Едукативни материјали за лицата со мултипла склероза
Националното здружение за помош и поддршка на лица со мултипла склероза информира дека токму на време, пред новогодишните празници реализиравме два едукативни материјали наменети за лицата со мултипла склероза (МС) и лицата кои се грижат за нив. Веруваме дека овие материјали ќе бидат од голема корист имајќи ја предвид содржината која ја нудат.
Станува збор за „Прирачник за здрава исхрана при мултипла склероза“, дело на нашиот соработник Цвета Динева – сертифициран нутриционист консултант. Прирачникот на 73 страни, нуди голем број совети, култура на исхрана и секако најинтересниот дел огромен број на здрави рецепти кои би можеле да ги подготвувате веќе за време на празниците, така што ќе имате можност калоричната празнична трпеза да ја замените со здрава, вкусна храна, а со самото тоа и да ја подобрите вашата здравствена состојба.
Другата брошура „Замор – невидлив симптом на МС“ е одлично четиво кое е целосно посветено на еден од најмачните симптоми на мултиплата склероза. Нуди многу совети за справување, следење и подобро менаџирање на состојбата на замор. Ова едукативно издание е превземено од Интернационалната МС федерација (MSIF), кое во соработка со MSIF, покрај преводот, претрпе и одредени прилагодувања со цел целосно да одговара на потребите на лицата со МС во нашата држава.
Двете брошури се достапни во електронска форма, додека Прирачникот за здрава исхрана наскоро ќе биде достапен и во печатена форма, а лицата со МС ќе можат да го добијат на Универзитетската клиника за неврологија кон крајот на јануари.
„Ова е доказ дека Националното здружение за МС е целосно посветено и се грижи за доброто на лицата со МС, трудејќи се со своите активности да ги опфати сите аспекти кои влијаат на подобрување на животот на лицата со МС, а воедно и полесно справување со секојдневните предизвици кои ги носи оваа хронична болест“ – изјави Ана Карајанова Димитрушева, претседател на Националното здружение за МС.
ЗА НАЦИОНАЛНОТО ЗДРУЖЕНИЕ ЗА МС
Национално здружение за помош и поддршка на лица со мултипла склероза – Национално здружение за МС е доброволно, непрофитно, невладино и непартиско здружение на граѓани, формирано заради остварување, заштита, унапредување и усогласување на правата, потребите и интересите, како и вршење на дејности и активности со цел подигање на јавната свест за мултиплата склероза. Oсновано е на 20. март 2019 година. Од 7. мај 2020 година, Националното здружение е полноправна членка на Европската МС Платформа (анг. European Multiple Sclerosis Platfrom, EMSP).
Потребата за формирање на здружението се наметна како резултат на неопходноста за обединување на лицата со мултипла склероза, нивните семејства со цел согледување на нивните потреби и инволвирање на останати чинители заради решавање на проблемите на лицата со МС, како и подобрување на квалитетот на нивното живеење. Исто така, секојдневниот напредок во медицината, токму во областа на неврологија бара интензивирање на реформите во оваа област.
Нашата мисија и причина за постоење е искрената желба за помош и поддршка на лицата со МС и нивните негуватели, во подигнување на свеста кај јавноста и проблематиката по однос на МС, сериозен пристап, навремена дијагностика и навремен и соодветен третман со цел спречување на прогресијата и инвалидитетот, поддршка на пациентите, едукација по однос на правата на лицата со МС и промоција на нови достигнувања во медицината.