Што треба да знаете за последните фази на мултипла склероза

Мултипла склероза (МС) е хронична болест за која не постои лек. Симптомите варираат индивидуално и не секое лице со МС развива тешка форма на болеста.

Кај некои лица МС може да доведе до сериозни попречености и животозагрозувачки компликации. Ова се нарекува крајна или финална фаза на МС.

Прочитајте за да дознаете повеќе за последната фаза на МС, како и некои информации за пораните фази на прогресија на МС кои можеби ќе сакате да ги земете предвид.

Симптоми во последната фаза на МС

Со текот на прогресијата на МС може да забележите дека симптомите стануваат посериозни, а можно е и да се соочувате со повеќе симптоми одеднаш. Симптомите може да траат подолго или да преминат во трајни.

Некои симптоми со кои може да се соочите во последната фаза на МС։

• тешкотии со рамнотежата, координацијата и држењето на телото
• ограничена подвижност или парализа
• згрутчување на крвта и рани предизвикани од притисок поради намалена подвижност
• грчеви, вкочанетост, грчеви во мускулите, тремор
• болка во мускулите, нервите и зглобовите
• сериозни тешкотии со мочниот меур и цревата
• тешкотии со дишењето поради слаби респираторни мускули
• подложност на респираторни инфекции како пневмонија
• тешкотии при голтање што може да доведе до гушење и тешкотии во исхраната
• тешкотии со говорот
• губење на видот
• когнитивни нарушувања
• замор
• депресија

Сериозни компликации

Важно е да бидете подготвени за сериозни нарушувања, како што се։

• рани предизвикани од притисок или од предолго лежење
• аспирациона пневмонија и други респираторни инфекции
• инфекции на мочниот меур и бубрезите
• депресија

Целокупната здравствена состојба може да влијае на симптомите на МС, квалитетот на живот, како и животниот век. Важно е да побарате медицинска нега за сите ваши здравствени состојби.

Третмани во последната фаза на МС

Во 2017 година „Food and Drug Administration (FDA)“ го одобри „ocrelizumab“ како прва терапија за модификацирање на болеста (DMT) за лица со прогресивна МС.

Како што објаснува „ National MS Society“, терапиите за модифицирање на болеста не делуваат толку добро кај прогресивната како кај релапсните форми на МС.

Затоа третманот за последните фази на МС се фокусира на управување со индивидуалните симптоми. Овде вклучуваме:

• помагала за мобилност
• физикална терапија
• намалување на болката

Палијативна нега

Палијативната нега може да биде корисна за лицата кои се во  последната фаза на МС. Палијативната нега го става фокусот на квалитетот на животот. Ова вклучува физичка, емоционална и духовна благосостојба. Се нарекува и супортивна нега.

Студија објавена во 2018 година ги разгледа трендовите на палијативна нега за лицата со МС. Резултатите покажале дека услугите за палијативна нега за хоспитализирани лица со МС од 2005 до 2014 година драстично се зголемиле, веројатно поради Законот за пристапна нега.

Научниците сугерираат дека кај хоспитализираните лица со МС претходното упатување на палијативна нега можеби би било поефикасно.

Грижа во последниот период од животот

МС ретко е фатална. Сепак, истражувањето сугерира дека очекуваниот животен век на лицата со МС може да биде околу 7 години пократок од оној кај општата популација.

Како што стареете МС може да има поголемо влијание врз квалитетот на вашиот живот. Во последната фаза на МС можеби ќе ви треба поголема помош за лична нега и извршување на рутински дневни задачи.

Истражувањата покажуваат дека 40 до 70 проценти од лицата со МС во одреден момент развиваат когнитивни нарушувања. Кога когнитивната функција е сериозно нарушена станува тешко да се донесат важни одлуки. Ова може да влијае на секојдневната нега, медицинските третмани и потребите на крајот на животот.

Ако имате прогресивна форма на МС вреди да размислите за вашите идни потреби пред да станат неопходни. Некои работи кои треба да се земат предвид։

• адаптации на домот и помошна технологија
• домашна нега
• институции за живеење кои обезбедуваат нега
• згрижување во дом за стари лица
• емоционални и духовни потреби
• поддршка од негуватели

Можеби ќе сакате да размислите и за понапредни опции. Овие документи може да ви помогнат да ги наведете вашите избори за третман пред време во случај да не бидете способни самостојно да донесувате одлуки подоцна. Можете исто така да именувате полномошник за здравствена заштита кој ќе делува во ваше име.

Едно истражување сугерира дека планирањето однапред може да го подобри квалитетот на живот кај некои лица со хронични здравствени состојби.

За почеток добро е да разговарате со лекар или правен застапник. За повеќе информации околу претходните опции посетете го „ Dying Matters“ и „ National Institute on Aging“.

Заклучок

Не постои лек за МС, но најчесто таа не е фатална. Прогресивната МС може да доведе до сериозни попречености и животозагрозувачки компликации. Стареењето и постоечките здравствени состојби може да ги влошат симптомите.

Со прогресирањето на МС можеби ќе имате потреба од дополнителна помош за лична нега и извршување на секојдневните задачи. Независниот живот можеби веќе нема да биде возможен.

Третманот во последните фази на МС може да вклучи палијативна нега. Тоа значи дека вашиот здравствен тим ќе се фокусира на олеснување на симптомите и ќе ви помогне да го одржите квалитетот на живот. Палијативната нега исто така може да помогне за вашата емоционална и духовна благосостојба.

Ако имате прогресивна МС разговарајте за овие теми со вашиот лекар. Истражувањето на помошната технологија и опциите за лична нега сега, може да ви помогне да бидете подобро подготвени кога ќе се појави потреба.

 

Извор: https://www.healthline.com/health/ms/multiple-sclerosis-final-stages#takeaway

Забелешка: Овој текст има информативен карактер и не обезбедува медицински совет, дијагноза или третман. Оваа содржина не е наменета да биде замена за професионален медицински совет, дијагноза или третман. Секогаш побарајте совет од Вашиот лекар или друг квалификуван здравствен работник за било какви прашања што може да ги имате во врска со здравствената состојба. Никогаш не занемарувајте ги или одложувајте професионалните медицински совети поради тоа што сте го прочитале на оваа веб страница. Мислењата изразени не секогаш се мислења на Националното здружение за МС и наменети се да предизвикаат дискусија за прашања кои се однесуваат на мултипла склероза.