Хипербарна кислородна терапија – природен лек во третман на различни болести
За нормално функционирање на ткивата потребен им е кислород. При повреда на ткивото потребата од кислород е уште поголема, па така со вдишување на 100% хипербарен кислород се обезбедува и до 20 пати повеќе кислород растворен во крвта, кој е доволен да ги задоволи потребите на клетките, а самото тоа ги стимулира природните механизми на заздравување на раните и се бори против инфекциите.
Хипербарната кислородна терапија (ХКТ) подразбира употреба на 100% кислород под зголемен притисок од повеќе атмосфери (бари) за медицинско-терапевтски цели. Хипербарната медицина е посебна медицинска дисциплина, а историјата на хипербарната медицина се протега 350 години наназад и е една од најстарите медицински технологии. Современата хипербарна медицина започнува 1937 година и се користела за лекување на декомпресиона болест кај нуркачи. Притоа, забележани се и други поволни ефекти врз организмот кај одредени болести, поради што е проширено нејзиното индикационо подрачје.
Денес, таа претставува најчеста дополнителна терапија и освен како третман при несреќи кај нуркачи се третираат и хронични бавно зараснувачки рани кај пациенти со дијабет, циркулаторни нарушувања, инфекции на меки ткива, остеомиелитис, повреди на ткива после радијациона терапија. Успешно се третираат изгореници, трауматски повреди, акутна глувост, ненадејно губење на видот, спортски повреди. Забележани се позитивни резултати при третирање и на невролошки состојби, оштетување на мозокот предизвикано од мозочен удар, мултипла склероза, церебрална парализа и аутизам.
Овој вид на третман кај нас е достапен од 2009 година во рамки на ЈЗУ Универзитетска клиника за пластична и реконструктивна хирургија – Скопје каде функционира хипербарна комора која овозможува на пациентите користење на најсовремен, квалитетен третман со хипербаричен кислород.