Состанок со директорот на ЈЗУ Универзитетска клиника за неврологија-Скопје

МС Македонија
ноември 12, 2025

На 11.11.2025 година претставници на Националното здружение за мултипла склероза остварија работен состанок со директорот на ЈЗУ Универзитетска клиника за неврологија-Скопје, Асс. д-р Јован Божиновски, како и со главната сестра на клиниката мед. сестра Гордана Димеска.
На состанокот беа разговарани актуелните предизвици во пристапот до невролошки услуги, тековните потреби на пациентите со мултипла склероза, како и заедничките можности за унапредување на квалитетот на здравствената грижа.

Главните теми на разговор опфатија:

  1. Набавка на апарат за магнетна резонанца (МР)

Здружението ја нагласи важноста од пристап до модерна и безбедена дијагностика како основа за поставување на навремена дијагноза и следење на болеста кај пациентите со МС. Моменталниот капацитет на здравствените установи кои ја нудат оваа услуга е оптоварен, што резултира со долги листи на чекање и доцнење во поставување дијагноза и/или тешко следење на болеста.

Нов МР апарат достапен на Клиниката за неврологија би значел:

  • значително пократко време за МР преглед,
  • забрзано поставување на дијагноза на МС
  • подоследно следење на болеста, и
  • можност за подобра распределба на пациентите низ системот.

Директорот ја истакна подготвеноста Клиниката да работи на решенија за одржлив процес на набавка на МР во координација со Министерството за здравство.

  1. Регистар на пациенти со мултипла склероза

Разговорот опфати и иницијатива за конечно формирање официјален национален или клинички регистар.

Ваквиот регистар ќе овозможи:

  • точни податоци за бројот на пациенти, возраста и типот на заболувањето, како и други демографски податоци,
  • следење на текот на терапијата и третманските исходи,
  • подобро планирање на потребните лекови и услуги,
  • поедноставена научно-истражувачка работа.

Клиниката ја поддржа важноста на воспоставување регистар како основен инструмент за квалитетно планирање на здравствените политики.

  1. Пристап до високоефикасни терапии

Здружението ги изнесе предизвиците со кои се соочуваат пациентите при вклучување на високо-ефикасни терапии, вклучително и одложен пристап, ограничени квоти и нееднаквост во третманот.

Се разговараше за потребата од:

  • јасни, транспарентни и ажурирани протоколи за третман на МС;
  • зголемување на достапноста на високо-ефиканисни лекови;
  • унапредување на следењето на пациентите кои примаат вакви третмани.

Директорот укажа дека Клиниката континуирано работи на подобрување на пристапноста и ќе соработува со сите засегнати страни за надминување на пречките.

Заклучоци од состанокот

Во позитивен и партнерски дух, двете страни се согласија:

  • да воспостават редовна комуникација,
  • да продолжат со состаноци за следење на прогресот,
  • да работат на заеднички иницијативи за подобра грижа на пациентите со МС.

Националното здружение изрази благодарност за поддршката, за отвореноста за соработка и за подготвеноста за унапредување на услугите на Клиниката во интерес на пациентите. Директорот ја истакна подготвеноста на Клиниката за партнерски пристап со здружението, со цел да се обезбеди поквалитетна, поефикасна и постапна грижа за лицата со мултипла склероза. Од страна на здружението беше изразена благодарност за отвореноста и конструктивниот дијалог, како и за поддршката во идните активности што ќе придонесат за подобрување на положбата и третманот на лицата со МС.

На крајот, двете страни се согласија да воспостават редовна комуникација, заеднички координативни состаноци и план за следни чекори, со цел долгорочно унапредување на услугите за невролошките пациенти во државата.

За Националното здружение за МС

Национално здружение за помош и поддршка на лица со мултипла склероза – Здружение за МС е доброволно, непрофитно, невладино и непартиско здружение на граѓани, формирано заради остварување, заштита, унапредување и усогласување на правата, потребите и интересите, како и вршење на дејности и активности со цел подигање на јавната свест за мултиплата склероза. Oсновано е на 11. март 2019 година. Националното здружение е полноправна членка на Европската МС Платформа (анг. European Multiple Sclerosis Platform, EMSP), полноправна членка на Светската алијанса на пациенти  (анг. World Patient Alliance), полноправна членка на Национална Алијанса на пациентски организации (НАПО) и асоцијативна членка на Интернационална федерација за мултипла склероза (анг. MSIF, Multiple Sclerosis International Federation).

Потребата за формирање на здружението се наметна како резултат на неопходноста за обединување на лицата со мултипла склероза, нивните семејства со цел согледување на нивните потреби и инволвирање на останати чинители заради решавање на проблемите на лицата со МС, како и подобрување на квалитетот на нивното живеење. Исто така, секојдневниот напредок во медицината, токму во областа на неврологија бара интензивирање на реформите во оваа област.

Нашата мисија и причина за постоење е искрената желба за помош и поддршка на лицата со МС и нивните негуватели, во подигнување на свеста кај јавноста и проблематиката по однос на МС, сериозен пристап, навремена дијагностика и навремен и соодветен третман со цел спречување на прогресијата и инвалидитетот, поддршка на пациентите, едукација по однос на правата на лицата со МС и промоција на нови достигнувања во медицината.

За да дознаете повеќе за здружението посетете ја веб страницата.