Мултипла склероза и оралното здравје
Мултипла склероза (МС) е доживотна болест која влијае на мозокот, ‘рбетниот мозок и оптичките нерви. МС може негативно да влијае на рамнотежата, контролата на мускулите и видот, како и на многу други функции на телото. Исто така, моторната функција и координацијата се силно засегнати што резултира со мускулна слабост и спастичност. Следствено, секојдневните задачи како држење четка за заби стануваат речиси невозможни. Тешкотиите со координацијата и заморот исто така влијаат на квалитетната грижа и нега на забите. Лицата со МС се изложени на поголем ризик од заболувања на забите поради компликациите предизвикани од МС. Самата болест ги зафаќа забите и непцата на биохемиско ниво. Лековите кои се користат во третманите на МС исто така може да доведат до компликации.
Поврзаноста помеѓу МС и оралното здравје
Постои причинско-последична врска помеѓу МС и оралното здравје. Една од главните карактеристики и симптоми на МС е зголеменото ниво на воспалителни процеси. Ова се случува како резултат на влошување на функцијата на имунолошкиот систем. Поради ова поголема е веројатноста да се појават гингивитис и пародонтална болест (болест на непцата). Кога се јавува воспаление поради природата на гингивитисот, се манифестира и како влошување на симптомите на МС. Овие симптоми на МС за возврат ослободуваат хемикалии кои продираат во мембраната на непцата и предизвикуваат поголемо воспаление. Тоа е циклус кој никогаш не завршува и без стоматолошка интервенција го влошува здравјето на пациентот. Стоматолошките процедури може да се користат за лекување на заболувањата на непцата и нивните симптоми. Без соодветна превенција оралното здравје на пациентот ќе продолжи да се влошува.
Лековите кои се користат за третирање на МС, а се внесуваат орално, исто така значително придонесуваат за појава и симптоми на орално заболување. Многу лекови за МС имаат за цел да го вратат во нормала и да го контролираат имунолошкиот систем. Овие лекови може да предизвикаат сува уста (ксеростомија), отечени непца (гингивална хиперплазија), орални улкуси (улцеративен стоматитис), орален дрозд (кандидијаза) и реактивирање на вирусите на херпес. Недостатокот на плунка може да доведе до бројни проблеми со забите. Плунката е потребна за да се намалат наслагите, да се запре размножувањето на бактерии и да се измијат остатоците од храна. Без доволно плунка може да се развијат болести на непцата и расипување на забите. Другите несакани ефекти на лековите за МС, како што се оралните чиреви и отечените непца, го прават болно, па дури и невозможно правилното четкање и чистење со конец на забите.
Одржување на квалитетна орална хигиена и орално здравје
Денталната нега е исклучително важна за лицата со МС. Одржувањето квалитетна орална хигиена може да ги намали симптомите. Важно е редовно да се посетува стоматолог. За пациентите со МС препорачана е посета на стоматолог најмалку на две години. Во зависност од тоа дали пациентите се способни да одржуваат квалитетна орална хигиена во својот дом, прегледите може да се закажуваат и почесто. Постојат неколку стоматолошки совети кои можат да помогнат да се намалат негативните орални симптоми. Кога се справуваат со замор пациентите може да седнат додека ги мијат забите. Тие исто така можат да користат конец за чистење додека се во кревет. Ако пациентот се соочува со тешкотија да ја држи четката за заби, обидете се да ја обвиткате рачката со некој рапав материјал. Исто така може да се обидат да користат посебни ракавици со тежина за да ги стабилизираат движењата на рацете. Електричните четки за заби се одлична алтернатива која би требало да се земе предвид. Користете формулирано средство за плакнење уста или џвакајте мастика без шеќер за да ја стимулирате плунката во случаи на сува уста.
Извор: https://www.myhopedental.com/ms-and-oral-health/
Забелешка: Овој текст има информативен карактер и не обезбедува медицински совет, дијагноза или третман. Оваа содржина не е наменета да биде замена за професионален медицински совет, дијагноза или третман. Секогаш побарајте совет од Вашиот лекар или друг квалификуван здравствен работник за било какви прашања што може да ги имате во врска со здравствената состојба. Никогаш не занемарувајте ги или одложувајте професионалните медицински совети поради тоа што сте го прочитале на оваа веб страница. Мислењата изразени не секогаш се мислења на Националното здружение за МС и наменети се да предизвикаат дискусија за прашања кои се однесуваат на мултипла склероза.