Резултати од спроведената анкета за задоволство од досега сработеното на здружението
![](https://msmakedonija.eu.org/wp-content/uploads/2023/04/Sales-Surveys-scaled-1.jpg)
Националното здружение за МС кон крајот на месец март оваа година, до сите членови на здружението со регистрирана емаил адреса достави кратка анкета. Целта на анкетата беше да го испитаме задоволството на членовите на здружението и да ги утврдиме новите и актуелни потреби на сите кои ни ја подариле својата доверба и се зачлениле во здружението.
Анкетата беше отворена за одговарање приближно еден месец, така што на поставените прашања свои одговори дадоа 67 лица, од кои:
-
85,1% се изјаснија дека се целосно задоволни од досегашната работа на Националното здружение,
-
13,4 % се делумно задоволни,
-
додека само еден одговор добивме дека не е задоволен/на.
Ваквата статистика ни говори дека Националното здружение за МС е на вистинскиот пат и својата работа ја извршува и развива во интерес на пациентите и нивните семејства.
На конкретно поставените прашања повеќето испитаници наведоа дека се задоволни од навремено достапните информации, ангажираност, ажурност и целосна посветеност, добивање навремени и корисни информации што ги засегаат лицата со МС, мотивирачки содржини, одлично уредена веб страница, поволности (бесплатни патарини, слободни карти за градски превоз) и попусти, професионалност и уште многу позитивни зборови.
Посебна чест ни претставува што испитaниците се исклучително задоволни од психолошката помош и правната поддршка кои имаат можност да ги користат бесплатно.
На прашањето да се посочи барем една работа/активност од која не се задоволни, најголем дел од анкетираните одговорија дека сѐ е во ред, а секако добивме и конструктивни предлози (на пр. предлози за организирање неформални средби, достапност на терапии во градот на живеење (на оваа проблематика работиме веќе подолго време), поголема контактибилност на лекарите со пациентите итн.
Секако тимот на Националното здружение за МС ќе ги согледа можностите да ги превземе сите потребни активности со цел задоволување на посочените потреби.
Тимот на Националното здружение за МС неуморно ќе продолжи со својата работа, со цел да ги задоволи потребите и барањата на своите членови, да ги подобри досегашните активности и секако да им овозможи нови пристапи, услуги и подобри можности во насока на подобрување на квалитетот на животот на лицата со мултипла склероза и нивните најблиски.
Ви благодариме на сите што земавте учество во анкетата и дадовте конструктивни предлози.
Не заборавајте, ЗАЕДНО СМЕ ПОСИЛНИ!!!
ЗА НАЦИОНАЛНОТО ЗДРУЖЕНИЕ ЗА МС
Национално здружение за помош и поддршка на лица со мултипла склероза – Национално здружение за МС е доброволно, непрофитно, невладино и непартиско здружение на граѓани, формирано заради остварување, заштита, унапредување и усогласување на правата, потребите и интересите, како и вршење на дејности и активности со цел подигање на јавната свест за мултиплата склероза. Oсновано е на 20. март 2019 година. Националното здружение е полноправна членка на Европската МС Платформа (анг. European Multiple Sclerosis Platform, EMSP), полноправна членка на Светската алијанса на пациенти (анг. World Patient Alliance) и асоцијативна членка на Алијансата на пациентски организации (АПО).
Потребата за формирање на здружението се наметна како резултат на неопходноста за обединување на лицата со мултипла склероза, нивните семејства со цел согледување на нивните потреби и инволвирање на останати чинители заради решавање на проблемите на лицата со МС, како и подобрување на квалитетот на нивното живеење. Исто така, секојдневниот напредок во медицината, токму во областа на неврологија бара интензивирање на реформите во оваа област.
Нашата мисија и причина за постоење е искрената желба за помош и поддршка на лицата со МС и нивните негуватели, во подигнување на свеста кај јавноста и проблематиката по однос на МС, сериозен пристап, навремена дијагностика и навремен и соодветен третман со цел спречување на прогресијата и инвалидитетот, поддршка на пациентите, едукација по однос на правата на лицата со МС и промоција на нови достигнувања во медицината.