Лицата со МС се изложени на поголем ризик од рак поради причини кои го вклучуваат начинот на живеење
Според француската студија во која биле вклучени речиси 100.000 пациенти, лицата со мултипла склероза (МС) се изложени на поголем ризик од развој на рак отколку општата популација,.
Овој зголемен ризик беше особено очигледен за ракот на простата, дојка, колоректален и анален карцином, како и рак на душникот, бронхиите и белите дробови. Научниците сугерираат дека изборот на животниот стил – како дебелината во раната зрела возраст или пушењето – како и некои неопходни одлуки кои се поттикнати од болеста се главна причина за тој поголем ризик.
Студијата, „incidence and risk of cancer among Multiple Sclerosis patients: a matched population-based cohort study“ беше објавена во „European Journal of Neurology“.
МС е хронична, автоимуна состојба поврзана со погрешен имунолошки одговор насочен кон миелинот, масната супстанција која ги покрива нервните влакна и е клучна за ефикасна комуникација помеѓу нервните клетки.
Лицата со МС имаат нарушена рамнотежа помеѓу инфламаторните (воспалителни) клетки, кои помагаат да се заштити телото од инфекции, и регулаторните Т-клетки, кои спречуваат прекумерни имунолошки реакции.
Постојат некои докази дека зголеменото воспаление предизвикано од специфични клетки и имуносупресија предизвикана од Т-клетките може да промовираат рак.
„Бидејќи имунолошкиот систем игра важна улога кај МС како и кај ракот, се чини веродостојно дека ризикот од рак е променет кај лицата со МС“, напишаа истражувачите. „Ризикот од рак кај лицата со МС е широко истражен, но резултатите сè уште не се конечни“.
За да се утврди овој ризик кај лицата со МС, истражувачите од „ Bordeaux PharmacoEpi и Merck KGaA“ (во Северна Америка познат како „ EMD Serono“) ги истражуваа стапките на рак кај 95.474 лица со МС вклучени во националната француска база на податоци за здравствена заштита од 2008 до 2014 година. Еднаков број испитаници од општата популација, усогласени со пациентите по возраст и пол, беа користени како контролна група.
Во просек, двете групи биле на возраст од околу 47,1 година, а 72,4% од нив биле жени. Просечното следење траеше 6,2 години.
Стапката на инциденца на рак (со исклучок на немеланомниот карцином на кожата) за лицата со МС беше проценета на 576 на 100.000 лица/години – мерење што го зема предвид бројот на испитаници во студијата и времето кое секое лице го поминува во неа. Спротивно на тоа, стапката на инциденца кај контролната група беше проценета на 424 на 100.000 лица/години.
Статистичките анализи потоа покажаа дека вкупниот ризик од рак е за 36% поголем кај лицата со МС отколку кај општата популација, при што резултатите се слични кај мажите и жените, како и кај различните возрасни групи.
Жените со МС имаа малку поголем ризик од рак на дојка (12% поголем) од оние во контролната група, но ова ја изгуби статистичката значајност кога ризикот беше повторно проценет според возраста.
Истражувачите сугерираат дека раѓањето помалку деца и одложувањето на бременоста до подоцнежниот живот, кои се вообичаени кај лицата со МС, “би можеле да го објаснат моментално забележаниот тренд на зголемен ризик од рак на дојка“.
Во меѓувреме, мажите со МС имале зголемен ризик од рак на простата (над два пати) во споредба со контролната група, особено мажите постари од 50 години.
Според истражувачите, ова може да се должи на тоа што лицата со МС се подложни на повеќе дијагностички проверки од оние без МС, со оглед на вообичаената природа на уринарните нарушувања како што болеста напредува.
Ризикот од колоректален и анален карцином бил исто така умерено поголем (35% повеќе) кај лицата со МС, особено кај мажите на возраст од 60-69 години (78% зголемен ризик, во споредба со мажите од контролната група на иста возраст). Ризикот не бил толку висок кај жените од иста возрасна група (46%).
Тимот забележа дека зголемениот ризик кај постарите мажи сугерира дека изборот на животниот стил може да игра улога во развојот на колоректалниот и аналниот карцином.
„Повеќе студии забележаа дека дебелината во раната зрелост може да придонесе за зголемен ризик од развој на МС. Зголемувањето на индексот на телесна маса, (мерка за телесните масти) кај мажите, потенцијално поврзано со висцерална дебелина, исто така е познато дека е поврзано со зголемен ризик од колоректален карцином“, напишаа истражувачите.
Конечно, лицата со МС имале 2,3 пати поголем ризик за рак на душникот, бронхот и белите дробови. Овој ризик беше особено висок кај мажите и кај средовечните и постарите пациенти (40-69 години).
„Забележавме поголем ризик од рак на бронхот на душникот и рак на белите дробови кај лицата со МС, што може да се поврзе со индивидуалните навики како што е пушењето“, напишаа истражувачите. „Студиите забележаа прекумерно пушење кај лицата со МС во споредба со општата популација, што може да биде причина за овој зголемен ризик од рак“.
Зголемениот ризик од рак севкупно може да се објасни со хроничното воспаление предизвикано од МС и употребата на имуносупресиви, што резултира со „губење на имунолошката заштита од рак“, забележа тимот.
Од страна на истражувачите беа забележани некои ограничувања на студијата, имено двете групи не беа усогласени во демографските карактеристики, ниту резултатите беа приспособени за други клинички состојби или здравствени навики, како што се пушењето, исхраната и физичката активност. Дополнително, студијата не ги зема предвид потенцијалните ефекти на терапиите за МС врз ризикот од рак.
Лицата со МС имаа зголемен ризик од рак во споредба со контролната група, особено за рак на простата, колоректален и анален карцином, рак на бронхот на душникот и рак на белите дробови, кои можеби биле предизвикани од основните здравствени навики или начин на живот“, заклучија истражувачите.
Забелешка: Овој текст има информативен карактер и не обезбедува медицински совет, дијагноза или третман. Оваа содржина не е наменета да биде замена за професионален медицински совет, дијагноза или третман. Секогаш побарајте совет од Вашиот лекар или друг квалификуван здравствен работник за било какви прашања што може да ги имате во врска со здравствената состојба. Никогаш не занемарувајте ги или одложувајте професионалните медицински совети поради тоа што сте го прочитале на оваа веб страница. Мислењата изразени не секогаш се мислења на Националното здружение за МС и наменети се да предизвикаат дискусија за прашања кои се однесуваат на мултипла склероза.