Имунолошки систем։ Дали да се зајакне или да се потисне?
Во сезоната на грип која е во полн ек, и вестите за ширење на коронавирусот, од многу луѓе слушам за одржување на имунолошки систем оптимално зајакнат со што би се спречиле настинките, грипот и стомачните вируси. Во овој период од годината во повеќето делови од земјата (САД) времето најчесто го поминуваме во затворени простории, а тоа значи дека сончевите зраци и свежиот воздух не ни помагаат толку многу во заштитата од болестите. Во текот на овие есенски, зимски и пролетни месеци често присуствуваме и на разни собири кои најчесто се во затворени места. Ова може да нѐ изложи на работи со кои инаку не би биле во контакт.
Со МС нашиот имунолошки систем веќе е премногу активен. Токму тој факт е она што придонесува за оштетување на централниот нервен систем. Кога ваквиот, хиперактивен имунолошки систем го напаѓа организмот и предизвикува лезии во мозокот и ‘рбетниот мозок, не сакаме да преземеме никакви мерки за дополнително да го зајакнеме. Всушност, зајакнувањето на имунолошкиот систем има потенцијал да ја намали ефикасноста на терапиите за модифицирање на болеста (DMT).
Кога живееме со МС не треба да бараме зајакнување на имунолошкиот систем со додатоци, туку всушност треба да се воздржуваме од одредени хербални препарати. Пред неколку години во магазинот „MS Focus“ се појави статија токму на оваа тема.
Билните препарати како што се „AHCC“, ехинацеа, бозел, андографис, астрагалус, „DHEA, CoQ10“, женшен и гинко билбоа генерално треба да се избегнуваат. Одредени производи од печурки, вклучително шитаке, тремела и маитаке се идентификувани дека имаат својства за зајакнување на имунитетот, па затоа не треба да се конзумираат во големи количини кога имунолошкиот систем е хиперактивен. Докажано е дека лукот, ако се консумира во големи количини, спречува настинки и грип кај лица со имунолошки систем кој не е компромитиран.
Вежбањето, се чини, може и да го зајакне и да го модулира (нормализира) нашиот имунолошки систем преку зголемување на производството на Т-клетки (бели крвни зрнца, инструменти во борбата против инфекциите). Вежбањето, исто така, го подобрува расположението, циркулацијата и респираторната функција (од суштинско значење во борбата против болестите кои се пренесуваат во воздухот, како што се настинки и грип). Пушењето е уште еден фактор кој треба да се земе предвид. Самиот чин на пушење ги отстранува заштитните клетки од нашиот респираторен тракт, што ја отвора можноста за вирусен или бактериски напад. Намалувањето на стресот игра улога во тоа колку нашите тела се подложни на инфекции. Лицата со пониско ниво на стрес не се ни приближно склони кон инфекции како оние за кои стресот или анксиозноста претставуваат проблем. Спиењето оди рака под рака со намалување на стресот во заштитата од болести.
Dr. Allen Bowling е невролог кој има напишано неколку книги за комплементарна и алтернативна медицина и како таа се применува кај МС. Има спроведено голем број клинички испитувања користејќи суплементи или алтернативни терапии за третман на МС и неговата работа топло ја препорачувам. Има и своја веб-страница каде може многу лесно да се изгубите. Исто така, има списоци на билки или храна за зајакнување на имунитетот што треба да ги избегнувате ако имате МС.
Накратко, миењето на рацете во комбинација со вежбање, свеж воздух, намалување на стресот и добар сон ќе ве заштити од болести повеќе отколку земањето додатоци кои го зајакнуваат вашиот имунолошки систем и со тоа, исто така, имаат потенцијал да предизвикаат влошување на симптомите на МС.
Извор: https://msfocus.org/Magazine/Magazine-Items/Exclusive-Content/2020/Immune-System-Boost-or-Suppress
Забелешка: Овој текст има информативен карактер и не обезбедува медицински совет, дијагноза или третман. Оваа содржина не е наменета да биде замена за професионален медицински совет, дијагноза или третман. Секогаш побарајте совет од Вашиот лекар или друг квалификуван здравствен работник за било какви прашања што може да ги имате во врска со здравствената состојба. Никогаш не занемарувајте ги или одложувајте професионалните медицински совети поради тоа што сте го прочитале на оваа веб страница. Мислењата изразени не секогаш се мислења на Националното здружение за МС и наменети се да предизвикаат дискусија за прашања кои се однесуваат на мултипла склероза.