Неодговорени прашања
Претпоставувам дека многу од нас си поставиле безброј прашања откако биле дијагностицирани со МС. Дали ќе можам да се движам единствено во инвалидска количка? Дали терапијата која ја примам е делотворна? Дали можеби претерувам? Листата продолжува во недоглед.
Се прашувам „дали е ова нормално”?
Дали и вие си ги поставувате овие прашања? Можеби сте се запрашале։ „Каков ќе биде мојот живот по 20 години”? Постојат толку многу прашања кои нѐ засегаат, но на некои од нив немаме одговори. Многумина, а и јас, се прашуваат „Дали е ова нормално”? Дали е вообичаено да се чувствувате на одреден начин кога имате МС? Дали некои од симптомите се вообичаени? Дали воопшто постои нешто “нормално” во врска со МС?
Временските промени и како тие влијаат врз МС
Како што сме сведоци и во моментов, во централен Texas температурите се движат од точка на мрзнење па се до дваесеттина степени целзиусови и повторно назад под нулата. Ова на моето тело воопшто не му се допаѓа. Па така јас се прашувам дали е “нормално” моето тело да се однесува вака прилагодувајќи се на временските услови во Texas или имам нов релапс?
Спастичност, слабост и влечење на стапалото
Во моментов кај мене спастичноста е МНОГУ зголемена. Во минатото МС влијаеше на десната страна на моето тело така што секогаш е послаба од левата. Но, сега десната страна на телото е исклучително слаба. Почнав да ја завлекувам левата нога кога чекорам (влечење на стапалото). Бидејќи не постои вистински начин да се дознае што го предизвикува ова, малку наликува и на игра на чекање. Единствено преку преглед на МР може да откријам дали имам нова активност на болеста или не.
Се прашувате што ќе донесе иднината
Не се прашувам дали ќе завршам во инвалидска количка, бидејќи веќе имав потреба од неа, но се прашувам дали во блиска иднина повторно ќе ми треба.
Додека поминувам низ сево ова блиски луѓе ми велат да не се грижам и да не “претерувам”. Од ова произлегува уште едно прашање без одговор։ дефинирајте што е „претерување”. Така наместо да ги правам работите кои ги планирав да ги завршам викендов, седнав и решив да го напишам сето ова.
Секогаш се појавуваат нови прашања
Веројатно сте се запрашале дали прашањата на кои нема одговор се неисцрпни? Мене ми се чини дека секогаш кога ќе најдам одговор на едно се појавува друго прашање.
На пример, во минатото кога имав нова активност на болеста кое се идентификуваше на снимката од МР се прашував зошто? Што точно ја предизвикува? Дали треба да променам некои работи во мојата секојдневна рутина? Дали треба да го напуштам Texas во летниот период кога температурите се искачуваат и до 40 степени целзиусови? Да, за овие прашања може да сретнете сугестии, но не и издржани одговори.
Прашања кои си ги поставував кога прв пат ми беше дијагностицирана МС
Се сеќавам кога ја добив дијагнозата најголемото прашање кое го имав беше: „Зошто јас?“ Што направив за да добијам МС? Како лекарите се сигурни дека само затоа што сум млад имам релапсно – ремитирачка форма на МС (РРМС), а не прогресивна? Ми беше кажано дека е добро што МС е дијагностицирана во рана фаза, на 22 годишна возраст, бидејќи можам да се обидам да ја забавам прогресијата на болеста.
Кога навистина започнаа симптомите на МС кај мене?
Во тоа време посетував различни лекари специјалисти и сите ме прашуваа “кога се појавија првите симптоми?” Јас искрено немам поим… Мислам дека знам кога за прв пат почувствував вкочанетост на лицето што и предизвика неколку месеци подоцна да бидам дијагностициран со МС. Но, сега кога ги знам сите симптоми кои може да ги предизвика МС, сфаќам дека постоеле знаци години пред да бидам дијагностициран, но јас едноставно не знаев.
Уморни сте од тоа да имате повеќе прашања отколку одговори
Ова се само дел од прашањата кои ми минуваат низ главата, а сигурен сум дека си ги поставуваат и многу од вас. Единствено се надевам дека некогаш во иднина ќе имаме одговори на сите овие прашања и дека нема да ја имаме МС воопшто за да се справуваме со неа.
Она што со сигурност можам да кажам е дека веќе сум многу уморен од прашањата кои си ги поставувам, а немаат одговор.
Извор: https://multiplesclerosis.net/living-with-ms/unanswered-questions
Забелешка: Рубриката „Најнови информации“ е дел наменет исклучиво за вести и информации на оваа веб страница за оваа болест. Не обезбедува медицински совет, дијагноза или третман. Оваа содржина не е наменета да биде замена за професионален медицински совет, дијагноза или третман. Секогаш побарајте совет од Вашиот лекар или друг квалификуван здравствен работник за било какви прашања што може да ги имате во врска со здравствената состојба. Никогаш не занемарувајте ги или одложувајте професионалните медицински совети поради тоа што сте го прочитале на оваа веб страница. Мислењата изразени во оваа рубрика не секогаш се мислења на Националното здружение за МС и наменети се да предизвикаат дискусија за прашања кои се однесуваат на мултипла склероза.