Има ли простор за набљудување/будно чекање кај третманот за мултипла склероза?
– Да има.
Не сите пациенти имаат активна форма на мултипла склероза, односно релапси во последните 1 до 2 години и/или нови или зголемени лезии на МР во претходните 12 месеци, па затоа нема да бидат подобни за DMT (disease modifying treatment – имуномодулаторна терапија) согласно третманските насоки. Истото важи и за лицата кои имаат прогресивна форма на мултипла склероза; сметаме дека наскоро и на овие пациенти ќе може да им се понуди соодветен третман. Наместо овие пациенти да се лекуваат, нивната здравствена состојба треба да биде следена и набљудувана. Ова се нарекува „будно чекање“.
Иако се однесува на други болести, следниот систематски преглед во библиотеката Cochrane го дефинира и прегледува овој пристап на третман.
„Будно чекање” е дефинирано како алтернативен пристап во медицинскиот менаџмент на одредени болести. Интересно е дека „будното чекање” се изедначува со „активно следење”. Проблемот кај многу невролози, кога станува збор за МС, се јавува кога „будното чекање” го сметаат за пасивен, а не активен процес. Активно следење значи невролошка опсервација на пациентот во прецизни временски интервали со цел одредување на активноста на болеста, а за ова да се случи потребно е снимање на магнетна резонанца и редовни прегледи.
Заклучоците од овој преглед ни го кажуваат следното:
… процесот на донесување одлука за избор на будно чекање е сложен. Преку процесот, пациентите и нивните блиски доживуваат низа емоции кои честопати доведуваат до неизвесност и вознемиреност. Откако ќе се донесе одлуката, пациентите мора да се справат со сознанието дека имаат вознемирувачка дијагноза и да ги направат потребните прилагодувања. Емпатичната, смирувачка врска со вашиот лекар го олеснува товарот на овој процес. Лекарите треба да се свесни дека не сите пациенти се „помирени“ со одлуката да изберат будно чекање. Во овој период неизвесноста и стравот како и чувството на стрес и вознемиреност може да се интензивираат. Пациентите и нивните блиски честопати се обидуваат да се прилагодат на најдобриот начин кој го знаат, но треба да се процени ефективноста на нивните стратегии за справување. Покрај тоа, лекарите треба да бидат свесни дека со зголемената вознемиреност и стрес поврзани со будното чекање, разбирањето на информациите од здравствената заштита и можноста за поставување прашања од страна на пациентите може да бидат намалени. Лекарите, како и пациентите имаат корист од отворени дискусии поврзани со многу аспекти на несигурност и страв во врска со донесувањето и живеењето со одлуката. Се препорачува користење на заеднички модел на донесување одлуки во врска со управувањето со низата прашања што произлегуваат од донесувањето на одлуката, како и живеењето со неа. Се чини дека пациентите се многу чувствителни и препознаваат кога на грижата што ја добиваат и недостасува емпатија. Комуникацијата која е отворена, емпатична и без осуда е од суштинско значење. Потребно е да се пренесе охрабрување и подготвеност за дискутирање на чувствителни теми како што е сексуалната дисфункција. И на крај, лекарите, како и целокупниот медицински персонал треба да бидат внимателни и да ја согледаат важноста од артикулирање на аспектите на ситуацијата кои влеваат надеж и се гледаат оптимистички, бидејќи многу пациенти за време на посетите на лекар ги примаат знаците за нивниот здравствен статус од невербалните и вербалните интеракции.
Забелешка: Рубриката „Најнови информации“ е дел наменет исклучиво за вести и информации на оваа веб страница за оваа болест. Не обезбедува медицински совет, дијагноза или третман. Оваа содржина не е наменета да биде замена за професионален медицински совет, дијагноза или третман. Секогаш побарајте совет од Вашиот лекар или друг квалификуван здравствен работник за било какви прашања што може да ги имате во врска со здравствената состојба. Никогаш не занемарувајте ги или одложувајте професионалните медицински совети поради тоа што сте го прочитале на оваа веб страница. Мислењата изразени во оваа рубрика не секогаш се мислења на Националното здружение за МС и наменети се да предизвикаат дискусија за прашања кои се однесуваат на мултипла склероза.