Неконсумирањето алкохол во текот на животот, поврзано со „значително“ зголемен ризик од МС
Според една нова студија, неконсумирањето на алкохол значително го зголемува ризикот од развој на мултипла склероза (МС), особено ако некое лице исто така е сегашен или поранешен пушач.
Овие наоди ги дополнуваат сознанијата стекнати од повеќе претходни студии, дека алкохолот ја намалува активноста на имунолошкиот систем. Според научниците, ова може да биде причина за познатата поврзаност помеѓу консумирањето алкохол и намалениот ризик од МС – со оглед на тоа што МС се карактеризира со прекумерно активен имунолошки систем.
Иако овие нови податоци „се релевантни за клиничката пракса, и здравите индивидуи кои се во ризик од наследна мултипла склероза, или лицата кои веќе имаат МС не се советуваат целосно да се воздржат од алкохол“, сепак не може да се препорача зголемување на консумација на алкохол, велат истражувачите.
„Консумирањето алкохол има штетни ефекти врз други симптоми на болеста, а подоброто разбирање на механизмите зад нашите наоди може да помогне да се дефинираат начини да се постигне заштита од МС со други средства освен консумацијата на алкохол“, напишаа тие.
Студијата „The increased risk of multiple sclerosis associated with HLA-DRB1*15:01 and smoking is modified by alcohol consumption” беше објавена во „Scientific Reports“.
МС е предизвикана од имунолошкиот систем кој ги напаѓа здравите нервни клетки, но причините за развојот на болеста не се целосно јасни. Се смета дека факторите на животната средина, како што е употребата на дрога, како и генетиката на една личност, придонесуваат за зголемен ризик од развој на МС.
Иако пушењето цигари е добро воспоставен фактор на ризик за МС, не е целосно јасно како алкохолот влијае на ризикот од МС. Тројца истражувачи од Шведска, во обид да го објаснат овој ефект, спроведоа анализа за контрола на случај, користејќи шведска база на податоци за населението. Базата на податоци, дизајнирана да ги испита еколошките и генетските фактори на ризик од МС, вклучува поединци на возраст од 16-70 години.
Анализата опфатила 2.059 лица со МС, а 2.887 без. Здравите индивидуи, користени како контролна група, беа усогласени со пациентите по возраст, пол и област на живеење. Во двете групи приближно една третина од учесниците изјавиле дека никогаш не пиеле алкохол, а околу половина пушеле цигари во текот на нивниот живот.
Користејќи статистички анализи научниците го пресметале ефектот на консумирањето алкохол врз ризикот од МС, земајќи го предвид статусот на пушење, и дали поединците биле позитивни или не на HLA-DRB1*15:01, генетска варијација за која е познато дека го зголемува ризикот од МС. Забелешка, научниците идентификуваа повеќе од 200 варијанти на генетски ризик, или мутации поврзани со болести, кои потенцијално придонесуваат за подложност на МС.
Резултатите покажаа дека консумирањето алкохол е поврзано со помал ризик од МС – оние кои никогаш не пиеле имаат приближно 20% поголема веројатност да ја развијат болеста. Ова намалување на ризикот беше поизразено кај активните и пушачите кои прекинале да пушат, отколку кај оние кои никогаш не пушеле цигари.
„Интеракцијата помеѓу не-пиење и пушење цигари беше помалку изразена кај поранешните пушачи отколку кај активните, иако сè уште е значајна“, напишаа научниците. „Ова откритие можеби не е изненадувачко со оглед на долготрајниот штетен ефект на пушењето врз ризикот од МС дури и по откажувањето од пушењето“.
Понатамошните анализи покажаа дека лицата со сите три фактори на ризик – кои никогаш не пијат, оние кои некогаш пушеле цигари и поединци позитивни на варијантата HLA-DRB1*15:01 – имале околу седум пати поголеми шанси да развијат МС, во споредба со оние кои немале ниту еден од овие фактори на ризик.
„Оние кои не пијат алкохол имаат зголемен ризик од развој на МС во споредба со оние кои пијат, а не-пиењето е во интеракција со варијантата HLA-DRB1*15:01 и пушењето, со што се зголемува ризикот од болеста“, напишаа научниците.
Тимот, исто така, забележа слични податоци кои ја нагласуваат врската помеѓу не пиењето, пушењето и генетскиот фактор, во однос на ризикот за развој на ревматоиден артритис.
„Се чини дека алкохолот има слично влијание и на МС и на ревматоидниот артритис, кои се сложени инфламаторни заболувања“, забележаа научниците, истакнувајќи дека истражувањето на „молекуларните механизми во основата на специфичните интеракции претставени во овој извештај“ може да бидат корисни во унапредување на сознанијата за двете нарушувања.
Забелешка: Овој текст има информативен карактер и не обезбедува медицински совет, дијагноза или третман. Оваа содржина не е наменета да биде замена за професионален медицински совет, дијагноза или третман. Секогаш побарајте совет од Вашиот лекар или друг квалификуван здравствен работник за било какви прашања што може да ги имате во врска со здравствената состојба. Никогаш не занемарувајте ги или одложувајте професионалните медицински совети поради тоа што сте го прочитале на оваа веб страница. Мислењата изразени не секогаш се мислења на Националното здружение за МС и наменети се да предизвикаат дискусија за прашања кои се однесуваат на мултипла склероза.