5 совети за справување со стресот за време на празниците
Сезоната на празници е пред нас. Дворовите на куќите се украсени со празнични светла и украси. Во секоја рекламна порака сретнуваме празнични распродажби. Големите редици на касите за наплата во маркетите наликуваат на сообраќаен метеж. За оние кои живеат со мултипла склероза (МС), овој период од годината може да претставува дополнителен предизвик од вообичаената рутина.
Следењето на празничниот ритам може да предизвика физички, емоционални и финансиски стресови. Стресот е голем непријател за оние кои живеат со МС. Премногу стрес може да доведе до нови или влошување на постоечките симптоми. Справување со стресот пред и за време на празниците е од клучно значење за да се чувствувате добро во новата година.
Ви нудиме 5 совети за справување со стресот за време на празниците:
1. НАПРАВЕТЕ СПИСОК И ПРОВЕРЕТЕ ГО ДВАПАТИ
Празниците се одлично време за дружење со семејството и пријателите, сепак повеќето празнични активности се надвор од нашата дневна рутина. Кога правите планови за овие дополнителни активности, важно е во равенката да ја вклучите и МС како не би се чувствувале преоптоварено, растргнато и уморно. Направете список со сите состаноци, забави, шопинзи, патувања и сите други обврски. Потоа закажете си ги овие обврски доволно раздалечени во календарот како би се осигурале дека безбедно ќе ги извршите. Откако ќе го направите списокот повторно проверете го за да бидете сигурни дека не сте заборавиле нешто, како и дека ќе се чувствувате пријатно со сите наведени активности. Знаејќи дека сте подготвиле план пред време ќе помогне да се намали стресот од извршувањето на овие обврски кој отскокнува од вашата рутина.
2. ОДРЕДЕТЕ БУЏЕТ
Празничниот маркетинг е навистина ефикасен во убедувањето да купите работи кои не ви се потребни. Пред да започнете со пазарење одредете го вашиот буџет и држете се до него. Претераното трошење за време на празниците може да доведе до зголемен стрес и грижа како да излезете на крај со сите овие трошоци.
3. ПАМЕТНО ИЗБЕРЕТЕ АРАНЖМАН ЗА ПАТУВАЊЕ
Во секојдневното живеење постои таканаречен природен шпиц. Патиштата се секогаш пофреквентни од 7 до 10 часот наутро, отколку од 5 до 7 часот наутро. Ако патувате за време на празниците, направете го тоа во невообичаено време за патување кога обично патиштата се растеретени. Ова е особено важно ако се соочувате со тешкотии со подвижноста или со видот. Стресот предизвикан од сообраќајот и повеќечасовното седење може да доведе до вкочанетост и трпнење што може да доведе до зголемен ризик од пад. Густиот сообраќај, краткото траење на денот и темницата во зима во комбинација со светлата на автомобилот може да доведе до зголемен визуелен стрес.
4. ИЗБЕГНУВАЈТЕ ПРЕЈАДУВАЊЕ
Празниците со себе носат многу вкусна храна и неодоливи десерти во изобилие што не ретко доведува до претерано консумирање. Храната за време на празниците содржи многу дополнителен натриум и шеќер што може негативно да влијае на вашиот имунолошки систем, варењето и нивото на енергија. Сепак, најлошото нешто што може да се случи во овој период од годината е да не пиете доволно вода. Пиењето повеќе вода всушност ќе го намали апетитот и ќе ви помогне да одолеете на храната и да избегнете дополнителни стресови поврзани со исхраната.
5. ЕДНОСТАВНО РЕЧЕТЕ „НЕ”
Сè што сакаме за време на празниците е да бидеме во друштво и да им удоволиме на нашите пријатели и сакани. Заради нашата потреба да даваме се изложуваме на ризик себе си и нашата мултипла склероза. Една од најтешките вештини за совладување е способноста едноставно да се каже не.
Да ги разгледаме нашите совети за намалување на стресот за време на празниците низ овие принципи:
- Ако некоја обврска не се наоѓа на вашиот список и не сте сигурни дека можете да ја исполните едноставно кажете „не”.
- Ако нешто не влегува во предвидениот буџет, иако вие мислите дека тоа би бил идеален подарок, едноставно кажете „не”.
- Ако патувањето за време на празниците мислите дека би ви создало дополнителен стрес, едноставно кажете „не”.
- Уште едно парче торта? Едноставно кажете „не”.
Како лице кое живее со МС, важно е да разберете дека дополнителните стресови за време на празниците можат да доведат до нови или влошување на постоечките симптоми. Правењето список, одредувањето буџет, паметното планирање на патувањата, спротивставувањето на прејадување и совладувањето на способноста едноставно да кажете не, ќе ви помогне да го намалите стресот и да уживате во празниците. Запомнете, стресот може да доведе до појава на нови или влошување на постоечките симптоми. Намалувањето на стресот може да ви помогне во управувањето со симптомите на МС и е особено важно во периодот на празници.