10 начини на кои пеењето придонесува за вашето здравје

Луѓето сакаат да пеат. Без разлика дали можат или не да отпеат точна  мелодија, се чини дека луѓето разбираат дека има нешто позитивно,  нешто здраво во пеењето.

Всушност постојат цврсти научни докази кои укажуваат дека пеењето е добро за вашето тело и вашиот ум.

Во оваа статија подетално ќе разгледаме како пеењето може да биде корисно за вашето физичко и ментално здравје и како да го користите како форма на терапија.

Кои се придобивките од пеењето?

Децениските истражувања покажаа дека пеењето, индивидуално и во групи е полезно за вас на многу начини.

Според науката ова се десетте клучни придобивки од пеењето։

1. Пеењето го ублажува стресот

Се чини дека пеењето е добра алатка за ослободување од стресот. При едно истражување од 2017 година била мерена количината на кортизол, хормон на стресот во плунката на испитаниците пред и после пеење.

Научниците во таа студија откриле дека количината на кортизол е помала по пеењето, што е показател дека луѓето се чувствуваат порелаксирано откако ќе отпеат некоја мелодија.

Тие, исто така откриле дека пеењето го намалува нивото на стрес без разлика дали учесниците пееле во група или индивидуално.

Сепак не е сѐ така едноставно. Кортизолот се намалува само ако пеете во средина која не ве вознемирува. При слично истражување од 2015 година се тестирало нивото на кортизол во плунката по пеење, откривајќи дека нивото на кортизол во ова сценарио се зголемило.

2. Пеењето го стимулира имунолошкиот одговор

Постојат некои докази дека пеењето може да го зајакне вашиот имунолошки систем и да ви помогне полесно да се справувате со болестите.

Едно истражување од 2004 година ги спореди ефектите од пеењето со ефектите од слушање музика. Во две одделни сесии, испитаниците пееја или слушаа музика.

Кај оние кои пееја се забележа повисоко ниво на имуноглобулин А, антитело кое помага во справувањето со инфекции. Слушањето музика ги намали хормоните на стрес, но не го стимулираше имунолошкиот систем.

3. Пеењето го зголемува прагот на болка

Кога пеете во група, без разлика дали станува збор за голем хор или помала група, чинот на колективно пеење предизвикува вашето тело да испушта ендорфин. Овој хормон помага да се создадат позитивни чувства, па дури и да се промени перцепцијата за болка.

Едно истражување од 2012 година покажа дека пеењето, свирењето на тапани и танцување во група предизвикуваат ослободување на хормони кои ја зголемуваат толеранцијата на болка. Слушањето музика не го предизвикува овој ефект.

Научниците забележуваат дека чувствата на социјална врска, а не самата музика, се чини дека стојат зад зајакнувањето на толеранцијата на болка.

4. Пеењето може да помогне да се ослободите од ноќното ‘рчење

Редовното пеење може да го промени начинот на дишење, дури и кога не пеете.

При едно истражување од 2008 година научниците ги интервјуирале сопружниците на членовите на хорот, паралелно со сопружниците на лица кои не пеат.

Научниците откриле дека членовите на хорот имале значително помалку проблем со ‘рчење. Ова ги натерало да препорачаат редовно пеење како потенцијален третман за ‘рчење.

Истражувањата покажуваат и дека луѓето кои свират на дувачки инструменти, исто така ‘рчат помалку од општата популација.

Овие наоди поттикнаа некои експерти да заклучат дека пеењето и свирењето дувачки инструменти може да бидат корисни за луѓето со опструктивна апнеја при спиење „obstructive sleep apnea (OSA)“.

5. Пеењето ја подобрува функцијата на белите дробови

Бидејќи пеењето вклучува длабоко дишење и контролирана употреба на мускулите во респираторниот систем може да биде корисно кај одредени состојби на белите дробови и тешкотии при дишењето.

Истражувањата покажаа дека техниките на дишење кои се користат при пеење нудат придобивки за лицата со следниве состојби:

• хронично опструктивно белодробно нарушување „chronic obstructive pulmonary disorder (COPD)“
• астма
• цистична фиброза
• рак
• мултипла склероза
• квадриплегија

Иако пеењето само по себе не третира или лечи ниту една од овие состојби, може да биде од корист во зајакнувањето на респираторните мускули.

Истражувањето покажува дека пеењето, исто така, ја зголемува количината на кислород во крвта. Покрај белодробните придобивки пејачите имаат подобрено расположение и поголемо чувство за социјална поврзаност.

6. Пеењето предизвикува чувство на припадност и поврзаност

Кога пеете во група најверојатно ќе почувствувате ист вид дружељубивост и поврзаност како тимските спортисти.

При едно истражување од 2014 година спроведено врз 11.258 ученици научниците откриле дека децата кои посетуваат часови по пеење и музичко образование развиле силно чувство за припадност и социјална вклученост.

Друго истражување од 2016 година, спроведено врз 375 возрасни испитаници, покажало дека за разлика од оние кои пееле самостојно, кај оние кои пееле во група се појавило повисоко чувство на благосостојба и поврзаност.

Една од неврохемикалиите кои се ослободуваат кога луѓето имаат чувство на поврзаност е окситоцинот, познат и како хормон на љубовта.

Спонтаното, импровизирано пеење предизвикува вашето тело да го ослободи овој хормон, што може да ви предизвика зголемено чувство на поврзаност и припадност.

7. Пеењето ја подобрува меморијата кај лицата со деменција

Лицата со алцхајмерова болест и други видови на деменција доживуваат постепено губење на меморијата. Истражувањата покажуваат дека лицата со овие состојби полесно ги меморираат зборовите во песните отколку други зборови.

При едно истражување спроведено од „Alzheimer’s Foundation“, учесниците рекле дека е „убаво што може да запомнат барем нешто“.

Исто така пејачите забележале дека не ги помнат само зборовите во песните, туку полесно меморираат било каков текст. Кај некои пеењето познати песни одеднаш им ги вратило животните спомени кои исто така ги имале  заборавено.

Научниците откриле дека пеењето песни научени на помлада возраст предизвикало спонтано враќање на автобиографските детали кај многу лица.

8. Пеењето помага кога сте тажни

Пеењето во група не  помага само кај физичката болка. Исто така може да помогне кај емоционалната болка која ја чувствувате кога ќе загубите некој близок.

Во една студија од 2019 година спроведена меѓу лица кои се справуваат со тага научниците откриле дека кај оние кои пеат во хор симптомите на депресија не се влошиле со текот на времето и нивното чувство за благосостојба останало стабилно.

Всушност, хорските пејачи почувствувле постепено зголемување на нивната самодоверба како за време, така и по 12-неделната студија. Кај лицата од контролната група кои не учествувале во третманот со пеење не се забележале вакви подобрувања.

Научниците заклучиле дека групното пеење може да биде добра опција за лицата на кои им е потребна дополнителна поддршка во време на тага.

9. Пеењето го подобрува расположението и менталното здравје

При едно истражување спроведено во „United Kingdom“ биле набљудувани 20 лица вклучени во програмата за пеење, попозната како „The Sing Your Heart Out Project“. Во учесниците биле вклучени лица со тешкотии во менталното здравје, како и лица од општата популација.

Научниците откриле дека како резултат на овие работилници за пеење учесниците пријавиле подобрување на нивното ментално здравје, расположение, чувство на благосостојба и чувство на припадност.

10. Пеењето помага во подобрување на говорните способности

Пред неколку децении научниците започнаа да ги истражуваат ефектите од пеењето кај лицата кои поради одредена невролошка состојба се справуваат со  тешкотии во говорот.

До денеска научниците утврдиле дека пеењето ја подобрува способноста за говор кај лица со:

• Аутизам
• Паркинсонова болест
• Афазија, како последица од мозочен удар
• Пелтечење

Пеењето стимулира повеќе делови на мозокот во исто време. Ова може да им овозможи на лицата со оштетување на еден дел од мозокот да комуницираат користејќи ги здравите делови на мозокот.

Пеењето исто така може да ја зголеми звучноста на секој збор, што може да го олесни нивното изговарање.

Пеењето исто така го олеснува имплементирањето на тактирање со дланката, метод кој може да им помогне на лицата да одржуваат говорен ритам што инаку знае да биде предизвикувачки.

 

Извор: https://www.healthline.com/health/benefits-of-singing?

Забелешка: Рубриката „Најнови информации“ е дел наменет исклучиво за вести и информации на оваа веб страница за оваа болест. Не обезбедува медицински совет, дијагноза или третман. Оваа содржина не е наменета да биде замена за професионален медицински совет, дијагноза или третман. Секогаш побарајте совет од Вашиот лекар или друг квалификуван здравствен работник за било какви прашања што може да ги имате во врска со здравствената состојба. Никогаш не занемарувајте  ги или одложувајте професионалните медицински совети поради тоа што сте го прочитале на оваа веб страница. Мислењата изразени во оваа рубрика не секогаш се мислења на Националното здружение за МС и наменети се да предизвикаат дискусија за прашања кои се однесуваат на мултипла склероза.