Емоционални и когнитивни промени кај мултипла склероза
Емоционалните и когнитивни ефекти на мултипла склероза (МС) честопати се најголеми предизвици.
Некои од најчестите, но скриени симптоми на МС се промените што луѓето можат да ги доживеат во врска со сознанието и нивните емоции. Овие промени можат да влијаат на начинот на кој луѓето се чувствуваат кон себе и нивните когнитивни функции. За многумина, емоционалните и когнитивните ефекти на болеста претставуваат најголеми предизвици.
Емоционални промени
Постојат голем број на емоционални предизвици со кои вообичаено се справуваат лицата со МС. Неизвесноста, стресот и вознемиреноста се најчести, не само за време на дијагностицирање, туку и во текот на болеста.
Едно лице со МС може да тагува за својот живот пред МС и тоа може да потрае некое време додека се прилагоди на новонастанатата состојба, односно МС. Други емоционални промени што можат да се појават кај МС вклучуваат клиничка депресија, биполарно растројство и промени во расположението. Сите овие се почести кај лицата со МС отколку кај општата популација. Депресијата и биполарното нарушување бараат професионално внимание и употреба на ефективни третмани.
Емоционалната лабилност се чини дека е почеста, а можеби и потешка, кај луѓето со МС. Ова може да вклучува чести промени во расположението, на пример од среќен до тажен до лут.
Се верува дека причините се дополнителниот стрес што го носи МС, како и невролошките промени.
Неконтролирано смеење и плачење е нарушување кое влијае на мал дел од луѓето со МС и се смета дека е предизвикано од промени во мозокот како резултат на МС.
Когнитивни промени
Сознанието се однесува на „повисоките“ функции на мозокот, како што се меморијата и расудувањето. Околу половина од сите луѓе со МС нема да доживеат никакви когнитивни промени, но за останатите, најчесто погодените аспекти на сознанието се:
- Меморија
- Внимание и концентрација
- Пронаоѓање на зборови
- Брзина на обработка на информации
- Апстрактно расудување и решавање на проблеми
- Визуелни просторни способности
- Извршни функции
Бидејќи МС може да влијае на кој било дел од мозокот, скоро секоја когнитивна функција може да биде нарушена, а симптомите може да се движат од благо влијание на само еден или два аспекти, па се до поприсутни промени, кои влијаат на секојдневниот живот на една личност.
Когнитивните промени може да имаат значително влијание врз способноста на една личност да работи и да ги исполни семејните одговорности. Членовите на семејството можеби не сфаќаат дека МС може да предизвика когнитивни проблеми и ова недоразбирање може да резултира во гнев и забуна.
МС е комплексна болест со многу психолошки аспекти. Успешното справување со MС бара разбирање и решавање на овие промени. Постојат многу ресурси и алатки на располагање за образование, евалуација и третман. Користејќи ги овие ресурси, едно лице со МС и неговото семејство може да продолжат да го живеат квалитетно својот живот.
Извор: https://www.msif.org/about-ms/symptoms-of-ms/cognition-and-emotional-changes/
Забелешка: Рубриката „Најнови информации“ е дел наменет исклучиво за вести и информации на оваа веб страница за оваа болест. Не обезбедува медицински совет, дијагноза или третман. Оваа содржина не е наменета да биде замена за професионален медицински совет, дијагноза или третман. Секогаш побарајте совет од Вашиот лекар или друг квалификуван здравствен работник за било какви прашања што може да ги имате во врска со здравствената состојба. Никогаш не занемарувајте ги или одложувајте професионалните медицински совети поради тоа што сте го прочитале на оваа веб страница. Мислењата изразени во оваа рубрика не секогаш се мислења на Националното здружение за МС и наменети се да предизвикаат дискусија за прашања кои се однесуваат на мултипла склероза.