Виртуелен МС Советник
Националното здружение за МС кон крајот на минатата година започна со спроведување на проект насловен „Виртуелен МС советник“.
Во текот на ноември лицата со мултипла склероза (МС), нивните негуватели и други заинтересирани лица имаа можност да поставуваат прашања по однос на сето она што ги интересира околу мултиплата склероза до високостручни лица (невролог, психолог, физиотерапевт, нутриционист), во состав:
- науч. сор. д-р Иван Барбов
- науч. сор. д-р Игор Кузмановски
- науч. сор. д-р Николина Тановска
- асс. д-р Бојан Бошковски
- асс. д-р Слободанка Бурнеска Саздова
- дипл. мед. сестра Јасминка Коруноска
- лиценциран психолог Наташа Митровска
- физиотерапевт Илија Жежов
- сертифициран нутриционист консултант Цвета Динева
На наше изненадување интересот беше забележително поголем од очекуваното и беа поставени дури и поголем број на прашања од тие што беа во план да бидат одговорени. На адресата на Националното здружение за МС пристигнаа повеќе од 100-тина прашања, секако имавме многу работа во избор и селектирање на најважните теми и веруваме дека ќе ги добиете сите потребни одговори и проектот ќе ги исполни вашите очекувања.
Од пристигнатите прашања, селектиравме вкупно 74, од кои една третина беа поставени од лица кои не се членови на Националното здружение за МС, но секако ние сме отворени за соработка и рамноправно ги вклучивме во проектот.
Во тек на декември, стручните лица даваа одговори на поставените прашања, се снимаше, монтираше и технички прилагодуваше снимениот материјал, така што почнувајќи од февруари 2021 година ќе започнеме со објавување на сите одговори на прашањата на YоuTube каналот на Националното здружение за МС.
Веруваме дека ќе понудиме квалитетен материјал, од кој ќе добиете корисни информаии и совети околу болеста со илјада лица, кои ќе ви помогнат во справување со предизвиците и ќе имаат позитивно влијание врз квалитетот на живот на пациентите со мултипла склероза и членовите на семејствата.
Следете нè!
ЗА НАЦИОНАЛНОТО ЗДРУЖЕНИЕ ЗА МС
Национално здружение за помош и поддршка на лица со мултипла склероза – Национално здружение за МС е доброволно, непрофитно, невладино и непартиско здружение на граѓани, формирано заради остварување, заштита, унапредување и усогласување на правата, потребите и интересите, како и вршење на дејности и активности со цел подигање на јавната свест за мултиплата склероза. Oсновано е на 20. март 2019 година. Од 7. мај 2020 година, Националното здружение е полноправна членка на Европската МС Платформа (анг. European Multiple Sclerosis Platfrom, EMSP) и на Светската алијанса на пациенти (World Patient Аlliance).
Потребата за формирање на здружението се наметна како резултат на неопходноста за обединување на лицата со мултипла склероза, нивните семејства со цел согледување на нивните потреби и инволвирање на останати чинители заради решавање на проблемите на лицата со МС, како и подобрување на квалитетот на нивното живеење. Исто така, секојдневниот напредок во медицината, токму во областа на неврологија бара интензивирање на реформите во оваа област.
Нашата мисија и причина за постоење е искрената желба за помош и поддршка на лицата со МС и нивните негуватели, во подигнување на свеста кај јавноста и проблематиката по однос на МС, сериозен пристап, навремена дијагностика и навремен и соодветен третман со цел спречување на прогресијата и инвалидитетот, поддршка на пациентите, едукација по однос на правата на лицата со МС и промоција на нови достигнувања во медицината.