Мултипла склероза и тешкотии со дишењето
Имате мултипла склероза и страдате од тешкотии со дишењето? Иако не е толку вообичаен симптом како вкочанетост, пецкање, заматен вид и тешкотии при одење, проблеми со дишењето се јавуваат кај лицата кои живеат со МС.
Пред да читате понатаму, ако моментално имате тешкотии со дишењето, важно е веднаш да се јавите кај вашиот лекар. Тешкотиите со дишењето може да бидат предизвикани од повеќе причини, како бронхитис, пневмонија, алергии или некој друг проблем, затоа е многу важно да побарате медицински третман за да ја процените вашата моментална состојба.
Исто како и чукањето на срцето, дишењето е контролирано од вашиот автономен нервен систем (АНС). Во автономниот нервен систем функциите се случуваат автоматски и не бараат свесни одлуки за управување. Со други зборови, не треба да размислувате за да дишете.
Се смета дека МС не влијае на вашиот АНС. Сепак, мускулите кои го контролираат дишењето можат да бидат погодени од МС. Ова значи дека исто како што симптомите на МС може да предизвикаат слабост во рацете или нозете, слабоста може да се појави и кај мускулите на градите или стомакот кои го контролираат дишењето. Ако МС предизвикува слабост во мускулите на дишењето, тогаш вдишувањето и издишувањето може да станат отежнати. Дополнителниот напор потребен за дишење може да биде исцрпувачки и да доведе до зголемен замор.
Дишењето може да влијае и на вашата способност за зборување. Ако некогаш сте се обиделе да зборувате после трчање или вежбање, знаете колку е тешко кога не можете да дојдете до здив. Ако се борите да дишете поради слабост предизвикана од МС, тогаш веројатно имате и нарушен говор. Покрај говорот, ако имате тешкотии со голтањето поради МС, тогаш сте изложени на ризик од аспирациона пневмонија. Аспирациона пневмонија е кога храна, течност или други честички случајно се вдишуваат во белите дробови и предизвикуваат инфекција.
Проблемите со дишењето може да вклучуваат отежнато дишење, неможност за длабок здив, апнеја при спиење, често кашлање, прекумерно икање или воздивнување. Многу лица кои живеат со МС велат дека доживуваат „МС Прегратка“, што претставува болка или стегање во градите. Оние кои доживеале МС Прегратка (MS Hug) може да доживеат тешкотии при дишењето поради болка и стегање во градите.
Што преземате ако имате проблеми со дишењето? Во продолжение ви нудиме пет стратегии кои ќе помогнат во управувањето со целокупната функција на белите дробови ако живеете со МС.
- Веднаш побарајте медицински третман. Без разлика дали ќе се обратите кај вашиот матичен лекар, итна помош или Ургентен центар, ако имате проблеми со дишењето треба веднаш да побарате лекарска помош.
- Прашајте го вашиот лекар за достапните третмани. Ако ова е хроничен или повторлив проблем може да има достапни третмани. Без разлика дали се работи за небулизатор, инхалатор, CPAP – машина (Continuous positive airway pressure (CPAP), или некое друго помагало за дишење, денес има достапни третмани кои обезбедуваат олеснување.
- Побарајте упат до респираторен терапевт (РТ). Многу луѓе не го знаат ова, но РТ ординираат амбулантски, обезбедувајќи белодробни евалуации. Амбулантски РT може да развие план за нега, вклучително и вежби за дишење за да ја подобри целокупната функција на белите дробови.
- Побарајте упат до говорно – јазичен патолог (speech language pathologist – SLP). Ако проблемите со дишењето се поврзани со тешкотии при голтање или влијаат на вашата способност за зборување, тогаш побарајте евалуација, или студија за голтањето. Говорно – јазичниот патолог може да развие план за нега со компензаторни стратегии за голтање и зборување што може да помогне со вашиот проблем со дишењето.
- Престанете да пушите. Иако се подразбира, пушењето не само што го зголемува ризикот од појава на тешкотии со дишењето, туку може и да ја зголеми активноста на МС. Откажувањето од пушењето можеби е тешка задача, но таа одлука може да ви помогне не само со дишењето, туку и со севкупниот квалитет на живот со МС.
Додека дишењето се контролира автоматски од Автономниот нервен систем, компликациите поради мускулна слабост предизвикани од МС може да влијаат на вашето дишење. Ако се чувствувате како да не можете да дојдете до здив, тоа драматично влијае на вашиот севкупен квалитет на живот. Не грижете се, не сте единствени. Лекарите, респираторните терапевти и патолозите за говорен јазик се меѓу посветените специјалисти кои можат да помогнат. Без разлика дали е тоа преку третман, вежби за дишење или програма за откажување од пушење, искористете ги предностите на секој расположлив ресурс за да можете повторно нормално да дишете.
Извор: https://www.msfocusmagazine.org/Magazine/Magazine-Items/Posted/MS-and-Breathing-Problems
Забелешка: Овој текст има информативен карактер и не обезбедува медицински совет, дијагноза или третман. Оваа содржина не е наменета да биде замена за професионален медицински совет, дијагноза или третман. Секогаш побарајте совет од Вашиот лекар или друг квалификуван здравствен работник за било какви прашања што може да ги имате во врска со здравствената состојба. Никогаш не занемарувајте ги или одложувајте професионалните медицински совети поради тоа што сте го прочитале на оваа веб страница. Мислењата изразени не секогаш се мислења на Националното здружение за МС и наменети се да предизвикаат дискусија за прашања кои се однесуваат на мултипла склероза.