Кои витамини, минерали и суплементи се корисни за мултипла склероза
Различни видови на витамини, минерали и други додатоци (суплементи) се користат како симптоматски третман кај лицата со мултипла склероза (MС). Сепак, недостатокот на доволно истражувања ја спречува можноста за давање конкретни препораки за лицата со MС, по однос на нивната ефикасност и безбедност. Вообичаените додатоци на витамини и минерали го вклучуваат витамин Д, како и витамини и минерали со антиоксидантни ефекти, како што се витамини Ц и Е и селен.
Витамин Д
Потенцијална важност за лицата со MС има витаминот Д, како од перспектива на менаџирање на симптомите, така и од аспект на модифицирање на болеста. Витаминот Д е познат како важен фактор во одржувањето на коскената густина, а лицата со МС се изложени на зголемен ризик од губење на коскената маса (остеопенија и остеопороза) поради многу причини, вклучувајќи употреба на кортикостероиди, намалена изложеност на сонце и губење на способноста за движење.
Резултатите од неколку студии сугерираат дека зголеменото ниво на витамин Д во крвта (како и високиот внес на тој витамин) може да биде поврзано со намалена веројатност за развој на МС и намален ризик од релапси и прогресија на инвалидитетот кај лицата со МС. Потребни се повеќе студии за да се утврди јасна поврзаност помеѓу витаминот Д и МС и потребно е постоење на поконкретни докази за тоа дали витаминот Д навистина има ефекти кои ја модифицираат болеста. Сепак, лицата со MС можат да изберат да земаат витамин Д во скромни количества од 1.000 до 2.000 интернационални единици (ИЕ) дневно. Општо прифатената безбедна горна граница за дневен внес на витамин Д е 4000 ИЕ, но сепак може да се препорачаат повисоки количини врз основа на вашите специфични околности. Ако сакате да користите витамин Д, најпрво разговарајте со вашиот лекар. Вашиот лекар може да ви направи тест за да го открие нивото на витамин Д во крвта, и ако е под нормалното, може да ви предложи дневен додаток за да ги доведете вашите параметри во нормално/оптимално ниво.
Витамини антиоксиданси
Идејата за земање антиоксидантни витамини, кои вклучуваат витамин А (обично земен како бета-каротен, што е побезбедна форма на витаминот) и витамини Ц и Е, е дека овие витамини го намалуваат оштетувањето кое го предизвикуваат слободните радикали. Слободниот радикал (исто така наречен оксиданс) е молекула во телото што има непарен електрон. Овие молекули се многу нестабилни бидејќи постојано се обидуваат да го спарат својот непарен електрон. Ова ги тера да реагираат со други супстанции во телото, што резултира со оксидативно оштетување. Препорачан дневен додаток (RDA) на антиоксидантни витамини може да се добијат со јадење на 3 до 4 порции зеленчук и 2 до 4 порции овошје секој ден. Безбедноста од земање на антиоксидантни витамински додатоци во количини поголеми од RDA не е утврдена за лицата со МС и теоретски постои ризик дека овие витамини може да го стимулираат имунолошкиот систем, кој веќе е прекумерно активен кај лицата со MС.
Витамин Ц
Се смета дека витаминот Ц може да биде корисен во превенција на инфекции на уринарниот тракт, што многу често се јавува кај лицата со МС. Идејата зад ова е дека витаминот Ц може да придонесе за киселост во урината, што за возврат отежнува бактериите да го колонизираат уринарниот тракт. Сепак, доказите покажуваат дека витаминот Ц нема својство да ја закисели урината. Затоа, има некои контроверзии околу тоа дали внесувањето на високи количини на витамин Ц е корисно за лицата со МС. Доказите го поддржуваат користењето на брусница (во форма на пилула, чај или сок) за да се закисели урината и да се заштитат од инфекции на уринарниот тракт.
Витамин Е
Витаминот Е, кој е достапен во зеленчук, ореви, месо, растителни масла и овошје, го спречува оксидативното оштетување во телото. Доколку земате полинезаситени масни киселини (PUFA) или консумирате храна со високо ниво на PUFA, кое се смета дека е корисно за МС, вашите потреби за витамин Е ќе бидат се поголеми. Пред да започнете да ја зголемувате дозата на PUFA, разговарајте со вашиот лекар за тоа како тоа би влијаело да се зголеми вашата потреба за витамин Е. Како и со многу додатоци, премногу витамин Е може да предизвика проблеми, а некои експерти препорачуваат луѓето со МС да консумираат пониски дози на витамин Е.
Витамин А
Витаминот А е важен витамин за здравјето на очите, како и нормален раст на клетките низ телото. Извори на витамин А се црниот дроб, јајцата и рибиното масло (cod liver oil). Витаминот А е витамин растворлив во масти кој се чува во телото и може да се акумулира со текот на времето. Затоа, треба да избегнувате преголеми количини. Препорачаниот дневен додаток (RDA) за мажи и жени се движи од 2.300 до 3.000 интернационални единици (IU), а дневната доза не треба да надминува 10.000 IU. Ако сте бремени, не треба да консумирате високи количини на витамин А бидејќи внесувањето на прекумерни количини на овој витамин може да резултира со вродени аномалии и дефекти. Бремените жени треба да го ограничат внесот на витамин А како побезбедна форма содржана во овошјето и зеленчукот наречен бета-каротин.
Витамин Б6
Б комплексните витамини, кои содржат витамин Б6 (пиридоксин), се земаат за да се зголеми енергијата. Природните извори на витамин Б6 вклучуваат многу различни видови на храна, како што се риби (лосос и туна), зеленчук, пилешко и свинско месо, грав и банани. RDA за витамин Б6 е 1,3-1,7 милиграми за лица на возраст од 19-50 години, а високите количини на витамин (како што се 1.000 милиграми) може да предизвикаат вкочанетост, пецкање или болка. Овие симптоми се реверзибилни откако ќе се намали дозата.
Витамин Б12
Се тврдеше дека витаминот Б12 (кобаламин) е ефикасен третман за МС. Сепак, има малку докази за поддршка на овие тврдења. Недостатоците на витамин Б12, што може да доведе до невролошки симптоми слични на МС, обично се наоѓаат кај само мал број на лица со МС. Кај пациенти кои имаат ниско ниво на витамин Б12 треба да се користи додаток. Природните извори на витамин Б12 вклучуваат месо, живина, школки, јајца и млечни производи.
Селен
Минералот селен има антиоксидантни ефекти, а како извори на селен се вбројуваат мешунки, морска храна, цели зрна, посно месо и млечни производи. Селенот е потенцијално корисен за МС поради антиоксидантните својства на оваа супстанца. Податоците од некои студии сугерираат дека нивото на селен може да биде пониско кај луѓето со МС; сепак, не е јасно дали додатоците на селен ќе имаат корисно дејство кај лицата со МС. Со оглед на неговите антиоксидативни својства, премногу селен може да го зајакне имунолошкиот систем, кој е веќе хиперактивен кај луѓето со МС. Високото ниво на селен може да биде токсично (над 400 mcg / ден), а луѓето со MС треба да имаат за цел да го добијат својот селен од храната.
Калциум
Соодветен внес на калциум, кој е најзастапен минерал во телото, е важен за одржување на здравјето на коските и забите и регулирање на виталните процеси на телото. Старата хипотеза дека високиот внес на калциум (потрошувачка на големи количини млеко или други млечни производи) во текот на детството, со ненадејно намалување на потрошувачката во адолесценцијата, може да предизвика МС, не е поддржана со многу докази. Диететски извори на калциум вклучуваат млечни производи, лиснат зеленчук и јајца. Луѓето со MС имаат зголемен ризик од губење на коскената маса, така што адекватен внес на калциум е од клучно значење (RDA за возрасни: 1.000 до 1.200 милиграми). Калциумот земен во прекумерни количини може да резултира со токсични ефекти. За да се избегне овој ризик, внесот на калциум не треба да надминува 2.000 милиграми дневно за оние над 50 години и 2.500 милиграми за оние на возраст од 19 до 50 години.
Цинк
Цинкот се користи во многу различни процеси во организмот (RDA за мажи: 11 mg, за жени: 8 mg). Имаше неколку систематски студии по однос на нивото цинк кај МС. Резултатите од некои студии покажаа дека луѓето со MС имаат ниско ниво на цинк, додека други студии покажаа спротивност. Овие последни студии сугерираат дека цинкот може да работи за да го активира имунолошкиот систем и дека дополнителното количество на цинк може да ја влоши МС. Големиот внес на цинк може да резултира со недостаток на бакар, што може да придонесе до невролошки симптоми слични на MС.
Прочитајте повеќе:
Извор: https://multiplesclerosis.net/natural-remedies/vitamins-supplements/
Забелешка: Рубриката „Најнови информации“ е дел наменет исклучиво за вести и информации на оваа веб страница за оваа болест. Не обезбедува медицински совет, дијагноза или третман. Оваа содржина не е наменета да биде замена за професионален медицински совет, дијагноза или третман. Секогаш побарајте совет од Вашиот лекар или друг квалификуван здравствен работник за било какви прашања што може да ги имате во врска со здравствената состојба. Никогаш не занемарувајте ги или одложувајте професионалните медицински совети поради тоа што сте го прочитале на оваа веб страница. Мислењата изразени во оваа рубрика не секогаш се мислења на Националното здружение за МС и наменети се да предизвикаат дискусија за прашања кои се однесуваат на мултипла склероза.