10 забавни начини да го одржувате умот бистар

Честопати ме канат на „подкасти“ да зборувам за МС. Имам тенденција да зборувам страсно за помагала за движење, пристапност или функцијата на мочниот меур, но понекогаш во своето обраќање заборавам на конкретната тема на која зборувам. Читам секоја вечер пред спиење но, често половина од времето го поминувам во читање на истите работи кои сум ги прочитал минатата ноќ. Во меѓувреме ако некој се обиде да разговара со мене морам да ја исклучам музиката или телевизорот затоа што ми го одземаат вниманието.

Ако имате МС, како мене, ефектите врз когнитивните способности може да бидат виновни за работи како што се нарушена концентрација, заборавање на  зборови, тешкотии при донесување одлуки или префрлување од задача на задача во секојдневното функционирање. Нашиот мозок е одговорен за тоа како размислуваме, реагираме, учиме и ги помниме информациите, а МС може да има негативно влијание врз овие важни функции.

Според „National MS Society“ повеќе од половина од лицата со МС, во одреден момент ќе доживеат когнитивни промени поврзани со МС. Дури и без МС, многу луѓе доживуваат пад на когнитивните способности со возраста.

Дури и ако не забележите промени, логично е да започнете да го тренирате мозокот рано за да го одржувате својот ум бистар во следните децении.

Добрата вест е дека секој може да ги зголеми своите когнитивни способности во секој момент, а инвестирањето во когнитивно здравје не е само забавно, туку и исплатливо. Клучот за создавање когнитивна еластичност е да барате активности кои се предизвикувачки и нови.

Ова се моите омилени 10 начини како да го одржите умот бистар кога се справувате со МС.

Играјте видео игри

Видео игрите не поттикнуваат да решаваме проблеми. Истражувањата покажуваат дека „гејмерите“ се значително подобри во одржувањето на фокусот и мултитаскингот.

Меѓутоа доколку ви се случува навечер кога ќе ги затворите очите да ви се прикажуваат блокови од играта „тетрис“ време е да пронајдете нова предизвикувачка игра. Нашиот мозок напредува при совладувањето нови предизвици и штом сте станале прилично добри во некоја игра придобивките за мозокот се намалуваат.

Учете нов јазик

Едно истражување покажува дека лицата кои зборуваат два или повеќе јазици се подобри во извршување на повеќе задачи одеднаш и имаат подобра меморија, визуелно-просторни вештини и креативност.

Со помош на софтверите за учење јазици никогаш не било полесно да го унапредите вториот јазик кој сте го учеле во училиште или да започнете да совладувате нов јазик.

Сакам да следам  групи и профили на социјалните мрежи на странски јазик, така секојдневно сум изложен на употреба на јазикот кој го совладувам.

Патувајте

Патувањето е еден од најдобрите начини да го предизвикаме нашиот мозок со нови искуства кои ги вклучуваат сите наши сетила.

Прилагодувањето како да се движите на ново место, да уживате во различна клима и да излезете од вашата рутина имаат когнитивни придобивки.

Ако учите нов јазик, тоа исто така ви дава можност да ги искористите јазичните вештини и да ги користите во реалниот свет.

Дури и кога ќе направите грешка како јас кога го коментирав прекрасниот француски оброк што ми го послужија „без презервативи“ (што значи „без кондоми“ на француски), вашите домаќини ќе го ценат вашиот напор. (Французите обично не ставаат кондоми во нивната храна, а и не сум чул некој да го прави тоа)

Ако летањето со авион не ви е баш омилено (дополнително владее пандемија) не мора да патувате далеку. Дури и промена во секојдневната рутина со посета на најблискиот парк може позитивно да влијае на мозокот.

Ако излегувањето од дома не е опција, пробајте да приготвите храна по рецепт од друга култура користејќи состојки со кои не сте запознаени. Или, слушајте  музика од таа култура додека готвите и вечерате.

Прочитајте книга

Се подразбира дека кога читаме учиме нови работи и го зголемуваме вокабуларот, но читањето исто така може да ни помогне да ја подобриме меморијата и го стимулира мозокот.

Читање на печатена книга. Некои постари истражувања сугерираат дека помала е веројатноста дека нешто ќе запомниме кога читаме електронско издание за разлика од печатено.

Вежбајте го вниманието

Можеме да ги подобриме нашите когнитивни способности преку прилагодување на начинот на живот. Да се одмараме доволно, да внесуваме доволно течности, да користиме техники за смирување и да правиме паузи во работата кога ни се потребни.

Редовната медитација може да го контролира стресот и да ги подобри когнитивните способности. Со обрнување внимание на деталите при извршувањето на секојдневните задачи ја намалуваме можноста да се обидеме да ја отстраниме шминката на лицето со отстранувач на лак за нокти.

Учете низ целиот живот

Едно истражување покажува дека учењето во текот на целиот живот (доживотен ученик) може да ги подобри когнитивните способности. Додека истражувањето се фокусира на постарите и возрасните лица, секој може да има придобивки од ефектот на совладување нешто ново.

Речиси секогаш посетувам курсеви. Историја на уметност, пишување  сценарија, странски јазици, часови по пеење се курсеви кои јас ги посетував низ годините откако сум дијагностициран со МС.

Какви и да се вашите интереси и каков и да е вашиот буџет, шансите се дека постои курс каде што можете да научите повеќе. Проверете во вашата околина дали постојат организации, музеи за уметност, библиотеки и центри во заедницата за да се информирате за сите бесплатни или евтини часови кои би можеле да ги посетувате.

Вежбајте

Вежбањето може да има позитивно влијание врз голем број симптоми на МС како спастичност, дисфункција на дебелото црево, па дури и замор. Движењето, особено кога ни го забрзува пулсот е особено корисно за одржување на когнитивните способности.

Совладајте некој музички инструмент

Ако отсекогаш сте сакале да научите како се свири на пијаното  кое собира прашина во вашата дневна соба сега имате медицинска причина да го направите тоа. Бидејќи видот, координацијата, слухот и меморијата се вклучени во оваа предизвикувачка активност, свирењето на музички инструмент е моќна алатка за подобрување на когнитивните способности.

Одете по потешкиот пат

Не користете калкулатор или (GPS). Проверете го сами документот кој го пишувате пред да го притиснете копчето за автоматска проверка. Четкајте ги забите со послабата рака. Одете на работа или прошетка по нов пат.

Многу од нашите рутини се автоматски. Кога ги нарушуваме секојдневните модели, го тераме мозокот да работи понапорно.

Потпрете се на вашиот систем за поддршка

Може да биде примамливо да се изолирате кога симптомите се сериозни. Сепак, пријателствата и другите здрави врски се клучни за квалитетно живеење.

Едно истражување од 2021 година спроведено врз ново дијагностицирани лица со МС покажува дека социјалната поддршка е поврзана со подобро ментално здравје, квалитет на живот, помал замор и подобри когнитивни способности.

Заклучок

Ако сте загрижени за вашите когнитивни способности побарајте од вашиот лекар  прегледи и тестови со кои би се утврдиле полињата на слабост. За мене беше корисно тоа што утврдив дека мојата неспособност да памтам ликови е предизвикана од МС, а не се работи само за карактерна особина.

Дури и ако не доживувате промени добро е да ги добиете основните информации. Вашиот лекар може да ви помогне да ги идентификувате проблематичните области и да изградите план за оптимизирање на когнитивната функција.

Клучот за успешно инвестирање во начинот на кој размислуваме, учиме и се сеќаваме е да најдеме активности кои се пријатни. Секогаш бидете во потрага по нови искуства и вашиот мозок ќе ви биде благодарен во годините кои следат!

 

Извор: https://www.healthline.com/health/multiple-sclerosis/fun-ways-to-keep-your-mind-sharp-with-ms

Забелешка: Рубриката „Најнови информации“ е дел наменет исклучиво за вести и информации на оваа веб страница за оваа болест. Не обезбедува медицински совет, дијагноза или третман. Оваа содржина не е наменета да биде замена за професионален медицински совет, дијагноза или третман. Секогаш побарајте совет од Вашиот лекар или друг квалификуван здравствен работник за било какви прашања што може да ги имате во врска со здравствената состојба. Никогаш не занемарувајте  ги или одложувајте професионалните медицински совети поради тоа што сте го прочитале на оваа веб страница. Мислењата изразени во оваа рубрика не секогаш се мислења на Националното здружение за МС и наменети се да предизвикаат дискусија за прашања кои се однесуваат на мултипла склероза.