Еден месец од спроведување на проектот: „Правна помош и подршка за лицата со МС“
Ве информираме дека бележиме еден месец од почеток на спроведување на проектот насловен „Правна помош и подршка за лицата со МС“.
Проектот започна во септември 2021 година и досега оваа услуга ја искористиле повеќе членови на Националното здружение за МС. Корисниците се презадоволни од можноста да се обратат на високостручни лица каде ги добиja потребните правни совети за остварување и заштита на определени права од социјална и здравствена заштита, пензиско и инвалидско осигурување, работни односи или други постапки поврзани со МС, или состојби предизвикани од МС, појаснување на правните механизми и постапките кои стојат на располагање за определено правно прашање и остварување на право.
Членовите на Националното здружение за МС кои ја користеле оваа услуга, се исклучително задоволни од пристапот и високата стручност на лицата ангажирани за реализација на овој проект, така што добивме позитивни зборови поради високиот стандард на делување, ажурноста и професионалноста.
Корисниците на услугата ја користат оваа услуга бесплатно, а сите трошоци за спроведување на истата ги покрива Националното здружение за МС.
Ги охрабруваме лицата со мултипла склероза, членови на Националното здружение за МС, доколку имаат потреба од правна помош, да не се двоумат, туку да ја користат оваа услуга.
Со тоа директно ни помагаат во навременото осознавање на правните проблеми поврзани со МС со кои се среќаваат, а воедно придонесуваат за креирање на нови алатки за едукација во врска со остварувањето на правата, како и за развивање на нови услуги кои ќе придонесат за подобрување на положбата на лицата со МС, воопшто, што впрочем се дел од главните цели на Националното здружение за МС.
Детални информации за овој вид услуга ви се достапни на следниот линк.
За Националното здружение за МС
Национално здружение за помош и поддршка на лица со мултипла склероза – Национално здружение за МС е доброволно, непрофитно, невладино и непартиско здружение на граѓани, формирано заради остварување, заштита, унапредување и усогласување на правата, потребите и интересите, како и вршење на дејности и активности со цел подигање на јавната свест за мултиплата склероза. Oсновано е на 20. март 2019 година. Од 7. мај 2020 година, Националното здружение е полноправна членка на Европската МС Платформа (анг. European Multiple Sclerosis Platform, EMSP).
Потребата за формирање на здружението се наметна како резултат на неопходноста за обединување на лицата со мултипла склероза, нивните семејства со цел согледување на нивните потреби и инволвирање на останати чинители заради решавање на проблемите на лицата со МС, како и подобрување на квалитетот на нивното живеење. Исто така, секојдневниот напредок во медицината, токму во областа на неврологија бара интензивирање на реформите во оваа област.
Нашата мисија и причина за постоење е искрената желба за помош и поддршка на лицата со МС и нивните негуватели, во подигнување на свеста кај јавноста и проблематиката по однос на МС, сериозен пристап, навремена дијагностика и навремен и соодветен третман со цел спречување на прогресијата и инвалидитетот, поддршка на пациентите, едукација по однос на правата на лицата со МС и промоција на нови достигнувања во медицината.