Мултипла склероза и возраста

МС Македонија
септември 8, 2021

Начини на кои вашата состојба прогресира со текот на годините

  • Возраст при појавата на првите симптоми
  • Прв напад
  • Релапсно – ремитентна МС (РРМС)
  • Примарно прогресивна МС (ППМС)
  • Секундарно прогресивна МС (СПМС)
  • Заклучок

Симптомите на мултипла склероза (МС) најверојатно ќе се променат со возраста бидејќи болеста обично следи шема која се движи низ различни варијации или типови со текот на годините.

Вашиот лекар најчесто не може да предвиди како болеста ќе прогресира со текот на времето. Но, напредокот во истражувањата нуди подобри третмани како би се забавила прогресијата на болеста и би се овозможил подобар квалитет на живот на лицата кои живеат со МС.

Возраст при појавата на првите симптоми

МС може да се развие на било која возраст иако најчесто се дијагностицира кај лица на возраст од 20 до 40 години.

МС го оштетува миелинот, заштитната обвивка околу нервите. Ова оштетување го прекинува протокот на нервните импулси од мозокот до телото. Колку е поголема штетата што е нанесена на миелинот толку потешки ќе бидат вашите симптоми.

Симтомите на МС се различни кај секого. Динамиката со која болеста прогресира и симптомите со кои се соочувате не мора да бидат исти како кај останатите.

Првиот напад

МС најчесто започнува со еден напад. Одеднаш видот ви се заматува и чувствувате слабост и вкочанетост во нозете. Кога овие симтоми се појавуваат прв пат и траат повеќе од 24 часа се нарекуваат “клинички изолиран синдром (CIS)”.

CIS обично се појавува на возраст меѓу 20 и 40 години. Предизвикан е од воспаление или оштетување на миелинот во централниот нервен систем. Иако не е секогаш случај CIS може да претставува предупредување за појава и развој  на првите симптоми на МС.

Меѓу 30 и 70 проценти од лицата со CIS развиваат МС. Ако при прегледот на Магнетна резонанца (МР) се покажат лезии на мозокот, тогаш е многу веројатно дека ќе се развие МС.

Релапсно – ремитентна МС (РРМС)

Дури до 85% од луѓето во раната фаза се дијагностицираат со РРМС. Обично се појавува во дваесеттите или триесеттите години од животот но, и тоа не секогаш е правило.

Кај РРМС нападите врз миелинот предизвикуваат периоди на појава на симптоми кои се нарекуваат релапси. За време на релапс симптомите може да вклучуваат:

  • Вкочанетост или тремор
  • Слабост
  • Губење на видот
  • Двојна слика
  • Замор
  • Тешкотии со рамнотежата

Секој релапс може да трае од неколку дена до неколку месеци. Симптомите и нивната комплексност можат да бидат различни кај секого.

По релапс следува  период без симптоми наречен ремисија. Секоја ремисија трае неколку месеци или години. Болеста не напредува за време на ремисија.

Некои лица остануваат во РРМС и до неколку децении. Други напредуваат во секундарно-прогресивна форма во рок од неколку години. Невозможно е да се предвиди како ќе се развива болеста кај секој поединец, но новите третмани помагаат да се забави прогресијата на МС во целост.

Примарно прогресивна МС (ППМС)

Околу 15% од лицата со МС се дијагностицирани со примарно прогресивна форма. ППМС обично се појавува од средината до крајот на триесеттите години од животот.

Кај ППМС симптомите и степенот на оштетување на нервниот систем постепено прогресираат со текот на времето. Нема вистински периоди на ремисија. Состојбата постепено прогресира и може да доведе до тешкотии при движењето и исполнување на другите секојдневни обврски.

Секундарно прогресивна МС (СПМС)

СПМС е фаза што следи по РРМС. Кај овој тип на МС оштетувањето на миелинот се зголемува со текот на времето. Во оваа фаза долгите ремисии не се случај како кај РРМС. Зголемувањето на оштетувањето на нервниот систем  доведува до развој на потешки симптоми.

Во минатото околу половина од лицата со РРМС преминале во фаза на СПМС во рок од 10 години, а 90% преминале во фаза на СПМС во период од 25 години. Со употреба на новите лекарства за МС помалку луѓе напредуваат кон СПМС, а транзицијата се случува многу побавно. Експертите сѐ уште немаат сознанија колку овие третмани можат да помогнат во одложување на прогресијата на СПМС.

Заклучок

МС е болест која започнува рано во животот и напредува со текот на времето. Кај повеќето лица започнува со појава на релапсно-ремитентна форма (РРМС), наизменични периоди на симптоми наречени релапси со периоди без симптоми наречени ремисии.

Без третман болеста се развива во секундарно-прогресивна форма. Новите и поефикасни третмани ја забавуваат прогресијата на МС понекогаш со децении.

 

Извор: https://www.healthline.com/health/ms/ms-and-age

Забелешка: Рубриката „Најнови информации“ е дел наменет исклучиво за вести и информации на оваа веб страница за оваа болест. Не обезбедува медицински совет, дијагноза или третман. Оваа содржина не е наменета да биде замена за професионален медицински совет, дијагноза или третман. Секогаш побарајте совет од Вашиот лекар или друг квалификуван здравствен работник за било какви прашања што може да ги имате во врска со здравствената состојба. Никогаш не занемарувајте  ги или одложувајте професионалните медицински совети поради тоа што сте го прочитале на оваа веб страница. Мислењата изразени во оваа рубрика не секогаш се мислења на Националното здружение за МС и наменети се да предизвикаат дискусија за прашања кои се однесуваат на мултипла склероза.