Симптоми на мултипла склероза
Мултипла склероза (МС) често се споредува со ненајавен гостин што доаѓа кај вас дома сосе багаж и никогаш не си оди. Овој гостин има намера да го распостели својот багаж во една соба во куќата, влијаејќи на начинот на живеење и на активностите на целото домаќинство. Најпредвидлива карактеристика на мултиплата склероза е непредвидливоста. Не постојат две личности што имаат ист тек на лекување и секоја единка, со текот на времето, ги искусува промените во однесувањето на болеста. Непредвидливоста предизвикува не само физички туку и психолошки проблеми кај луѓето со мултипла склероза. МС е натрапник на кого целото семејство мора да се навикне.
Симптомите на мултипла склероза се разновидни и многубројни. Кај повеќето болни, симптомите се јавуваат повремено и со прогресијата на болеста може да го менуваат својот интензитет и траење, во зависност од тоа кој дел од мозокот и ’рбетниот мозок се зафатени со болеста. Немаат сите болни исти симптоми. Тие се разликуваат од еден до друг, а кај некои болни и варираат со текот на времето. Личност што е болна од МС ќе се соочи со повеќе од еден симптом, но никогаш со сите. Симптомите може да се појават поединечно или во комбинација, во траење од неколку недели до неколку месеци по јавувањето.
Почетните симптоми на МС, според редоследот на зачестеноста, се: субјективни пречки кај сетилата, намалување на острината на видот, губење сила во еден или во повеќе екстремитети, двојни слики, нарушување на рамнотежата и вртоглавица.
Најчести симптоми на МС се: нарушување на чувството за осет (хипоестезија), слабост во мускулите, болни грчеви во мускулите (спазми), отежнато движење, проблеми со координација и рамнотежа (атаксија), проблеми со говорот (дисартрија) или проблеми со голтање (дисфагија), проблеми со видот, проблеми со сфинктерите, сексуални проблеми, акутна или хронична болка и когнитивни и емотивни нарушувања. Чест симптом на МС е спастицитет, состојба во која мускулите со спротивни функции истовремено контрахираат или се релаксираат, а настанува поради зголемен мускулен тонус (напнатост).
Дополнително: Причини за појава на МС.