Екотерапија – кога природата лекува
Дали некогаш по прошетка низ шума или можеби низ вашата градина сте почувствувале смиреност? Дали се чувствувате опуштено, но и полни со енергија по денот поминат на брегот на реката или по пливање во морето? Ако одговорот на овие прашања е да, тогаш сте ја почувствувале магијата на екотерапијата која исто така се нарекува и терапија со помош на природата.
Екотерапијата која претставува научно поле во развој се базира на истражувања кои покажуваат силна врска помеѓу времето поминато во природа и намалувањето на стресот, вознемиреноста и депресијата. Екотерапијата се заснова на идејата дека луѓето се поврзани со нивната природна средина и дека таа делува врз нив. Ова се причините зошто природата има ваква терапевтска моќ кога чувствувате вознемиреност, тага или депресија։
- Престојот во природа може да помогне во ублажување на активноста во делот од мозокот наречен префронтален кортекс. Кога се чувствувате депресивно или под голем стрес префронталниот кортекс обично ја намалува активноста што предизвикува негативни мисли. Во студијата спроведена на „Harvard University“ во 2015 година научниците ја споредиле мозочната активност кај здрави лица по 90-минутна прошетка во природа и во урбана средина. Резултатите покажале дека оние кои прошетале во природа имале помала активност во префронталниот кортекс отколку оние кои прошетале низ градот.
- Докажано е дека смирувачките звуци на природата помагаат во намалување на крвниот притисок, како и нивото на кортизол, хормон на стрес. Истражувањето објавено во медицинското списание „Scientific Reports“ објаснува како слушањето на звуци од природата создава врска помеѓу мозокот и надворешниот фокус на вниманието. Адекватен пример за ова е сонувањето. Спротивно на ова, слушањето вештачки звуци создава врска со внатрешниот фокус. Во периоди кога се јавува вознемиреност, депресија или посттрауматски стрес вниманието обично е насочено кон она што се случува „внатре во вашата глава“.
- Визуелните аспекти на природата, исто така можат да имаат смирувачки ефект. Фокусирањето на нешто пријатно, како што се дрвјата и зеленилото, ви помага да ги пренасочите вашите мисли од негативното размислување.
Неколку совети за оние кои сакаат да ја применат екотерапијата
- За да ги почувствувате придобивките поминувајте 20-30 минути во природа три пати неделно (или три цели дена ако имате можност за тоа). Дружењето со природата треба да стане дел од вашата вообичаена рутина.
- Ако не ви одговара престојот надвор или претпочитате да го поминувате времето во затворени и разладени простории, задолжително слушајте звуци од природата како би постигнале позитивни резултати. Дури и разгледувањето фотографии од природата или места кои сакате да ги посетите може да создаде позитивен ефект. Едно истражување покажува дека оние работници кои од прозорецот на нивната канцеларија можат да ја набљудуваат природата даваат подобри резултати и се позадоволни од животот во споредба со оние кои немаат таква можност.
- За дополнителен ефект, кога временските услови дозволуваат, комбинирајте прошетки во природа со редовно вежбање, како што е практикување јога во природа. Но, внимавајте да не се прегреете бидејќи тоа претставува вообичаена опасност за лицата со МС. Консултирате се со вашиот лекар пред да започнете било каква програма за вежбање.
- Иако екотерапијата често се практикува во шума, сепак локацијата нема влијание врз нејзиниот ефект. Она што е важно за екотерапијата е да ја практикувате на места каде се чувствувате пријатно. Целта е да ја избегнете стимулативната урбана средина и да бидете опкружени со природата.
- Размислете за хоби кое е поврзано со природата, како што е градинарството или цвеќарството. Копањето на земјата, сеењето семе, чистењето плевел и поткаструвањето на гранки се одличен начин да се поврзете со природата.
- Вклучете се во групи за заштита на природата. Зачувувањето или заживувањето на природата ќе ви го предизвика чувството дека сте активни во остварувањето на некаква цел, а исто така ќе ви ја разбуди и надежта. Бидејќи ваквите активности секогаш се одвиваат во група ќе ги почувствувате и придобивките од чувството за припадност како и поврзаност со останатите членови на групата.
Пред да започнете со која било од овие активности консултирајте се со вашиот лекар за да ви укаже на некои мерки на претпазливост и начини како да ја усогласите активноста со вашите симптоми.
Извор: https://neuronet.rs/ms/ms-novosti/ekoterapija-kada-priroda-leci/
Забелешка: Рубриката „Најнови информации“ е дел наменет исклучиво за вести и информации на оваа веб страница за оваа болест. Не обезбедува медицински совет, дијагноза или третман. Оваа содржина не е наменета да биде замена за професионален медицински совет, дијагноза или третман. Секогаш побарајте совет од Вашиот лекар или друг квалификуван здравствен работник за било какви прашања што може да ги имате во врска со здравствената состојба. Никогаш не занемарувајте ги или одложувајте професионалните медицински совети поради тоа што сте го прочитале на оваа веб страница. Мислењата изразени во оваа рубрика не секогаш се мислења на Националното здружение за МС и наменети се да предизвикаат дискусија за прашања кои се однесуваат на мултипла склероза.