Едукативни материјали за лицата со мултипла склероза и членовите на нивните семејства
Националното здружение за помош и поддршка на лица со мултипла склероза во соработка со фармацевтската компанија Biogen и стручни лица – невролози од Универзитетската Клиника за неврологија, во изминатиот период работеа на превод, адаптација и издавање на едукативни и информативни материјали наменети за лицата со мултипла склероза (МС) и лицата кои се грижат за нив.
Станува збор за шест брошури/прирачници кои би биле од голема корист имајќи ја предвид разноликоста на содржината која ја нудат:
- Разбирање на мултипла склероза (МС);
- Живот со мултипла склероза (МС);
- МС и планирање семејство (за луѓе дијагностицирани со МС);
- МС и планирање на семејство (за партнери на лицата со МС);
- МС и емоциите;
- МС и исхраната.
Сите наведени брошури нудат одлични совети за подобро менаџирање на состојбата и предизвиците со кои секојдневно се соочуваат лицата со МС и членовите на нивните семејства.
Овие прирачници ќе бидат поставени на официјалната веб страна на Националното здружение за МС во делот публикации, воедно ќе бидат достапни и во печатена форма на Клиниката за неврологија од каде сите заинтересирани лица ќе можат да подигнат примерок.
Веруваме дека овие едукативни материјали ќе бидат од посебно значење за лицата со МС, негувателите и членовите на семејствата и дека ќе најдат корисна примена во успешно справување со ова хронично заболување.
Националното здружение за МС континуирано се грижи за доброто на лицата со МС, трудејќи се со своите активности да ги опфати сите аспекти кои влијаат на подобрување на животот на лицата со МС.
ЗА НАЦИОНАЛНОТО ЗДРУЖЕНИЕ ЗА МС
Национално здружение за помош и поддршка на лица со мултипла склероза – Национално здружение за МС е доброволно, непрофитно, невладино и непартиско здружение на граѓани, формирано заради остварување, заштита, унапредување и усогласување на правата, потребите и интересите, како и вршење на дејности и активности со цел подигање на јавната свест за мултиплата склероза. Oсновано е на 20. март 2019 година. Националното здружение е полноправна членка на Европската МС Платформа (анг. European Multiple Sclerosis Platfrom, EMSP), полноправна членка на Светската алијанса на пациенти (анг. World Patient Alliance) и асоцијативна членка на Алијансата на пациентски организации (АПО).
Потребата за формирање на здружението се наметна како резултат на неопходноста за обединување на лицата со мултипла склероза, нивните семејства со цел согледување на нивните потреби и инволвирање на останати чинители заради решавање на проблемите на лицата со МС, како и подобрување на квалитетот на нивното живеење. Исто така, секојдневниот напредок во медицината, токму во областа на неврологија бара интензивирање на реформите во оваа област.
Нашата мисија и причина за постоење е искрената желба за помош и поддршка на лицата со МС и нивните негуватели, во подигнување на свеста кај јавноста и проблематиката по однос на МС, сериозен пристап, навремена дијагностика и навремен и соодветен третман со цел спречување на прогресијата и инвалидитетот, поддршка на пациентите, едукација по однос на правата на лицата со МС и промоција на нови достигнувања во медицината.