Достапен MS Atlas – Дел 2!
Резултатите од клиничкиот менаџмент од MS Atlas сега се достапни и подготвени за истражување.
Во септември 2020 година, Интернационалната МС федерација (MSIF) го лансираше првиот дел од MS Atlas (3-то издание), кој ни покажа дека има околу 2,8 милиони луѓе низ светот кои живеат со мултипла склероза (МС). Дел 2 од MS Atlas ги нагласува големите нееднаквости и бариери што постојат глобално во пристапот до дијагноза, терапии кои ја модифицираат болеста и услуги за нега. Исто така, се разгледува здравствената заштита, како што е бројот на здравствени работници и употребата на национални упатства или стандарди во однос на МС.
Иако, во последниве години, имаше многу важни промени во здравствената грижа за лицата со МС во врска со опциите за дијагноза и терапија, ние продолжуваме да гледаме нееднаквости ширум светот и во самите земји. Погледнете го видеото кое ги прикажува бариерите за дијагностика, достапност на третман и нега на линкот.
Ова компаративно истражување беше реализирано со помош на голем број чинители ширум светот, така што MS Atlas се потпира на релевантни податоците доставени од МС организации од целиот свет. Свој придонес дадоа повеќе од 150 стручни лица, доктори (листата е достапна тука) со соработка на повеќе од 30 организации, од повеќе од 110 земји ширум светот и секако посветена работа на огромен број координатори и колеги од сите земји кои одвоија време и вложија напор да ги соберат информациите и податоците.
Посебно сме горди, што благодарение на Националното здружение за МС, со помош и поддршка од страна на ЈЗУ Универзитетската клиника за неврологија – Скопје, за прв пат нашата земја е дел од најобемната студија за епидемиологија на мултипла склероза и глобалната достапност и пристап до ресурси за лицата со МС“ – изјави Ана Карајанова Димитрушева, Претседател на Националното здружение за МС.
Извештајот по однос на MS Atlas – Дел 2 можете да го погледнете тука.
Истражете ги алатките кои ќе ви помогнат да го користите MS Atlas. Достапен е на англиски, шпански и арапски јазик. Дознајте повеќе за податоците за клиничкиот менаџмент на веб – страницата на MS Atlas.
ЗА НАЦИОНАЛНОТО ЗДРУЖЕНИЕ ЗА МС
Национално здружение за помош и поддршка на лица со мултипла склероза – Национално здружение за МС е доброволно, непрофитно, невладино и непартиско здружение на граѓани, формирано заради остварување, заштита, унапредување и усогласување на правата, потребите и интересите, како и вршење на дејности и активности со цел подигање на јавната свест за мултиплата склероза. Oсновано е на 20. март 2019 година. Од 7. мај 2020 година, Националното здружение е полноправна членка на Европската МС Платформа (анг. European Multiple Sclerosis Platform, EMSP).
Потребата за формирање на здружението се наметна како резултат на неопходноста за обединување на лицата со мултипла склероза, нивните семејства со цел согледување на нивните потреби и инволвирање на останати чинители заради решавање на проблемите на лицата со МС, како и подобрување на квалитетот на нивното живеење. Исто така, секојдневниот напредок во медицината, токму во областа на неврологија бара интензивирање на реформите во оваа област.
Нашата мисија и причина за постоење е искрената желба за помош и поддршка на лицата со МС и нивните негуватели, во подигнување на свеста кај јавноста и проблематиката по однос на МС, сериозен пристап, навремена дијагностика и навремен и соодветен третман со цел спречување на прогресијата и инвалидитетот, поддршка на пациентите, едукација по однос на правата на лицата со МС и промоција на нови достигнувања во медицината.