11 размислувања за рефлексологијата
Рефлексологијата претставува примена на соодветен притисок врз одредени точки и области на стапалата, рацете и ушите. Рефлексолозите веруваат дека овие рефлексни точки одговараат на различни органи и системи на телото и дека нивното притискање има корисен ефект врз здравјето на една личност. Овој тип на терапија понекогаш се користи за третман на лица со мултипла склероза и се смета за форма на комплементарна и алтернативна медицина. Ако размислувате да пробате третман со рефлексологија во следниов преглед може да се информирате што може да очекувате։
- Насоките за третман на МС дадени од Американската академија за неврологија (American Academy of Neurology) даваат препораки базирани на докази за многу „Complementary and Alternative Medicine (CAM)“ практики, вклучително и рефлексологија: „Рефлексологијата веројатно е ефикасна за намалување на парестезијата поврзана со МС во текот на 11 недели…. Податоците се нецелосни за да се поддржи или побие употребата на рефлексологија за болка, квалитетот на животот поврзан со здравствената состојба (health-related quality of life HRQOL), попреченост, спастичност, замор, когнитивни функции, функција на дебелото црево/мочниот меур, депресија, вознемиреност или несоница кај МС“. Парестезијата е абнормална сензација која се манифестира со пецкање, скокоткање, боцкање, вкочанетост или печење.
- Едно истражување спроведено кај лица со МС сугерира дека рефлексологијата може да ги подобри тешкотиите поврзани со функцијата на мочниот меур, сензорни тешкотии и вкочанетост на мускулите. Сепак, треба да се спроведат повеќе истражувања со цел да се утврди дали рефлексологијата има дефинитивни терапевтски ефекти.
- Рефлексологијата треба да претставува додаток на терапијата и грижата обезбедена од примарното здравство, а не решение или замена за професионална медицинска нега. Многу лица со МС пријавуваат дека рефлексологијата им помогнала, додека пак многу други велат дека се чини дека воопшто немало ефект.
- Изберете обучен рефлексолог за спроведување на третманот со рефлексологија. Оние кои практикуваат рефлексологија, исто така може да бидат киропрактичари, масери и физиотерапевти.
- Иако рефлексологијата е повеќе од само масажа, типична сесија често започнува со масажа на стапалото и е проследена со стимулација на рефлексните точки на стапалата, рацете и/или ушите.
- Рефлексолозите го делат телото на десет еднакви вертикални зони, пет десно и пет лево. Табелите за стапала и раце им помагаат на рефлексолозите да се водат додека вршат притисок врз одредени области. Секоја нога, рака и уво се поврзани само со деловите на телото и органите на истата половина од телото.
- Понекогаш рефлексологот користи предмети како што се гумени ленти, дрвени стапчиња, гумени топчиња или други материјали за примена на терапијата.
- Рефлексолозите применуваат терапија која помага во ослободување од стресот, со цел да му овозможат на телото да заздрави и да се регенерира. Постојат неколку теории за тоа како функционира овој процес.
- Според една теорија примената на притисок од страна на рефлексолог врз стапалата, рацете или ушите испраќа смирувачка порака од периферните нерви во овие екстремитети до централниот нервен систем, што пак сигнализира телото да го прилагоди нивото на стрес. Ова ја подобрува целокупната релаксација, ги доведува внатрешните органи и нивните системи во состојба на оптимално функционирање и го зголемува снабдувањето со крв (што носи дополнителен кислород и хранливи материи во клетките и го подобрува отстранувањето на отпадот). Тоа пак позитивно влијае на циркулаторниот, респираторниот, ендокриниот, имунолошкиот и невропептидниот систем во телото.
- Друга теорија сугерира дека постои „витална енергија“ во човечкото тело. Ако стресот не се намали, тоа доведува до намалување на енергијата, што пак предизвикува телесна неефикасност, што може да доведе до болест. Според оваа теорија, рефлексологијата помага да се задржи протокот на енергија. Рефлексолозите честопати се осврнуваат на нечиј „Qi“, што е термин кој во кинеската филозофија означува „материјална енергија“, „животна сила“ или „проток на енергија“. Чи (Qi) претставува централен основен принцип во традиционалната кинеска медицина и кинеските боречки вештини.
- Рефлексологијата генерално е добро прифатена, без познати сериозни несакани ефекти. Лицата со заболувања на нозете, како што се гихт, чиреви, васкуларни заболувања и артритис, треба да му пристапат на овој третман со претпазливост. Рефлексологијата обично не се смета за третман кој предизвикува болка.
Извор: https://www.msfocusmagazine.org/Magazine/Magazine-Items/Posted/11-Reflections-on-Reflexology
Забелешка: Рубриката „Најнови информации“ е дел наменет исклучиво за вести и информации на оваа веб страница за оваа болест. Не обезбедува медицински совет, дијагноза или третман. Оваа содржина не е наменета да биде замена за професионален медицински совет, дијагноза или третман. Секогаш побарајте совет од Вашиот лекар или друг квалификуван здравствен работник за било какви прашања што може да ги имате во врска со здравствената состојба. Никогаш не занемарувајте ги или одложувајте професионалните медицински совети поради тоа што сте го прочитале на оваа веб страница. Мислењата изразени во оваа рубрика не секогаш се мислења на Националното здружение за МС и наменети се да предизвикаат дискусија за прашања кои се однесуваат на мултипла склероза.