Соопштение „Пациентите заслужуваат: терапија без долги патувања и чекање во редици“
На форум одржан неодамна, на 18 септември 2025, во хотел „Холидеј Ин“ во Скопје, претставници на пациентски здруженија, лекари, директори на универзитетски клиники и директорот на Фондот за здравствено осигурување дискутираа за децентрализација на здравствената грижа и потребата здравствените услуги да се приближат до пациентите.
Пациентите со хронични заболувања, како мултипла склероза и малигни болести, во моментов можат да ја добијат својата терапија исклучиво на универзитетските клиники во Скопје, што предизвикува финансиско оптоварубвање, потреба од патување за придружник, отсуство под работа и оптоварување на здравствениот персоналот.
Директорот на ФЗО, д-р Сашо Клековски, нагласи дека децентрализираната грижа треба да се сфати како „нормална“ грижа и дека модел каде терапијата се прима во локалните центри е изводлив и неопходен.
Претседателката на здружението, Ана Карајанова Димитрушева, во своето обраќање истакна: Според неодамна спроведената анкета од страна на Здружението, над 85% од пациентите сакаат да ја примаат или подигнуваат својата терапија за мултипла склероза поблиску до домот, веруваат дека дисперзијата на терапијата директно ќе го подобри нивниот квалитет на живот.
Оваа промена би овозможила и подобро користење на капацитетите на секундарното здравство, зголемување на услугите кои ги нудат, како и намалување на оптовареноста на терцијалните центри.
Форумот заврши со заклучок дека постои итна потреба за акција: здравствените услуги да се приближат до домовите на пациентите, што ќе донесе бенефит не само за нив и нивните семејства, туку и за здравствените работници и одржливоста на системот. На форумот беше споделено и искуството од соседна Србија каде ваков модел на онколошка грижа веќе функционира во повеќе од 30 локални центри.
Форумот беше поддржан од фармацевтската компанија „Рош Македонија ДООЕЛ Скопје“.
Што е мултипла склероза?
Мултипла склероза (МС) е една од најчестите невролошки нарушувања и причини за инвалидитет кај младите возрасни лица. Тоа е хронична, прогресивна, имунолошки посредувана, воспалителна и дегенеративна болест на централниот нервен систем. Настанува кога имуниот систем ја напаѓа обвивката на нервните клетки (миелин) во мозокот, ’рбетниот мозок и оптичките нерви, предизвикувајќи воспаление и последователна дегенерација, што води до прекин на невротрансмисијата на сигналот од една нервна клетка до друга.
Во Македонија од МС боледуваат повеќе од 2200 лица додека во светот има повеќе од 2,8 милиони лица. Многу е веројатно дека стотици илјади лица остануваат недијагностицирани и многу животи се индиректно зафатени. Повеќето лица со МС се дијагностицираат на возраст од 20 до 40 години, и околу два-три пати почесто се дијагностицираат жени наспроти мажи.
Причината за МС сѐ уште не е позната и до сега не постои лек, но постојат лекови кои можат да им помогнат на лицата со МС да ја стават болеста под контрола и постојат многу опции за подобрување и управување со симптомите.
МС го прави животот непредвидлив за секого. За да дознаете повеќе за МС посетете ја веб страницата.
За Националното здружение за МС
Национално здружение за помош и поддршка на лица со мултипла склероза – Здружение за МС е доброволно, непрофитно, невладино и непартиско здружение на граѓани, формирано заради остварување, заштита, унапредување и усогласување на правата, потребите и интересите, како и вршење на дејности и активности со цел подигање на јавната свест за мултиплата склероза. Oсновано е на 11. март 2019 година. Националното здружение е полноправна членка на Европската МС Платформа (анг. European Multiple Sclerosis Platform, EMSP), полноправна членка на Светската алијанса на пациенти (анг. World Patient Alliance), полноправна членка на Националнатан Алијансата на пациентски организации (НАПО) и асоцијативна членка на Интернационална федерација за мултипла склероза (анг: MSIF – Multiple Sclerosis International Federation).
Потребата за формирање на здружението се наметна како резултат на неопходноста за обединување на лицата со мултипла склероза, нивните семејства со цел согледување на нивните потреби и инволвирање на останати чинители заради решавање на проблемите на лицата со МС, како и подобрување на квалитетот на нивното живеење. Исто така, секојдневниот напредок во медицината, токму во областа на неврологија бара интензивирање на реформите во оваа област.
Нашата мисија и причина за постоење е искрената желба за помош и поддршка на лицата со МС и нивните негуватели, во подигнување на свеста кај јавноста и проблематиката по однос на МС, сериозен пристап, навремена дијагностика и навремен и соодветен третман со цел спречување на прогресијата и инвалидитетот, поддршка на пациентите, едукација по однос на правата на лицата со МС и промоција на нови достигнувања во медицината.
За да дознаете повеќе за здружението посетете ја веб страницата.