Нова кампања на Националното здружение – „Активирај се, подигни свест за МС“
Националното здружение за помош и поддршка на лица со мултипла склероза трета година по ред ќе ја спроведува кампањата Септември – месец за подигнување на свеста за мултипла склероза. Мотото на кампањата гласи „Активирај се, подигни свест за МС“.
Оваа кампања има за цел преку физичката активност (пешачење, искачување планини, возење велосипед и други активности) да ги анимира лицата со МС и нашите поддржувачи за да се подигне свеста за МС, односно пошироката популација да се запознае со оваа состојба, како и со потребите и предизвиците со кои се соочуваат лицата кои боледуваат од МС.
Како и претходните години, така и оваа година огромна поддршка имаме од планинарски клубови од земјата и странство и планинари ентузијасти, кои ни даваат целосна поддршка во афирмиација на оваа болест со илјада лица од која, за жал, сѐ почесто заболува младата работоспособна популација.
Со оглед што интересот за вклучување во оваа кампања „Активирај се, подигни свест за МС“ е огромен, веруваме дека реализацијата ќе биде успешна, така што пошироката јавност ќе биде запознаена и информирана за мултипла склерозата, состојба со која се соочуваат повеќе од 1500 лица во Р. С. Македонија, вклучувајќи ги и нивните потреби и проблеми.
Неизмерно сме благодарни на сите наши поддржувачи кои ќе земат учество и ќе придонесат во подигнување на јавната свест за мултипла склерозата, адресирање на потребите и истакнување на предизвиците кои се дел од секојдневието на лицата со МС и членовите на нивните семејства.
НАЦИОНАЛНОТО ЗДРУЖЕНИЕ ЗА МС
Национално здружение за помош и поддршка на лица со мултипла склероза – Национално здружение за МС е доброволно, непрофитно, невладино и непартиско здружение на граѓани, формирано заради остварување, заштита, унапредување и усогласување на правата, потребите и интересите, како и вршење на дејности и активности со цел подигање на јавната свест за мултиплата склероза. Oсновано е на 20. март 2019 година. Од 7. мај 2020 година, Националното здружение е полноправна членка на Европската МС Платформа (анг. European Multiple Sclerosis Platform, EMSP).
Потребата за формирање на здружението се наметна како резултат на неопходноста за обединување на лицата со мултипла склероза, нивните семејства со цел согледување на нивните потреби и инволвирање на останати чинители заради решавање на проблемите на лицата со МС, како и подобрување на квалитетот на нивното живеење. Исто така, секојдневниот напредок во медицината, токму во областа на неврологија бара интензивирање на реформите во оваа област.
Нашата мисија и причина за постоење е искрената желба за помош и поддршка на лицата со МС и нивните негуватели, во подигнување на свеста кај јавноста и проблематиката по однос на МС, сериозен пристап, навремена дијагностика и навремен и соодветен третман со цел спречување на прогресијата и инвалидитетот, поддршка на пациентите, едукација по однос на правата на лицата со МС и промоција на нови достигнувања во медицината.