Зошто мултипла склероза предизвикува лезии на мозокот?

Што треба да знаете?

Што се мозочни лезии?

Нервните влакна во мозокот и ‘рбетниот мозок се обвиткани во заштитна мембрана позната како миелинска обвивка. Овој слој помага да се зголеми брзината со која сигналите се движат низ нервите.

Ако имате мултипла склероза (МС), хиперактивните имунолошки клетки во вашето тело предизвикуваат воспаление кое го оштетува миелинот. Кога тоа ќе се случи, оштетените области, познати како плаки или лезии се формираат на мозокот или ‘рбетниот мозок.

Внимателното управување и следење на состојбата може да ви помогне вам и на вашиот лекар да откриете дали таа напредува. За возврат, придржувањето до ефективен план за лекување може да го ограничи или забави развојот на лезиите.

Симптоми

Кога ќе се развијат лезии на мозокот или на ‘рбетниот мозок, тие можат да го нарушат движењето на сигналите долж вашите нерви. Ова може да предизвика различни симптоми.

На пример, лезиите може да предизвикаат:

• проблеми со видот
• мускулна слабост, вкочанетост и грчеви
• вкочанетост или пецкање во лицето, трупот, рацете или нозете
• губење на координација и рамнотежа
• тешкотии со контролирање на мочниот меур
• постојана вртоглавица

Со текот на времето, МС може да предизвика формирање на нови лезии. Постоечките лезии, исто така, може да станат поголеми, што може да предизвика релапс или акутно влошување на симптомите. Ова се случува кога вашите симптоми се влошуваат или се појавуваат нови симптоми.

Исто така, можно е да се развијат лезии без забележливи симптоми. Според „ National Institute of Neurological Disorders and Stroke (NINDS) “ само кај 1 од 10 случаи лезиите предизвикуваат надворешни ефекти.

За да се забави прогресијата на МС, достапни се многу третмани. Раната дијагноза и третман може да помогнат да се спречи развојот на нови лезии.

Тестирање

За да се следи и дијагностицира прогресијата на МС, вашиот лекар нејверојатно ќе препорача одредени тестови. Овие тестови се нарекуваат скенирање со магнетна резонанца (МР). Лекарите исто така користат физички прегледи за да го следат текот на вашата состојба.

Скенирањето со магнетна резонанца се користи за да се создадат слики од вашиот мозок и ‘рбетниот мозок. Ова му овозможува на вашиот лекар да провери дали има нови, или промена во постоечките лезии.

Следењето на развојот на лезиите може да му помогне на вашиот лекар да дознае како напредува состојбата. Ако имате нови или зголемени лезии, тоа е знак дека болеста е активна.

Следењето на лезиите исто така може да му помогне на вашиот лекар да дознае колку добро функционира планот за лекување. Ако развиете нови симптоми или лезии, тој може да препорача промени во планот за лекување.

Вашиот лекар може да ви помогне во донесувањето одлуки во врска со опциите за третман. Тој исто така може да ве информира за нови, достапни терапии кои би можеле да ви користат.

Третман

Достапни се многу лекови за третман на МС. Некои од тие лекови може да помогнат во ублажување на симптомите за време на релапс или воспаление. Други го намалуваат ризикот од формирање на нови лезии и помагаат да се забави прогресијата на болеста.

„ The Food and Drug Administration (FDA)“ одобри повеќе од десетина третмани за модификација на болеста (DMT), кои би помогнале во забавување на формирањето нови лезии.

Повеќето DMT се развиени за лекување на релапсни форми на МС. Сепак, некои од нив се користат за лекување на други типови МС.

Многу од DMT покажуваат ветувачки резултати во спречувањето на нови лезии. На пример, следните лекови може да помогнат да се запре развојот на лезиите:

• interferon beta-1b (Betaferon)
• ocrelizumab (Ocrevus)
• interferon-beta 1a (Avonex)
• alemtuzumab (Lemtrada)
• cladribine (Mavenclad)
• teriflunomide (Aubagio)
• fumaric acid
• dimethyl fumarate (Tecfidera)
• fingolimod (Gilenya)
• natalizumab (Tysabri)
• glatiramer acetate (Copaxone)

Според NINDS, во тек се клинички испитувања за да се дознае повеќе за потенцијалните придобивки и ризици од користењето на овие лекови. Некои од нив се експериментални, додека други се одобрени од FDA.

Дали мозочните лезии кај МС ќе исчезнат?

Можно е покрај забавувањето на нивниот раст, лезиите и да се повлечат.

Научниците работат на развој на стратегии за регенерација на миелинот, или терапии за ремиелинизација, кои би можеле да помогнат во повторното создавање на миелин.

На пример, мало клиничко испитување објавено во 2017 година покажа дека „ clemastine fumarate“ може да помогне во промовирање на регенерација на миелинот кај лица со оштетување на оптичкиот нерв, предизвикано од МС. „Clemastine fumarate“ е антихистамин кој се издава без рецепт, и се користи за лекување на сезонски алергии.

Потребни се повеќе истражувања за да се проценат потенцијалните придобивки и ризици од користењето на овој лек во третманите за МС. Исто така, во тек е истражување за да се идентификуваат и тестираат други потенцијални стратегии за промовирање на ремиелинизација.

Лезии на ‘рбетот кај МС

Лезиите на ‘рбетот се исто така чести кај лицата со МС. Тоа е така затоа што демиелинизацијата, која предизвикува лезии, е карактеристичен знак за МС. Демиелинизација се јавува во нервите на мозокот, како и на ‘рбетот.

Заклучок

МС може да предизвика создавање лезии на мозокот и ‘рбетниот мозок, што предизвикува различни симптоми. За да помогне во забавувањето на развојот на лезиите, како и во справањето со симптомите кои тие можат да ги предизвикаат, вашиот лекар може да препорача еден или повеќе третмани.

Се развиваат повеќе експериментални терапии со чија помош не само што би го запреле развојот на нови лезии, туку и би ги лекувале постоечките.

Извор: https://www.healthline.com/health/multiple-sclerosis/brain-lesions

Забелешка: Овој текст има информативен карактер и не обезбедува медицински совет, дијагноза или третман. Оваа содржина не е наменета да биде замена за професионален медицински совет, дијагноза или третман. Секогаш побарајте совет од Вашиот лекар или друг квалификуван здравствен работник за било какви прашања што може да ги имате во врска со здравствената состојба. Никогаш не занемарувајте ги или одложувајте професионалните медицински совети поради тоа што сте го прочитале на оваа веб страница. Мислењата изразени не секогаш се мислења на Националното здружение за МС и наменети се да предизвикаат дискусија за прашања кои се однесуваат на мултипла склероза.