата во кујната е резултат на поврзаноста помеѓу мозокот и мускулите. Вашиот мозок го контролира дејството, испраќа електрични сигнали до мускулите преку мрежа на нерви. Овие сигнали им пренесуваат наредба на вашите мускули да се движат.

Кога имате мултипла склероза (МС), вашиот имунолошки систем ги напаѓа нервите. Го уништува миелинот, обвивката која ги опкружува и штити нервните влакна.

Бидејќи миелинот е оштетен на нервите може да се формира тврдо ткиво во вид на лузни. Ова може да спречи нервните сигнали правилно да патуваат од мозокот до одредени делови на телото.

Оштетувањето на нервите може да предизвика слабост или вкочанетост на мускулите намалувајќи ја вашата способност за движење и извршување на секојдневните активности. Слабоста често се јавува само на едната страна од телото или само во нозете или трупот.

Мускулната слабост, како и другите симптоми на МС, може да се појави и да исчезне кога доживувате релапси и ремисии во текот на болеста.

Видови мускулна слабост

Кога нервните влакна се оштетени вашиот мозок не може ефикасно да им ги испрати сигналите на мускулите кои им се потребни за да се истегнат или згрчат. Како резултат на тоа, овие мускули нема да можете правилно да ги користите.

Исто така, кога не ги користите мускулите ослабнуваат. Дури и мускулите кои не се директно погодени од МС може да ослабнат ако симптомите како замор и болка ве спречуваат да ги движите и вежбате. Со текот на времето вашите мускули може да ослабуваат сѐ повеќе и повеќе.

Некои лица со МС забележуваат дека нивните мускули се заморуваат полесно од вообичаеното. На пример, некои лица со МС може да забележат дека не се чувствуваат стабилно,  или може да имаат проблеми со движењето особено  по периоди на вежбање, како што е одењето.

Понекогаш МС влијае на мускулите на стапалото што го отежнува одењето во нормална „пета – прсти“ шема на чекорење. Како резултат на ова вашата нога може да се завлекува на тлото додека чекорите. Ова се нарекува завлекување или пад на стапалото.

Како се третира мускулната слабост

Вообичаените третмани за МС се фокусираат на забавување на прогресијата на болеста, спречување на релапси кои ги оштетуваат нервите и намалување на симптомите. Лековите со чија помош може да се достигнат овие цели претставуваат основа на вашиот третман за справување со МС. Тука вклучуваме։

• Стероидни лекови
• интерферон бета терапија (interferon beta)
• плазмафереза
• glatiramer acetate
• мускулни релаксанти

Вежбањето е уште една важна компонента на вашиот третман. Комбинацијата на кардио – васкуларни и вежби за зголемување на силата може да ви обезбедат повеќе енергија и се корисни во справувањето со мускулната слабост. Ако вашите мускули ослабеле од причина што не ги користите, вежбите за отпор со користење на тегови можат повторно да ги зајакнат.

Физиотерапевт може да ви помогне да развиете програма за вежбање која одговара на вашите способности и е прикладна за сите ограничувања со кои се справувате. Терапевтот исто така може да ви покаже како правилно да ги изведувате вежбите со што ќе избегнете повреда или прекумерен замор.

Кога слабоста е предизвикана од оштетување на нервните влакна стратегијата за третман е малку поинаква.

Целта ќе биде да ги користите погодените мускули што е можно повеќе со тоа што ќе станете поактивни. Потоа ќе практикувате вежби со користење на тегови за зајакнување, поставени околу мускулите кои се оштетени.

При овој третман терапевтот ќе ве научи како да ги минимизирате ефектите од мускулната слабост. Ќе научите како да користите помагала како бастун, одалка или патерици доколку ви се потребни.

Кај завлекување на стапалото терапевтот може да ви препише ортопедско помагало, шина на глуждот (ортоза) со чија помош се спречува завлекување на стапалото додека одите. Можеби ќе ви биде потребна окупациона (работна) терапија за да совладате нови стратегии за одење во вашиот дом и на работното место.

Следниве чекори можат да помогнат во намалување на симптомите на МС:

• одржување соодветна рутина за спиење и одмор
• намалување на стресот
• одржување на температурата на телото
• здрава, урамнотежена исхрана

Работа со вашиот лекар

Симптомите на МС не се исти кај секого. Секој поединец различно ја доживува болеста. Затоа е важно да соработувате со вашиот лекар и физиотерапевт во изнаоѓањето решенија во справувањето со мускулната слабост.

Можеби ќе треба да испробате повеќе различни третмани додека не утврдите кој е најкорисен за вас во справувањето со мускулната слабост како и со другите симптоми на МС. Третманите може да вклучуваат комбинација на лекови, физикална терапија и користење на помагала.

Ако сметате дека одреден вид терапија не е ефикасен, консултирајте се со вашиот лекар. Преку „обиди и грешки“ можеби ќе дојдете до третманот кој е најкорисен за вашата состојба.

МС претставува предизвик. Без поддршка може да почнете да се чувствувате изолирано. За да го избегнете ова останете поврзани со пријателите и семејството, придружете се на група за поддршка и вклучете се во пријатни активности или некое хоби.

 

Извор: https://www.healthline.com/health/multiple-sclerosis/muscle-weakness

Забелешка: Овој текст има информативен карактер и не обезбедува медицински совет, дијагноза или третман. Оваа содржина не е наменета да биде замена за професионален медицински совет, дијагноза или третман. Секогаш побарајте совет од Вашиот лекар или друг квалификуван здравствен работник за било какви прашања што може да ги имате во врска со здравствената состојба. Никогаш не занемарувајте ги или одложувајте професионалните медицински совети поради тоа што сте го прочитале на оваа веб страница. Мислењата изразени не секогаш се мислења на Националното здружение за МС и наменети се да предизвикаат дискусија за прашања кои се однесуваат на мултипла склероза.