Што претставува Лермитов синдром (Lhermitte’s sign)

Лермитов синдром (лермитов знак) е кратко, интензивно чувство кое се доживува слично на електричен шок кој поминува низ вратот и ‘рбетот и зрачи низ трупот и екстремитетите.

Може да се појави кај лица со МС, но може да влијае и на луѓе кои не живеат со МС.

Некои го нарекуваат „феномен на берберско столче“, бидејќи може да се појави кога нагло ја наведнуваме главата нанапред.

Оние кои ја доживеале, сензацијата ја споредуваат со електричен удар. Ова е резултат на стимулација на иритираните нерви или на ‘рбетниот мозок и предизвикува слично чувство како удирање во лактот „funny bone“

Во оваа статија се осврнуваме на причините за појава на Лермитовиот синдром и како тој се поврзува со МС. Исто така ги разгледуваме и опциите за третман и објаснуваме кога и дали е потребно да се посети лекар.

Причини за Лермитовиот синдром

Лермитовиот синдром најчесто се јавува кај МС. МС се појавува кога телото погрешно го напаѓа централниот нервен систем (ЦНС). ЦНС го опфаќа мозокот и ‘рбетниот мозок.

МС ја оштетува миелинската обвивка која е заштитниот, изолационен материјал кој ги обложува нервните влакна во мозокот и ‘рбетниот мозок.

Ова оштетување го прекинува протокот на сигнали низ делови од ЦНС, што резултира со низа сензорни и моторни симптоми.

Постојат две главни причини за појава на Лермитовиот синдром. Првата е демиелинизација или оштетување на миелинот околу нервите. Втората е хиперексцитабилност, што претставува зголемено оштетување на нервните влакна во мозокот.

Погрешната комуникација помеѓу оштетените нервни влакна, исто така, може да предизвика Лермитов синдром.

Лермитовиот синдром е присутен и кај други демиелинизирачки нарушувања, како што е оптички невромиелит (neuromyelitis optica), кој влијае на оптичкиот нерв и ‘рбетниот мозок.

Може да се појави и при други медицински состојби и третмани кои влијаат на ‘рбетниот мозок во регионот на вратот.

Тука спаѓаат։

• компресија на ‘рбетниот мозок предизвикана, на пример, од тумор
• повреда на ‘рбетниот мозок
• радикулопатија
• цервикален спондилитис
• трансверзен миелитис
• дегенерација на ‘рбетниот мозок
• некои третмани со зрачење или хемотерапија за рак
• прекинувањето на употребата на некои антидепресиви може да го зголеми ризикот
• воспаление поради повреда или оштетување на ‘рбетниот мозок (миелопатија)
• Арнолд – Кјариева малформација
• Бехчетова болест, ретко автоимуно нарушување кое предизвикува воспаление во крвните садови
• Бехчетова болест (Behçet’s disease), ретко автоимуно нарушување кое предизвикува воспаление на крвните садови
• херпес зостер (shingles)
• системски еритематозен лупус
• примање анестезија или друга интервенција на ‘рбетот
• труење со азотен оксид
• нарушувања на цервикалниот диск, кои влијаат на горниот дел на ‘рбетот

Неколку студии сугерираат на поврзаност на Лермитовиот синдром со недостакот на витаминот Б12. Витаминот Б12 е неопходен за производство и одржување на миелинот, масна супстанција која ја сочинува миелинската обвивка и ги покрива нервните влакна.

Наодите од студија спроведена во 2015 година сугерираат дека Лермитовиот синдром влијае на 1 од 3 лица со МС. Околу 16% од учесниците пријавиле дека го доживеале за време на нивната прва епизода на МС.

Предизвикувачи

Лермитовиот знак може да се појави кога некое лице го свиткува вратот – на пример, ако одеднаш го свиткаме вратот нанапред така што брадата ги допира градите.

Во останатите предизвикувачи вклучуваме։

• замор
• стрес
• изложеност на топлина

Лермитовиот синдром се разликува од Утоф феноменот (Uhthoff phenomenon). Кај Утофовиот феномен невролошките симптоми на МС привремено се влошуваат при изложување на топлина. Тие на пример може да се влошат кога користите сауна.

Кога да посетите лекар

Лицата кои го доживуваат Лермитовиот синдром за прв пат може да стравуваат дека симптомите на МС се влошуваат, но тоа не мора да биде случај.

Сепак советуваме да разговарате со вашиот лекар, бидејќи тој може да предложи опции за третман.

Третманот може да биде корисен во справувањето со болката која се јавува како последица на Лермитовиот синдром, како и на останатите симптоми на МС.

Ако Лермитовиот синдром се појави кај лице кое не е дијагностицирано со МС, или друга позната демиелинизирачка состојба, тогаш препорачуваме консултација со лекар. Лермитовиот синдром понекогаш може да биде ран знак за МС.

Опции за третман

Едукацијата и уверувањето често се доволни за да им помогнат на повеќето лица да се справат со непријатноста која ја предизвикува Лермитовиот синдром. Најчесто поминува по неколку месеци до една година.

Сепак, ако се појавува често и значително влијае на квалитетот на животот, лекарот може да препорача третман .

Различните опции за третман може да помогнат во управувањето со болката предизвикана од Лермитовиот синдром, како и од другите симптоми на МС.

Управување со стресот

Техниките за релаксација можат бидат од корист. Во нив вклучуваме:

• свесност и медитација
• длабоко дишење
• вежби за истегнување

Лекарот може да препорача соодветна рутина за истегнување.

Механички уреди

Употребата на мека потпора околу вратот може да помогне да се избегнат нагли движења кои го активираат Лермитовиот синдром.

Електричните стимулативни уреди, како што се уредите за транскутна електрична нервна стимулација, користат блага електрична струја за да ја ублажат болката. Овие електрични импулси помагаат да се намалат сигналите за болка и да се релаксираат мускулите.

Тие, исто така, може да предизвикаат производство на хормони наречени ендорфини кои делуваат како природни ослободувачи од болка.

Лекарства

За Лермитовиот синдром не постои специфичен третман со лекови, но постојат некои анегдотски докази дека следниве може да помогнат:

• carbamazepine (Tegretol)
• oxcarbazepine (Trileptal)
• gabapentin(Neurontin)

Заклучок

Лермитовиот синдром е сензација слична на електричен шок и влијае на вратот и ‘рбетот. Обично симптомите се спорадични и не траат долго, но може да се повторат. Често поминува без третман по неколку месеци, до една година.

Може да влијае на лицата со МС при ненадејно движење на вратот или главата. Сепак, не е карактеристичен исклучиво за МС.

Лермитовиот синдром може да биде непријатен, но не е животозагрозувачки и не претставува сигнал  дека МС се влошува.

Секое лице со МС кое неочекувано доживеало ваква сензација препорачливо е да го извести својот лекар. Тој можеби ќе може да предложи начини за намалување на неговото влијание.

 

Извор:  https://www.medicalnewstoday.com/articles/323889

Забелешка: Овој текст има информативен карактер и не обезбедува медицински совет, дијагноза или третман. Оваа содржина не е наменета да биде замена за професионален медицински совет, дијагноза или третман. Секогаш побарајте совет од Вашиот лекар или друг квалификуван здравствен работник за било какви прашања што може да ги имате во врска со здравствената состојба. Никогаш не занемарувајте ги или одложувајте професионалните медицински совети поради тоа што сте го прочитале на оваа веб страница. Мислењата изразени не секогаш се мислења на Националното здружение за МС и наменети се да предизвикаат дискусија за прашања кои се однесуваат на мултипла склероза.