Мерки на претпазливост при користење на канабис како третман за МС
Лицата со МС кои во третманот користат канабис мора да бидат внимателни. Истражувачка статија објавена во мај во “JAMA Network Open” покажува дека во изминатите неколку години се зголемува бројот на повици до центрите за контрола на труење од страна на лица кои намерно или ненамерно користат преработени или непреработени производи од канабис. Вработените во јавното здравство изразуваат загриженост.
Според оваа статија изготвена од експерти во различни области во САД, еден од проблемите е тоа што на пазарот сѐ повеќе се нудат преработени и модифицирани препарати од канабис, а се помалку природни. Овие синтетички производи може да содржат повисокo ниво на “THC (tetrahydrocannabinol)” отколку природните базирани на растението канабис. THC е супстанца од растението која ја менува менталната состојба кај личноста создавајќи чувство исто како при употреба на марихуана. Според експертите тој дополнителен THC (ТХЦ) може да резултира со зголемени негативни краткотрајни ефекти како што се нарушување на когнитивните и психомоторните способности.
Овие негативни ефекти не значи дека се појавуваат единствено кај синтетичкиот канабис. Едно истражување спроведено кај лица со МС кои долготрајно го употребуваат канабисот како третман покажува дека кај корисниците кои престанале да го користат лекот 28 дена дошло до подобрување на когнитивните способности, а исто така позитивно влијаело и на депресијата, со што се доаѓа до заклучок дека употребата на канабис ја зголемила депресијата и ги намалила когнитивните способности.
Минатата година од страна на научниците при “University of Michigan, USA” била спроведена мала анкета врз 1217 лица со МС и според резултатите 386 лица (околу 32%) користеле канабис или стриктно во медицински цели како што се нервни заболувања или несоница, или покрај во медицински користеле канабис и во рекреативни цели. Лично, мислам дека овој процент е низок. Ако ги разгледате групите поврзани со МС во социјалните медиуми ќе приметите дека голем број лица сведочат дека канабисот е единственото нешто што им помага во справување со болка, спастичност или несоница, се добива впечаток дека бројот на овие лица воопшто не е мал.
Кој ги советува овие пациенти?
Голем број од лицата со МС кои користат канабис го прават тоа без или со недоволна консултација и препорака од лекар. Научниците при “University of Michigan” објавуваат дека само 18% од испитаниците изјавиле дека разговарале со својот лекар за користење канабис, а помалку од 1% добиле упатства од лекар за начинот на користење.
„Причините за ваквиот тренд на користење на канабисот без препорака или консултација со лекар бараат дополнителни истражувања но, се потврдуваат долгогодишните стравувања дека потрошувачката и употребата на канабиноидите кај лицата со МС е многу поголема од бројките на препорачано користење на канабис од страна на лекар”, забележува главниот автор Tiffany Braley.
Braley смета дека еден од проблемите е тоа што лекарите немаат доволно клинички докази врз основа на кои би ги темелеле овие препораки.
„Насоките кои лекарите ги даваат на лицата со МС мора да бидат базирани на истражувања фокусирани на придобивките и на последиците од употреба на CBD (ЦБД) и THC (ТХЦ) како и на механизмите преку кои канабиноидите делуваат врз симптомите на МС”, вели Braley.
Имам среќа. Мојот невролог верува дека медицинската марихуана може да биде корисен третман за МС, и мислам дека би била подготвена да ми ја препише ако сакам да ја користам. Знам дека мојот матичен лекар би го направил тоа. Но постојат и пречки, канабисот може да биде скап, а осигурувањето не го покрива третманот. Исто така во многу држави канабисот сѐ уште не е легален за употреба.
Да ги информираме и подучиме лекарите во врска со канабисот
Ајде да ги обезбедиме информациите кои им се потребни на лекарите како би се чувствувале попријатно да препишуваат терапија базирана на канабис. Ајде да ги едуцираме корисниците за потенцијалните опасности од синтетичкиот канабис и можните негативни ефекти дури и на природните производи. Ајде да работиме во насока осигурувањето да го покрива овој вид на третман како што е тоа случај кај традиционалните лекарства. Ајде да ги натераме сите држави да го легализираат медицинскиот канабис. Едноставна работа нели?
Забелешка: Рубриката „Најнови информации“ е дел наменет исклучиво за вести и информации на оваа веб страница за оваа болест. Не обезбедува медицински совет, дијагноза или третман. Оваа содржина не е наменета да биде замена за професионален медицински совет, дијагноза или третман. Секогаш побарајте совет од Вашиот лекар или друг квалификуван здравствен работник за било какви прашања што може да ги имате во врска со здравствената состојба. Никогаш не занемарувајте ги или одложувајте професионалните медицински совети поради тоа што сте го прочитале на оваа веб страница. Мислењата изразени во оваа рубрика не секогаш се мислења на Националното здружение за МС и наменети се да предизвикаат дискусија за прашања кои се однесуваат на мултипла склероза.